Atuarfissuaq ammarpoq – biilertut kigaallannissamik kaammattorneqarput

Atuartut 1.000-nit amerlanerusut sulisullu ataasinngorpat Atuarfik Inussummut Nuup qeqqanittumut ornigukkunik taqqoqisaannissaq angallattoqangaatsiarnissaalu ilimagineqartariaqarpoq.

Atuarfimmi atuartunut 910-nut sulisunullu 126-nut ulluinnaat nutaarluinnaat aallartissapput, tamannalu aamma piffimmi angallannermut sunniuteqassaaq.

Ukiumi atuarfiusumi kingullermi atuartut untrilillit arlallit Atuarfiit ASK aamma USKip matuneqarnerat pissutigalugu piffinnut assigiinngitsunut agguaanneqartariaqarsimapput. Ataasinngorpallu Atuarfik Inussummi katersuutissapput.

Atuarfiup qiterpasissumi inissisimanera pissutigalugu, Kommuneqarfik Sermersooq piffimmut angallannermut pilersaarummik saqqummersitseqqammerpoq. Meerarpassuit inersimasullu atuarfimmit atuarfimmullu isumannaatsumik angalasinnaanerisa qulakkeernissaanut pilersaarut aalajangiilluinnartuusoq kommuni oqarpoq.

Biilertut kigaallannissamut kaammattorneqarput, meeqqallu pisuinnaat ikaartarfiinik atuinissaq eqqaammassagaat kaammattorneqarput:

– Piffimmi biilertutut kigaallanissannik atuartunillu atuarfiup eqqaani angallattunut immikkut eqqummaarinninnissannut kaammattorneqarputit.

– Angajoqqaatut/najortitut meeqqat pisuinnaat ikaartarfiinik pisuinnaallu aqutaannik atuinissamik eqqaasissagitit, peqatigisaanillu ulloq atualerfik sioqqullugu angallanissamik pilersaarut nutaaq meeqqat peqatigalugit misissussagissi kaammattorpatsigit. Taamattaarlu atuariartuussinermi meeqqanillu aallernermi sumi qanorlu sivisutigisumik biilit uninngasinnaanerannut malittarisassat ilisimaarinissaat pingaaruteqarpoq, kommuni allappoq.

Ullormillu atuarfimmit siullermit skolepatruliat aarpaluaartunik / sungaartunik aaqanngnitsullit HHE-p atuarfiullu kiisalu blok 4 aamma 5-p akornanni meeqqat aqqusinikkut isumannaatsumik ikaarnissaannut ikiuuttussat pisuinnaat ikaartarfiini takussaassapput.

Angallannertaaq oqinnerulersinniarlugu atuarfiup eqqaani bussit nutaamik unittarfittaartinneqarnerat kommunip ilanngullugu oqaatigaa. Angallannermut pilersaarut kommunip nittartakkakkut quppernerani erseqqinnerusumik takuneqarsinnaavoq.

Atuarfik Inussuup sananera 600 mio. kr-t sinnerlugit akeqarpoq. Ammarnissaa sivisuumik utaqqineqarpoq, ammarnissaami 2024-mi aasaanerani feeriarnerup kingorna pilersaarutaaqqaaraluarpoq. Ilaatigut atuarfiup qatserisartorqarnermut oqartussanit akuerineqarnissaa ajornartorsiortitsivoq. Kommunip sanaartortitsisumik Ístakimik isumaqatigiissuteqarnerata kingorna sprinklerit ivertissuunneqarput, atuarfillu maanna ammarsinnaalerpoq.