Biilinik inissiisarfimmi nakkutilliisoqalernissaa komuunimit anguniarneqarpoq - aamma unioqqutitsilluni biilinik uninngatitsisarneq akiligassiissutigineqartalissaaq

Nuummi unioqqutitsilluni biilinik inissiisarneq ajornartorsiutaaneruleriartorpoq, maannalu iliuuseqartoqartariaqarluni.

Sanarfinermut Avatangiisinullu Ingerlatsivik kommunimi Teknikkimut Avatangiisinullu Ataatsimiititami politikerinut, taamatut paasissutissiivoq .

– Cykelit aqqutaanni, pisuinnaat aqqutaanni, inuit innarluutillit inissiiviini, biilerfioqqusaanngitsuni kiisalu sumiiffinni allani biilinik uninngaffigeqqusaanngitsuni inissiivigeqqusaanngitsunilu imaluunniit akornutaasarneri pillugit innuttaasunit saaffiginnissutit ataavartut ingerlatsivimmiit tiguneqartarput.

- Taamaammat ingerlatsiviup ulluinnarni ingerlatsineranut, matumani aputaajaanermut aamma upalungaarsimasut aqqutigineqarsinnaanerat ilanngullugit ajornartorsiortitsipput, ingerlatsivik suliamik nassuiaammi ilaatigut allappoq.

Misilittakkat naapertorlugit allagartalersuineq naammanngilaq. Ajornartorsiut aaqqinniarlugu biilinik inissiisarfinni nakkutilliisoqarnissaa ingerlatsivimmik siunnersuutigineqarpoq:

-Naak sumiiffinni arlalinni erseqqissunik allagartalersuisoqaraluartoq, malittarisassat atuuttut kommunimiit ullumikkut atortuutitsilernissamut periarfissaqanngilaq. Tamanna ima paasisassaavoq, malittarisassat erseqqissumik allagartalersugaagaluartut unioqqutitsilluni inissiisarnerit suli piusartut, ingerlatsivik allappoq.

Politikerit pilersaarut akuerissappassuk kommunimi nakkutilliisut biilinik unioqqutitsilluni inissiisunut 510 koruuninik akiligassiisinnaalissapput.

Suliaq immikkoortukkuutaartumik agguataarneqassasoq siunnersuutigineqarpoq. Erseqqissumik unioqqutitsiffiunerpaasartunik, matumani cykelit aqqutaanni, pisuinnaat aqqutaanni kiisalu sumiiffinni allagartalersuinikkut takuneqarsinnaasumik inissiivigeqqusaanngitsuni atortuutilersitsinissaq immikkoortoq siullermi pineqarput.

- Immikkoortup tullia tassaasinnaavoq biilinik inissiisarfinni tamanit atorneqartartuni inissiisarnermut naleqqussaaneq, matumani piffissami killilikkami inissiisarneq ilanngullugu, nalunaarummi allassimavoq.