Borgmesteri inatsimmik uniuisussaanngilaq

Avannaata Kommunia Ilulissani Itisuarsummi takisuunik tummeqqiornermini inatsimmik atuuttumik malinninngitsoq, Sermitsiap juunip 19-ani oqaluttuaraa.

Avannaata Kommuniata kommunalbestyrelsiani illuatungiliuttuni ilaasortaqarnerpaap, Demokraatit, pisoq maanna qisuariarfigaat.

- Killiffiup taamaattussaanera ajoraluaqaaq, Niels Erik Bro Sermitsiamut oqarpoq.

Akuersissuteqartoqanngitsoq

Sermitsiaq suliaq pillugu allagaatinik kommunimut noqqaavoq. Tassanilu paasinarsivoq suliaq nunaminertamik suli akuersissuteqarani aallartinneqarsimasoq. Taamalu iliorneq inatsimmik atuuttumik malinninnginnerusoq, Aningaasaqarnermut Naalakkersuisoqarfiup Sermitsiamut siusinnerusukkut akissutigisaani atuarneqarsinnaavoq.

Taakkua suliaq pillugu oqaaseqannginnertik erseqqissarpaat, inatsisilli atuuttup qanoq innera paasissutissiissutigalugu.

AAMMA ATUARUK:

Kommuni suli akuersissuteqarani tummeqqiorluni aallartittoq

- Inatsimmi paragraf 37 naapertorlugu nunaminertanut oqartussaasunit akuersisoqarsimatinnagu nunaminertaq sunaluunniit nalinginnaasumik atorneqassanngilaq atorneqalissananiluunniit, aamma nunaminertanut oqartussaasunit akuersisoqarsimatinnagu nunaminertap suulluunniit atorneqarnera allanngortinneqassanngilaq, Naalakkersuisoqarfik allappoq.

Nalunaarut issuaaffigisaat tassaavoq pilersaarusiorneq aamma nunaminertat atorneqartarnerat pillugit Inatsisartut inatsisissaannit nalunaarut.

Bro: Inatsit malinneqartariaqarpoq

Niels Erik Brop inatsisit kikkunnit tamanit malinneqartariaqarnerat pingaartippaa. Aamma pisortanit.

- Pisortat inatsisinik malinnittussaapput, tamanna sanioqqussinnaanngilarput. Inatsisit kikkut tamarmik malittariaqarpaat, taanna oqarpoq.

Tamatumanilu aamma borgmesteri toqqaannartumik uparuarneqarpoq.

- Allaat borgmesteri inatsimmik uniuinissaminut piginnaatitsissummik peqanngilaq, Niels Erik Bro oqarpoq.

Akineq ajortut

Kommunip allagaatini Sermitsiamut nassiussaani allaqqavoq, sanaartortoq kommunilu sanaartorneq 2025-imi decembarip 30-anni aallartinneranik isumaqatigiittut. Taamaakkaluartoq nunaminertamut akuersissut aatsaat januaarip arfineq-pingajuani 2026-imi akuerineqarluni tunniunneqarpoq. Sanaartussatilluni, aamma tummeqqanik, nunaminertamut akuersissummik pissarseqqaarsimanissaq piumasaqaataasoq kommunip nittartakkamini nammineerluni allappaa.

AAMMA ATUARUK:

Borgmesterip kommunip tummeraliai qanoq akeqarnersut nalugaa

Taamaattumik Sermitsiap Avannaata Kommunia qanoq ililluni nunaminertamik atuinissaminut suli akuersissummik tunineqarani sanaartornermik aallartitsisinnaanersoq aperaa. Aamma kommuni nunaminertamik suli pissarsinani sanaartorluni aallartinneq inatsisinik atuuttunik malinninnertut isigineraa pillugu aperaa, taamaassimassappat inatsit suna tamatumunnga tunngaviunersoq akineqarnissaanik aamma noqqaavoq.

Apeqqutit taakkua pingasoriarlugit akineqarnissaat tuavisaarutaareeraluartoq kommunimi pisortaaneq borgmesteriluunniit suli akissuteqanngillat. Tamanna Demokraatit naammagisimaanngilaat.

- Suliamik taama ittumik aallartitsisimagaanni ingerlaannaq akisoqarsinnaasariaqarpoq, Niels Erik Bro oqarpoq.

Sermitsiaq apeqqutit akissutissarsiniarlugit suli suliaqarpoq. 

Politikkikkut suliarineqanngitsoq

Suliap aallartinneqarnissaa borgmesterip Lars Erik Gabrielsenip (S), kissaatigisimagaa, sanaartortumik suliakkiissummi, Sermitsiap pissarsiaani atuarneqarsinnaavoq. Tamanna ingerlatsinermik akilerneqassasoq, tassa missingersuusiorneqassanngitsoq, aalajangiunneqarsimavoq. Taamaalilluni suliaq aallartinnginnermini politikkikkut suliarineqanngilaq. Tamanna illuatungiliuttup uggoraa.

- Nunaminertamik akuersissuteqartoqanngilaq aammalu qanoq isikkoqarnissaat pillugu pilersaarummik piviusorsiortumik soqanngilaq. Aningaasartuutit qanoq amerlatiginissaat allaat ilisimaneqanngilaq, Niels Erik Bro oqarpoq.