Kommuni suli akuersissuteqarani tummeqqiorluni aallartittoq

Ilulissani Itisuarsummi tummeqqat, aqqusinermit immap killinganut puttasoqarfissap tungaanoortut, takkajaat, piareeraluttuarput.

Taakkuli suli naammassineqanngitsut, inaarsarneqartulli, kommunimi atorfillit, teknikkimut ataatsimiititaliami ilaasortanut, juunip arfineq-pingajuani ilisimatitsisimasut, kommunip allagaatinik Sermitsiamut nassiussaani allaqqavoq.

Avannaata Kommuniani ingerlatsiviit ilaanni pisortaasup immikkoortortaqarfimmi suleqatini siorna 2025-imi, ulloq decembarip 29-anni, tummeqqiortoqarnissaa pillugu allaffigisimagaa, allagaatini atuarneqarsinnaavoq.

- Sanasunik siunnersortillutit tummeqqat suliaritilereersinnaagunik qujanassaaq. Borgmesterip kissaataaniikkami suliarineqarnissai, ingerlatsiviup pisortaa suleqatiminut suliakkiissummini allappoq. 

Tassa imaappoq, tummeqqat sanaartorneqarnissaat borgmesterip, Lars Erik Gabrielsenip (S), aalajangerpaa. Tamannalu ataatsimiititaliap kommunalbestyrelsilluunniit suliarinikuunngikkaa, Demokraatit sinnerlugit Avannaata Kommuniani kommunalbestyrelsimut aamma teknikkimut ataatsimiititaliamut ilaasortap, Niels Erik Brop, Sermitsiamut siusinnerusukkut oqaatigaa.

Suliakkiineq

Atorfilittap ingerlatsiviup pisortaanit suliakkerneqartup, sanaartortussatut toqqagartik, suliffeqarfiup EJ Sanasut ApS-ip pisortaa piginneqataalu, decembarip 30-ani attaveqarfigaa. Tassa pisortaminit suliakkerneqarnermi aqaguani. Sanaartorneq ulloq taanna aallartinneqassasoq isumaqatigiissutaavoq.

AAMMA ATUARUK:

Borgmesterip kommunip tummeraliai qanoq akeqarnersut nalugaa

- Ilisimatitsinissituut sumiiffissai, sukkoorfissai alakkartereernikuusimavasi taannalu aallaavigalugu suliaq ullumikkut, 30.dec.2025, aallartiinnassagissi isumaqatigiippugut, atorfilittaq sanaartortunut suliakkiinermini allappoq.

Inatsimmut naapertuutinngitsoq

Tummeqqiornermilli suliaq suli nunaminertamik akuerineqarani suliarineqarluni aallartinneqarpoq. Allagaatini Sermitsiap pissarsiaani nunaminertaq tummeqqiorfigineqarnissaminut januaarip arfineq-pingajuani 2026-imi akuerineqarpoq.

Sanaartussatilluni, aamma tummeqqanik, nunaminertamut akuersissummik pissarseqqaarsimanissaq piumasaqaataasoq, Avannaata Kommunia nittartakkamini nammineq allappoq.

Tamanna pillugu Sermitsiaq Avannaata Kommunianut ima apeqquteqarpoq: Qanoq ililluni kommuni sanaartornermik aallartitsisinnaava nunaminertamik akuersissut suli akuerineqaranilu tunniunneqanngitsoq? Kommuni isumaqarpa nunaminertamik suli pissarsinani sanaartorluni aallartinneq inatsisinik atuuttunik malinninnerusoq? Taamaassimassappat inatsit suna tamatumunnga innersuunneqarpa?

Kommuni allaaserisap suliarineqarnerani akissuteqanngilaq.

Sermitsiap Aningaasaqarnermut Naalakkersuisoqarfik inatsisip atuuttup qanoq innera pillugu attaveqarfigaa. Suliaq una ilisimasaqarfiginnginnamikku oqaaseqarfiginngilaat, taamaallaat pilersaarusiorneq aamma nunaminertat atorneqartarnerat pillugit Inatsisartut inatsisissaannik nalunaarummit issuaapput.

- Inatsimmi paragraf 37 naapertorlugu nunaminertanut oqartussaasunit akuersisoqarsimatinnagu nunaminertaq sunaluunniit nalinginnaasumik atorneqassanngilaq atorneqalissananiluunniit, aamma nunaminertanut oqartussaasunit akuersisoqarsimatinnagu nunaminertap suulluunniit atorneqarnera allanngortinneqassanngilaq, Naalakkersuisoqarfik allappoq.

Taamaattumik suliap suliarineqarnera inatsimmut atuuttumut naapertuutinngilaq. Avannaata Kommuniami suliaqartitsilluni aallartinnginnermini nunaminertamik tunineqarluni akuerineqaqqaartussaavoq, uanili pisumi suliassaq aallartinneqareersoq aatsaat nunaminertamik atuinissaq akuerineqarpoq.

Akia ilisimaneqanngilaq

Sermitsiap Itisuarsummi tummeqqiat siornatigut allaaserereerpai. Tummeqqat taakkua kommunimi sanaartugassanut missingersuutinut ilaanngillat. Ingerlatsinermiilli akilerneqassasut, borgmesteri siornatigut oqarpoq. Qanorli akeqarneri Sermitsiamit apersorneqarnermini ilisimannginnerarpai.

- Kisitsisitaqqissaava ilisimanngilara. Kisianni atorfillit nalunngilaat. Taanna ilisimanagu oqaatigisariaqarpara. Kisianni ingerlatsinermik suliarineqarsinnaasutut naliliiffigineqarnikuugamik suliaralugit aallartinneqarnikuupput, Lars Erik Gabrielsen Sermitsiamut juunip aallartinnerani oqarpoq.

Sermitsiaq nunaminertamik pissarsisimatinnani akuersissummilluunniit pisimatinnani sanaartornermik aallartitsisoqarsimanera pillugu kommunimit akissuteqartitsiniarluni suli sulivoq.