Danskit peqqinnissaqarfimmut tapersersuinissaat pillugu isumaqatigiinniarnerit ajornartorsiummik aporfeqarput
Aningaasaqarnermut akileraartarnermullu Naalakkersuisoq, Múte Bourup Egede (IA), aamma aningaasaqarnermut ministeri Nicolai Wammen decembarip aallartinnerani danskit naalakkersuisuisa aamma Naalakkersuisut Kalaallit Nunaata imminut napatinnera pillugu isumaqatigiissutaat pillugu ataatsimiipput. - Isumaqatigiissummi aningaasaliissutit atuutsinneqalernissaannut tunngatillugu ukkatarisarput siulleq tassaavoq piffissaq eqqarsaatigalugu nukingernarnerusoq, tassa danskit peqqinnissaqarfimmut tapersersuinerannut isumaqatigiissutip inissinnissaa, kisianni isumaqatigiinniarnerni suli taanna naammassinngilarput.
Asseq toqqorsivimmit: Leiff Josefsen
Danskit naalakkersuisuisa aammalu nunatsinni Naalakkersuisut Kalaallit Nunaanni atugarissaarnerulernermik inuiaqatigiillu aningaasaqarnikkut imminnut napatittut pilersinniarnerani kivitseqataasussanik sinaakkutitut isumaqatigiissutaat, aningaasanngorlugu 1,6 milliardit koruuninik naleqartup iluani, immikkoortut arlallit isumaqatigiinniarnikkut inissinneqartussaapput.
Tassunga atatillugu aningaasaqarnermut akileraartarnermullu Naalakkersuisoq, Múte Bourup Egede (IA) aamma aningaasaqarnermut ministeri Nicolai Wammen (S) decembarip sisamaanniit qulingiluaata tungaanut isumaqatigiissutip aningaasaqarnikkut immikkoortui oqaluuserivaat.
Isumaqatigiissutip peqqinnissaqarfimmut tunngasortaa suli inissinneqanngilaq
- Isumaqatigiissutip immikkoortui tamarmik pingaaruteqarput aningaasaqarnikkullu isumaqatigiissutinik tigussaasunik malitseqartussaalluni, kisianni piffissaleriigaanera pillugu siulliullugu Danmarkip peqqinnissaqarfimmut tapersersuinerulernissaa siulliullugu sammisimavarput, tassani isumaqatigiissutigineqarpoq Danmarkip siunissami kalaallit napparsimasut Danmarkimi napparsimmavinni katsorsarneqartarnerannut aningaasartuutit akilertassagai, isumaqatigiissullu taanna atuutilissaaq januaarip aallaqqaataani 2026-mi, Múte Bourup Egede oqarpoq nangillunilu:
- Kisianni Kalaallit Nunaata Danmarkillu akornanni paasinnittaaseqarnikkut ajornartorsiummik nalaataqarpugut, taamaattumik suli sinaakkutitut isumaqatigiissutip immikkoortua taanna suli isumaqatigiissutigineqanngilaq. Sapaatip akunneri marluk matuma siorna oqaloqatigiinnerit ingerlappagut, isumaqatigiissutip sinaakkutissaasa pilersinneqarnissaat siunertaralugu, kisianni suli aaqqiissutissat arlallit amigaataapput, taamaattumik isumaqatigiissut suli inissinneqanngilaq, taamaammallu isumaqatigiinniarnerit suli ingerlapput, aningaasaqarnermut Naalakkersuisoq naqissusiivoq.
Suna pillugu isumaqatigiinngittoqartoq ersarissumik nassuiarsinnaaviuk?
- Tassunga tunngaviuvoq, Naalakkersuisut aamma Danmarkimi naalakkersuisut qinigaaffiup siuliani aningaasatigut isumaqatigiissuteqarnikuunerat peqqinnissaqarfimmut tunngassuteqartumik.
- Isumaqatigiissut taanna Danmarkimit isumaqarfigineqarpoq nutaamik isumaqatigiissummi ilanngaatigineqassasoq, kisianni uagut isumaqarpugut isumaqatigiissutit taakku marluk isumaqatigiissutaasut assigiinngitsut, tamarmik peqqinnissaqarfiup sullissineranut qaffassaataasussaapput aap, kisianni uagut isumaqarpugut isumaqatigiissutit taakku marluk assigiinngitsutut isumaqatigiissutaasut, Múte Bourup Egede akivoq.
Isumaqatigiinngissutinngortoq tassaavoq danskit naalakkersuisuisa danskit 2025-mut aningaasanut inatsisaannut, immikkut ittumik 140 millioner koruuninik nunatsinni peqqinnissaqarfimmut atugassanngortillugit aningaasaliinerat piffissami 2025-miit 2028 nunatsinni peqqinnissaqarfimmut atugassanngortinneqarsimasut, taamanikkut peqqissutsimut naalakkersuisuusup Mimi Karlsenip saaffiginnissuteqarneratigut danskit peqqissutsimut ministeriata iliuuseqarfigisimasaa.
Naatsorsuutigaat piffissaliussat sinaakkutitut isumaqatigiissummiittut malinneqassasut
Isumaqatigiinngissutaasoq pisariorpasippoq, Danmarkip peqqinnissaqarfimmut tapersersuinerata annertusinerata aallartinneqarnissaa 1. januar 2026-imi pisussaavoq, ulloq nallertinnagu isumaqatigiissinnaassavisi, taamaassanngippallu isumaqatigiissutigigineqartoq atuutsinneqalersinnaava, aamma aningaasaliissutit suli inissinneqanngikkaluarpata?
- Isumaqarpunga sinaakkutitut isumaqatigiissummi piffissaliussaq malinneqassasoq, uagutsinnullu pingaarnerpaavoq qulakkiissallugu peqqinnissaqarfiup sullissinerata pitsanngorsarnissaanik isumaqatigiissutaasup malinneqarnissaa, aamma nunatsinni nammineerluta suliarisinnaanngisatsinnik Danmarkimut suliaritikkiartortartunut aningaasartuutit Danmarkip matussusertalissagai pillugit isumaqatigiissut naapertorlugu.
- Taamaammat, aap, qularutiginngilara piffissaliussaq malinneqarumaartoq, suli isumaqatigiissuteqanngikkaluarluta sinaakkutitut isumaqatigiissutip piviusunngortinneqarneranut tunngatillugu, aningaasaqarnermut akileraartarnermullu naalakkersuisoq, Múte Bourup Egede (IA) naggasiivoq.
