Greenland Airportsip nassuerutigaa 400 millionit koruuninik kukkussuteqarsimanini – naalagaaffiup tapiissutai kukkusumik allassimasut

Danskit naalagaaffiata Greenland Airports International sanaartornermut tapiissutinik 400 million koruuninik siorna tapiiffigaa.

Aningaasat Ilulissani mittarfiliornermut atorneqartussaapput, ingerlatseqatigiiffiullu utertittassanngilai.

Taamaakkaluartoq Greenland Airportsip 2025-mut naatsorsuutaani naalagaaffiup tapiissutai akiitsunut ilanngunneqarsimapput.

Taamaattumik naatsorsuutit ilaata tamatuma takutippaa ingerlatseqatigiiffik 400 millioninik akiitsoqarnerulersimasoq — kisitsisillu ukiumummi nalunaarusiami pingaarnerit, marluk piviusunut sanilliullugit 400 millioninik amigartooruteqarsimapput.

Qanoq ililluni taama pisoqarsinnaava?

– Excelimi kisitsisit kukkusumik ataqatigiinnerat pissutaalluni taama pisoqarsimavoq. Soorunami taamatut kukkusoqartussaanngikkaluarpoq, aningaasaqarnermut pisortaq Per Stjærnholm Trærup Sermitsiamut oqarpoq.

Aningaasat taama amerlagaluartut ukiumoortumik nalunaarusiami, kukkuneq aqutsisunit, siulersuisunit kukkunersiuisunillu paasineqarsimanngimmat ataatsimeersuarnermi juunip 19-ani 2026-mi akuerineqarpoq.

Sermitsiap kukkusoqarsimaneranik paasinnilernerata kingorna aatsaat, kukkusoqarsimasoq ingerlatseqatigiiffiup paasigaa, aningaasaqarnermut pisortaq oqarpoq.

– Imminut appisaluuppunga tamanna takusimannginnakku, aningaasammi takuneqariaannaagaluarput. Oqaatigiuminaappoq sooq tamanna malugineqarsimannginnersoq. Sukkavallaamik pisoqarsimassaaq, aningaasallu sumiiffianni eqqortumik allassimanersut arajutsisimallugit, Per Stjærnholm Trærup oqarpoq.

Aningaasat tapiissutigineqartut aningaasanut taarsigassarsianut ilanngunneqartut

Soorlu oqaatigineqareersoq kukkuneq 400 million koruuniusoq, ingerlatseqatigiiffiup ukiumoortumik nalunaarusiaani aningaasat ingerlaarnerinik – aamma aningaasanik kaaviiaartitanik taaneqartartunik – naatsorsuinermiippoq.

Ingerlatsinermut, aningaasaliinernut aningaasalersuinermullu attuumassuteqarnersut, aningaasat ingerlaarneranni nalunaarusiami ersersinneqartariaqarpoq ukiup ingerlanerani aningaasat qanoq ingerlaarnersut.

AAMMA ATUARUK

Sanaartornermik suliaqartoq Greenland Airportsimut isumaqatigiisitsiniartarfimmut suliamik suliassanngortitsivoq – 258 millionit koruuninik piumasaqartoq

Ukiumoortumik nalunaarusiami 400 millionit koruunit ingerlatseqatigiiffiup tigusai immikkoortinneqanngillat. Taamaasillunilu Sermitsiamit kukkuneq nassaarineqarpoq.

Paasinarsivoq aningaasat taakku taarsigassarsianut “Sivisuumik atugassaqarnermut akiitsut”-nut ilanngunneqarsimasut, katillugit 1,2 milliarder koruuninik naleqartut.

Taamaalilluni Greenland Airportsip aningaasat assigiinngitsut marluk ataatsimut nalunaarsorpai: taarsigassarsiat ingerlatseqatigiiffiup utertitassai tapiissutitillu ingerlatseqatigiiffiup tigummiinnagassai.

Aammattaaq 400 millionit nalunaarsuiffimmut kukkusumik nalunaarsorneqarput. Tapiissutit immikkoortuannut nalunaarsorineqartussaagaluarlutik, aningaasat taakku aningaasaliisussarsiornermi isertitanit nalunaarsorneqarsimapput.

Aningaasat suli naatsorsuutiniisinneqartut

Tassa 400 millionit koruunit kukkusumik inissinneqarsimapput naatsorsuutinilu eqqunngitsumik allassimallutik, taamaalillunilu piginnittunut tamanillu takujuminaatsumik inissisimallutik.

Kukkuneq Greenland Airportsip ukiumut angusanut, nammineq aningaasaatinut ingerlatseqatigiiffiulluunniit aningaasaateqarnerata ineriartorneranut tamakkiisumik sunniuteqarnavianngitsoq, ingerlatseqatigiiffik erseqqissaavoq.

Imaanngilarli aningaasat tammarsimasut imaluunniit Greenland Airports siornatigornit piitsuunerulersimasoq.

– Isumaqarpugut pisup ilungersunassusaa ima annertutiginngitsoq allaat nutaamik naatsorsuisitsisariaqassalluta, aappaagumiilli ukiumoortumik nalunaarusiami kisitsisit iluarsissavavut, Per Stjærnholm Trærup oqarpoq, taannalu Kalaallit Nunaanni Kukkunersiuisut isumasioqatigereerlugit taamatut aalajangerpoq.

Greenland Airportsip naqqiinissamik pilersaarutaata assilinera Sermitsiamut nassiuppaa. 400 millionit koruunit taarsigassarsianit ilanngaatissatut immikkoortinneqarput namminnerlu immikkoortumut ilanngunneqarlutik, immikkoortorlu taanna naatsorsuutini eqqortumik inissinneqarluni.

Aamma kukkuneq alla tamatumunnga attuumassuteqartoq Sermitsiami allaaserisami tulliuttumi sammineqassaaq.

Greenland Airportsip assingusunik maanna siunissami ajornartorsiummik, nalaataqannginnissani sulissutigileraa, Per Stjærnholm Trærup neriorsuivoq.

- Taama pisoqaqqinnginnissaa qulakkeerniarlugu piareersimalluinnarpugut.

Aaqqissuussaanissinni naammattumik piginnaaneqarpisi, imaluunniit suli iliuuseqarnerusariaqarpisi?

- Naliliisariaqarpugut, kisianni takusinnaavat aningaasaqarnermut nakkutilliisussamik sulisussarsiortugut, neriuppugut qanittukkut tamatumani, nukittunerulerumaartugut, aningaasaqarnermut pisortaaneq oqarpoq.