Ilisimatusarfik rektorip tullianik atorfinitsitsisoq

Ilisimatusarfiup siulersuisuisa ilinniarfiup prorektorissaa, tassa rektorip, Mari Kleistip, tullersortissaa, atorfinitsippaat.

Meeqqat atuarfii pillugit ilinniagartooq, ph.d-mik tunuliaqutaqartoq, Mitdlarak Lennert, Ilisimatusarfimmi oktobarip aallaqqaataanit prorektorinngussaaq. Ilisimatusarfik tusagassiorfinnut taama nalunaarpoq.

AAMMA ATUARUK:

Timmisartup aquttarfianiit ilisimatusartut silarsuaannut

Mitdlarak Lennert Ilisimatusarfimmi takornartaanngilaq. Mitdlarak Lennert Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaqarfimmi maanna adjunktiuvoq. Ilisimatusarfimmi 2021-imi ph.d.-nngoreernerminit ilisimatusarnermut, ilinniartitsinermut Ilisimatusarfimmilu ilinniakkanik ineriartortitsinermut tapersiisartuusoq, Ilisimatusarfik allappoq. 

Rektori: Ilinniarfik nalunngilluarpaa

Rektorip Mari Kleistip atorfinitsitsineq nuannaarutigaa.

- Midtlarak Lennert pikkorissuullunilu siumut isiginneriaaseqartuuvoq, suliatigut nukittuumik piginnaasaqarpoq Ilisimatusarfillu ilisimasaqarluarfigaa. Ataqatigiittuartitserusuttuullunilu nutaanngorsaarusuttuuvoq, Ilisimatusarfiullu ilinniartunut, sulisunut inuiaqatitsinnullu iluaqutaasumik inerisarneqartuarnera pillugu suleqatigilernissaanut qilanaarpugut, rektori tusagassiorfinnut nalunaarummi allappoq.

Mitdlarak Lennertip prorektorinngornissaminut ikaarsaarnermini semesterimi uani Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaqarfimmi suliassani ilinniartitsinermut pisussaaffinnullu allanut tunngasut suli isumagalugillu naammassissavai, Ilisimatusarfiup aamma ilisimatitsissutigaa.