Ilisimatusartoq milliardilinnik amigartooruteqartoqareersoq: Mianersorfissat tamarmik takuneqarsinnaapput

Greenland Airports 2025-mi 2,7 milliardit koruuninik amigartooruteqarpoq. Suliffeqarfik tusagassiuutitigut nalunaaruteqarluni ima eqqissisaavoq:

Annikillilerinerit naatsorsuutini teknikkikkut nalinginik iluarsiinermut taamaallaat takussutissaapput aammalu taakkua nunap karsiata aningaasaqarneranut imminerminni sunniinatik.

Oqaatsit eqqortuugaluartut inuiaqatigiit aningaasanik annaasaqarujussuarnerannut aamma tunngassuteqarput.

Inuiaqatigiit pillugit ilisimatusartup Ilinniarfissuarmilu professoritut soraarnerup Birger Poppelip taamatut nassuiarpaa. Annikilliliinerulli oqaasertalernera isoraa:

- Illu millioninik nalilik sanasimagukkumiatagooq, tuninialerakkuli millionit affaannaannik naleqartoq paasigakku ima oqaruma assigiinnarpaa: Qanoq akiliisimanersunga soqutaanngilaq, taamani taamatut naleqarpoq, Birger Poppel oqarpoq.

Birger Poppelip Greenland Airportsimi maanna aqutsisut annikilliliinernut annertuunut pisuutinngilai, mittarfiliortiternialersaartoqaqqaalermalli assigiinngitsut mianersoqqussutigineqarnikuunerat eqqaamassallugu pingaaruteqartoq oqaatigaa. Nammineq, suleqatai Aningaasaqanermut siunnersuisoqatigiit mianersoqqusinikuupput, soorluttaaq siunnersuisoqatigiit mittarfiliortiternissaq pillugu 2018-imi aamma nalunaarusiornikuullutik.

AAMMA ATUARUK

Greenland Airports milliardinik amigartooruteqartoq – Naalakkersuisut sakkortuumik isornartorsiuipput

Siunnersuisoqatigiit mittarfiit ataatsikkut sananagit tulleriiaarlugit sanaartorneqarpata aarlerinaateqarsinnaasut annikillisinneqarsinnaanerat taamani tikkuarpaa. Qaqortumi mittarfik imminut akilersinnaanavianngitsoq, Ilulissanilu mittarfimmut naatsorsuutit aamma nangaassutigineqarnerat taamani tikkuarneqarputæ.

- Mianersoqqussutit tamarmik takuneqarsinnaapput, Birger Poppel oqarpoq.

3,7 milliardinik annikilliliineq

Greenland Airportsip 2025-mut naatsorsuutai saqqummiunneqarmata timmisartuutileqatigiiffiup tamanna saqqummiuppaa.

Ilulissani mittarfik 1,77 milliardit koruuninik annikilliliivigineqarpoq. Nuummi mittarfik 824 millionit koruuninik annikilliliivigneqarpoq, Qaqortumilu mittarfiliornermut katillugit 1,1 milliardit koruunit sanaartornermut aningaasartuutit maannamut annikilliliivigineqarput.

Tassa katillugit 3,7 mia. koruuninik annikilliliisoqarpoq. Aningaasat mittarfiit sanaartorneranni aningaasat atorneqartuniit nalikinnerupput.

- Naatsorsuutini teknikkimut tunngasuunerarlugu taaneqarsinnaavoq, kisianni aamma politikkikkut piviusut aallaaviginagit aalajangiinerup kinguneratut taaneqarsinnalluni. Tassami politikerip arlaannaataluuniit aningaasat allanut atorneqarsinnaagaluarnerat tusarusunnavianngilaat, Birger Poppel oqarpoq.

Politikerit allaffissortullu ilinniarfigiumaaraat neriuutigaa

Aningaasaqarnermut Siunnersuisoqatigiit taamanikkut tikkuanera assigalugit, aningaasat mittarfinnut atorneqareerpata inuiaqatigiinni aningaasaliissutinut allanut atorneqarsinnaannginnerat paasissallugu pingaaruteqartoq tikkuarpaa:

– Aalajangiineq allanngortinneqarsinnaanngilaq. Aningaasaqarnermut Siunnersuisoqatigiinnit taamani aamma naqissusernikuuaat. Aningaasat atorneqareerput, Birger Poppel oqarpoq.

Politikerit allaffissornerullu mittarfiit nutaat pillugit suliaq ilinniarfigissagaat, soorlu Namminersorlutik Oqartussat sanaartornermut milliardilikkaanik aningaasaliissuteqarniartillugit eqqaamaneqartarumaartoq neriuutigaa. Sanaartukkat mittarfiliornernitut nalillit.

Nuup eqqaani erngup nukinganik nukissiorfiup allilerneqarnissaa pivaa. Aasiannut Qasigiannguanullu pilersuisussamik erngup nukinganik nukissiorfiliornissaq politikkikkut aalajangerneqartoq.

Ilisimatusartulli aamma eqqarsarnartoqartippaa:

- Politikkikkut allaffissornikkullu misilittakkat aallavigalugit ineriartortitsisoqarlunilu pitsaasunik suleriuseqartoqarnissaa qulakkeerneqarsimarpasinngilaq, Birger Poppel oqarpoq.