Inatsisitigut ataataqanngitsut Danmarkimi taarsiivigeqqunerisa pisoqalisinnaanerat atorunnaarsinneqartoq
Inatsisitigut ataataqanngitsut eqqartuussivikkoorlugu taarsiivigeqqunerat, suliakkiussinerannit ukioq manna decembarip aqqarngani pisoqaavallaalinngitsunut tunngasut, suli atuuppoq. Inatsisitigut ataataqanngitsut allat 26-t eqqartuussivilersuussinerat suli ingerlatillugu taamaassinnaatitaalerput.
Inatsisitigut ataataqanngitsut sinnerlugit oqaaseqartartup Klaus Frederiksenip ilani sinnerlugit oqalugiareerluni ministeriuneq Mette Frederiksen 2023-mi tikeraarnerani ilassigaa.
Assi: Leiff Josefsen
Danmarkimi Isumaginninnermut Ineqarnermullu ministereqarfiup inatsisitigut ataataqanngitsut ilaqutariittut inuunissamut pisinnaatitaaffimminnik unioqqutitsivigineqarnerminnik taarsiivigeqqunerisa pisoqalisinnaanera ministeriaqarfiup atorunnaarsippaa.
Taama isumaginninnermut ineqarnermut ministeriaqarfik tusagassiuutitigut nalunaarummi allappoq.
Inatsisit naapertorlugit ukiut pingasut qaangiukkaangata suliakkiussaq atorunnaarsinneqartarpoq. Tassalu inatsisitigut ataataqanngitsut 26-t 125.000 koruuninik taarsiivigineqarnissamik piumasaqarneranniit ukiut pingasut qaangiussimalerput. Taakku Kalaallit Nunaata kitaani najugallit 1963 sioqqullugu, nunallu sinnerani 1974-ip kingorna, qallunaat pisinnaatitaaffigisaattuut ataatamik kinaanerata paasisinnaatitaanngilaat.
Taarsiivigineqarnissamilli piumasaqaataat itigartinneqarpoq, taamaattumillu suliaq Østre Landsret-imi 2026-mi ukiakkut suliarineqassalluni.
Atorunnaarsitsineq inatsisitigut ataataqanngitsut allat taarsiivigeqqunerminnik piumasaqaataat atuutiinnarnissaannik kinguneqarpoq. Tassa eqqartuussinerup ingerlanerani atuutiinnarsinnaanngorluni.
Amerlanerit ilannguttut
Inuit 26-t taarsiiffigineqarnissaminnik 2022-mi suliakkeereernerisa kingornat allat aamma ilanngunnikuupput.
Piumasaqarneranniilli piffissaq sivisuallaaq qaangiuppat suliassanngortitsinerat pisoqalivallaarluni atorunnaarsinnaagaluarami.
Eqqartuussivilersuussisut 26-t pillugit suliaq naammassineqartinnagut, taakku sinnerisa suliakkiussinerat atorunnaarsinneqarunnanngitsoq ministeriaqarfik tusagassiuutitigut nalunaarummi allappoq. Aamma eqqartuussiviit qullersaanni suliarineqalissagaluarpat.
Pisoqalisinnaajunnaarsitsineq sulianut 2025-mi decembarip aqqarngani qaangiuttussaanngitsunut atuuttoq ministereqarfik allappoq.
