Inerteqquteqarneq pillugu innuttaasut isumaat: Meeqqanut iluaqutaavoq, imerniartarfinnulli aamma kinguneqarpoq

Sarfaq Ittuk kujammut aallartinnagu Nuummi umiarsualivimmi angalasussat nalinginnaasumik marlunngornermi ullaakkut ingerlaarput. Inuit eqitaartuupput, kuffertit uniarneqarput, taaskillu oqorutinik imallit tuuaarlu ataaseq umiarsuarmut usingiarneqarput.

Sunali tamarmi pisarnermisut inngilaq. Kommuni Kujallermut angalasunut pissutsit allaanerulluinnarput, tassami kommunip imigassamik tuniniaanissaq sassaalliisarnerlu tallimanngormat inerteqqutigilerpaa.

Kujammut angalasut ilagaat Jens Jørgen Frederiksen, Qaqortumut sulinngiffeqarluni angalasoq.

- Imertartunut artornarsimassaqaaq, immaqa sapaatip-akunnerata naanera eqqissisimanerulissaaq, oqarpoq.

Taanna allallu arlallit imigassamik inerteqquteqalerneq pillugu isumaannik apersuivugut, aamma tamanna ajunngitsuunersoq ajortuunersorlu paaserusupparput.

- Angajoqqaat aamma eqqarsaatigineqartariaqarput

Jens Jørgen Frederiksen Qaqortumi inunngortoq najugaqarnikorlu Aasianni ullumikkut najugalik, imigassamik aalakoornartortalimmik nioqquteqarnerup inerteqqutaalernera pitsaasuusoq isumaqarpoq.

- Aap, tamanna pitsaasuuvoq — aamma allanut imigassamik atuisuunngitsunut, inissiarsuarni najugaqartunut soorunamilu meeqqanut, taanna oqarpoq.

Meeqqat atugarissaarnerat pissutaanerpaasimagunarpoq kommunip imigassamut inerteqqutiginnilerneranut. Inerteqqut tallimanngormat unnukkut atuutilermalli, Kommune Kujallermi borgmesteri Malene Vahl Rasmussen (D) nassuiaavoq kommuni sulianik pipallatanik artukkeqqasoq, taamaattumillu sakkortuumik iliuuseqarnissamut allamik periarfissaqanngimmat tamanna anguneqartariaqartoq.

- Aaqqissuussaanitsinni pinaveersaartitsinermik suliaqarnissamut assaat naammattut piginngilavut, iliuuseqarnerit taamatullu pinartunik suliaqartarnerit piujuarmata. Angerlarsimaffiup avataanut inissiinermut aningaasartuutit amerliartuinnarput, aamma paasivarput inissiinerni amerlasuuni iliuusissatut pilersaarusiortoqarneq ajortoq — tamanna aningaasaqarniarnermik aningaasaqarniarnikkut ajornartorsiornermik pissuteqarpoq, borgmesteri aviisimut ataasinngornermi ullaakkut oqarpoq.

Naak inerteqquteqarneq meeqqanit maannakkorpiaq iluaqutaagaluartoq, allatigut ilaneqartariaqartoq, Jens Jørgen Frederiksen isumaqarpoq.

- Angajoqqaat ikiunngikkutsigit iluaqutaanavianngilaq. Aammattaaq imerajuttut angajoqqaallu mikisunik meerallit eqqarsaatigisariaqarput, taanna oqarpoq.

Inerteqqut tamanna qanoq sivisutigisumik atuutissasoq naatsorsuutigaajuk?

- Naluara iluaqutaanersoq qaqugulu ammaassisoqaqqissanersoq, neriuppungali qanittukkut ammaassisoqassasoq. Inuppassuimmi nerinermi iggiseqartarput – taamaattumik neriuppunga taama sivisutigisumik matoqqassanngitsut, Jens Jørgen Frederiksen oqarpoq.

Imerniartarfinnut sunniutai

Sarfaq Ittummi ilaasussaq alla tassaavoq Ungaaq Lundblad. Taanna Paamiunukassaaq Nanortalimmiuuvorli. Billetsinik misissuisarfimmi utaqqisuni tulleriaartut ilaanniittoq Sermitsiaq AG-mit oqaloqatigineqarpoq.

- Eqqumiilaarpoq, aatsaavissuarmi matusisoqartoq takuara, oqarpoq.

Jens Jørgen Frederiksenip isummernera assigalugu imigassamik inerteqquteqarnerup periarfissarititai Killissarititaalu taassuma takusinnaavai, kommunimi ajornartorsiutit aaqqiivigineqarallarneranik taama isiortoqarpoq. Taanna nammineerluni isumaginninnermut tunngasunik suliaqartareersimalluni oqarpoq.

- Imigassartorpallaartut sivisuumik imigassartorsimanngikkaangamik ajornartorsiulertarput. Kisianni meeqqat nuannaalersarput — tamanna nalunngilara, akivoq.

Utaqqisut ungasinngisaanni John Ezekiassen nikuilluni pujortataarpoq. Qaqortumut suliartorluni taanna angalavoq. Imigassamik inerteqquteqarnerup kommunip nammineq kissaatigisimappagu ajoquteqanngitsoq, taanna isumaqarpoq.

- Tassami inuit taqqavani namminneq qinnutigisimavaat, taamaattumillu akuerineqarnera pissusissamisoorpoq, oqarpoq.

John Ezekiassenilli maluginiarpaa inerteqqut tamanna aamma kinguneqarsimasoq.

- Imerniartarfiutilik tamanna ajuusaarnarpoq, taakkumi aamma eqqorneqarput, imigassanik atuisut kisimik eqqugaanngillat, oqarpoq.

Imigassamik inerteqquteqarnerup qaqugu atorunnaarsinneqarnissaa suli aalajangerneqanngilaq, Kommune Kujallermi borgmesteri oqarpoq siunissaq ungasinnerusoq eqqarsaatigalugu tamanna aaqqiissutaanngitsoq. Inerteqquteqarnerup qanoq sivisutiginissaa eqqarsaatigalugu, John Ezekiassenip eqqorinaruminaatsippaa.

Qaqortumi ulluinnarni najugaqanngilatit, taamaakkaluartorli inerteqqut tamanna qanoq isumaqarfigissaviuk?

- Ajunngilaq, qaqutiguinnaq imigassartortarpunga, taamaattumik uannut sunniuteqanngilluinnarpoq, John Ezekiassenip akivoq.