Innuttaasut oqaluuserisassanngortitsisinnaanissaat tapersersorneqarpoq – Mianersorfissaqarporli

Innuttaasut piffissami aalajangersimasumi atsiornernik katerseriarlutik Inatsisartunut toqqaannartumik suliassanngortitsillutik siunnersuuteqarsinnaalernissaat qanilliallappoq.

Oqaluuserisassaq Naalakkersuisut aaqqissuussinermik pilersitseqqullugit peqquneqarnissaannik aalajangiiffigisassaq Pipaluk Lyngemit (IA) sisamanngornermi juunip aqqarnganni saqqummiunneqarmat Inatsisartut oqaluuserivaat.

Qulequtaq tamat oqartussaaqataanerannik nukittorsaataassasoq Inatsisartuni partiit isumaqataaffigaat, mianersorfissaqartorli Siumut isumaqarpoq.

- Innuttaasut siunnersuuteqarsinnaalernerat nuannareqqusaarnertut atorataannaavoq, taamatullu suliniaqatigiiffiit innuttaasullu ataasiakkaat soqutigisatik aallaavigalugit periarfissamik atorluaaniarnissaat aamma mianernartoqarluni, Erik Jensen (S) oqarpoq.

Siumut: Mianerisassaqarpoq

Siumut isumaqarpoq suliniaqatigiiffiit inuinnaallu ataasiakkaat soqutigisatik aallaavigalugit siunnersuuteqarsinnaanissaat mianerisassaqartoq.

- Qinigaasut oqartussaaffigisaat sanioqqullugillusooq, politikkikkut oqallinnerit piginnaatitsissutit qaangerlugit pinngitsoortinnaveersaarnissaat aamma pingaartuuvoq oqaatigissallugu, Erik Jensen oqarpoq.

AAMMA ATUARUK

Innuttaasut oqaluuserisassanngortitsisin-naanissaat oqallisigineqalerpoq

Siumup nunaqarfiit illoqarfiillu ikitsunik innuttaqartut illoqarfissuarni amerlasuunik innuttaasoqartunut oqimaaqatigiissarnissaat pingaartutut isigalugu oqariartuutigaa.

Atsiornernik katersisinnaaneq periarfissaareersoq

Siumup massakkut periarfissaareersoq atsiornernik katersisinnaaneq, innuttaasullu siunnersuuteqarniarlutik atsiornernik katersisinnaalernissaasa assigiinngissusaat apeqquserpaa.

Inatsisartuni ilaasortanit amerlanerussuteqartunit suli nalunaaquttamut tunngasoq aalajangiiffigineqanngitsoq tikkuarpaa.

Nalunaaquttat ingerlaaqatigiiffiisa allanngortinnissaanut innuttaasut atsiornernik katersisimanerat, atsiornerillu 3000-init ikinnerunngitsut tunniunneqarsimalerneranni nalunaaquttat ingerlaaqatigiiffii aammaarlugu Inatsisartuni oqallisigineqalersoq.

- Kinguarsarneqarporli suli. Taamaattumik aamma piniakkanut killilersukkanut tunngatillugu siunnersuuteqartoqarpat Inatsisartut maani tusaassavaat? Tassa taanna apeqquterujussuaq, Erik Jensen oqarpoq.

Ataatsimiititaliamut ingerlateqqinneqarpoq

Siunnersuut Inatsisartuni partiinit tamanit taperserneqarluni, siunnersuutip aappassaaneerneqartinnagu taamatut isikkoqartillugu Inatsisartuni inatsisinut ataatsimiititaliamut ingerlateqqinneqarpoq.

Innuttaasut siunnersuuteqarsinnaalernissaannut aaqqissuussineq qanoq isikkoqassanersoq, suut mianersuunneqassanersut, qanorlu ingerlariuseqartoqassanersoq Inatsisartut inatsisinut ataatsimiititaliaanni siunnersuutip aappassaaneerneqannginnerani eqqartorneqassaaq.