Jens Napãtôᴋ': - Qaanaami isumaqatigiissut iluatsinngitsoq ilinniarfiusariaqarpoq

Qaanaami innuttaasunik pitsaanerusumik sullissinissaq siunertaralugu, peqqissaaviup aamma utoqqaat illuata qanimut suleqatigiinnissaat, Avannaata Kommuniata Naalakkersuisullu 2020-mi isumaqatigiissutigaat. Kisiannili isumaqatigiissut utoqqaat illuani sulisunut utoqqarnullu annertuumik nanertuutaalersimasoq paasinarsimmat isumaqatigiissut atorunnaarsinneqassasoq, Avannaata Kommuniani kommunalbestyrelsip marsip 27-ani aalajangiuppaa.

Qaanaami isumaqatigiissummut pineqartumut assingusumik Qeqertarsuarmi Peqqissaaviup aamma utoqqaat illuata akornanni suleqatigiinnissamik isumaqatigiissusiortoqarnissaa siunertaralugu, Peqqissutsimut inunnullu Innarluutilinnut Naalakkersuisoq, Anna Wangenheim, Demokraatit, aamma Kommune Qeqertalimmi borgmesteri Simigaq Heilmann, Demokraatit, marsip 13-iani atsioqatigiipput. Isumaqatigiissut taama ittoq innuttaasunik sullissinerup ajorseriarneranik kinguneqartoq takussutissaqarmat, Qaanaami pisut ilinniarfigalugit, Qeqertarsuarmi isumaqatigiissut unitsinneqartariaqartoq, Avannaata Kommuniani 1. viceborgmesteri aamma Inatsisartuni ilaasortaq, Jens Napãtôᴋ', Naleraq, isumaqarpoq.

Kaammattuisoq

Qaanaami isumaqatigiissut pineqartoq pissutigalugu, utoqqaat illuani sulisut suliassamik qaavatigut napparsimasunik sullissisalerput, tamatumalu kingunerisaanik annertuumik artukkerneqarsimasut paasinarsivoq. Taamaattumik utoqqaat illuani najugaqartut atugaasa illersorneqarnissaat, minnerunngitsumillu sulisut atugaasa illersorneqarnissaat siunertaralugu, isumaqatigiissut unitsinneqartoq, Jens Napãtôᴋ' erseqqissaavoq.

- Qaanaami isumaqatigiissut ajoraluartumik iluatsissimanngilaq, taannalu ilinniarfiusariaqarpoq. Ilisimasagut naapertorlugit Qeqertarsuarmi utoqqaat illuat sulisussaaleqivoq. Sulisullu artorsinneqassanngippata Qaanaami isumaqatigiissummut assingusumik Qeqertarsuarmi isumaqatigiissusiortoqarnissaa innersuunnanngilaq.

- Taamaattumik Qeqertarsuarmi peqqissaaviup utoqqaallu illuata akornani suleqatigiinnissamik isumaqatigiissusiortoqarnissaanik suliniutip unitsinneqarnissaa kaammattuutigaara, taanna oqarpoq.

Kommune Qeqertalimmi borgmesteri Simigaq Heilmann, Demokraatit, pineqartoq pillugu oqaaseqartinneqarsinnaasimanngilaq.

Sullissineq pitsaanerusoq

Patajaannerusumik ataqatigiissaarinissaq Qeqertarsuarmilu innuttaasut maannakkornit pitsaanerusumik neqeroorfigineqarnissaat suleqatigiinnissamik isumaqatigiissuteqalersaarnermi siunertaasoq, Anna Wangenheim oqarpoq.

- Illoqarfinni minnerni immikkoortortaqarfiit suleqatigiinnerulernissaannut patajaallisaanerusariaqarlutalu immikkoortortaqarfinnik allanik suleqateqanngippallaarnermiit ilorraap tungaanut ingerlasariaqarpugut.

- Peqqinnissaqarfimmi kommunimilu sulisut suliatigut piginnaasaasa eqqumaffiginerunerisigut, neqeroorutinik innuttaasunut iluaqutaasussamik kinguneqarluartussamillu ataqatigiissaarilluarnerulersinnaavugut, Peqqissutsimut inunnullu Innarluutilinnut Naalakkersuisoq oqarpoq.

Siorna septembarip 15-iat aallarnerfigalugu Qeqertarsuarmi Peqqissaaviup ingerlanneqarnera allannguiffigineqarpoq. Allannguinermut atatillugu peqqissaavik nalunaaqutaq sisamanut matusalerpoq.

Nalilersorneqartariaqartoq

Avannaata Kommuniani misilittagaareersut tunngavigalugit, Qeqertarsuarmi Peqqissaaviup aamma utoqqaat illuata akornanni suleqatigiinnissamik isumaqatigiissusiortoqarnissaa nalilersorneqartariaqartoq, Kommune Qeqertalimmi kommunalbestyrelsimi ilaasortaq, Aqqa Jensen, Siumut, Qeqertarsuarmi najugaqartoq, oqarpoq.

- Qeqertarsuarmi Peqqissaavimmi aamma utoqqaat illuanni suliat assigiinngitsorujussuupput. Utoqqaat illuani sulisut amigaataapput, taakkulu peqqinnissaqarfimmik kivitsisussatut atorneqarnissaat pissusissamisuunngilaq.

- Taamaattumik Avannaata Kommunianiit mianersoqqusineq pimoorullugu tiguneqartariaqarpoq, taanna oqarpoq.

Kommune Qeqertalimmi isumaqatigiissusiortoqarnissaa sioqqullugu, Qaanaami isumaqatigiissutip iluatsissimannginnera pillugu paasissutissat sukumiisut, nalilersuinermi atorneqartariaqartut, Aqqa Jensen isumaqarpoq.