Jess Svane: Inatsisartut pimoorussinerugitsi

Inatsisartut upernaaq manna ataatsimiinnerat takisooq, sisamanngornermi naggataarneqarpoq. Ullut katillugit 29-it ataatsimiiffiupput. Ullut ilaat unnuttalerlugu ataatsimiiffiusarput. Oqaluuserisassat tamakkerneqarmata partiit ileqqoq malillugu naggataarutaasumik oqaaseqarput. 

AAMMA ATUARUK:

Inatsisartunut ilaasortaq: Inortuikulasoqaqaaq

Siumut sinnerlugu Jess Svane Inatsisartut oqaluttarfiannit oqaaseqarpoq. Qinikkatut misilittagartooq parteeqatiminut, Lars Poulsenimut, sinniisutut atuulluni qaammatip ataatsip missaani Inatsisartuni ataatsimeeqataavoq. Pitsaanngissorisaminillu maluginiagaqarnini suleqatiminut isertuutinngeqaa.

- Qinikkatut akisussaaffik, nammineerlunga qaammatip ataatsip iluani isigaara qanoq innersoq. Ugguaateqarpunga. Maani pisussaaffeqarneq soorluuna tammakarsimasoq, Jess Svane oqaluttarfimmit oqarpoq.

Taanna qinikkatut akisussaaffinnik oqimaatsunik paarsinermik misilittagarpoq, borgmesteritut, Inatsisartunut Naalakkersuisunullu ilaasortatut.

Nuuk qimakkaat

Jess Svanep maluginiagaanut ilaavoq Inatsisartunut ilaasortat Inatsisartut ataatsimiinnerisa nalaanni peqanngikulaarnerat, allaat Nuuk qimallugu aallaqqasarnerat.

- Ataatsimiinnerup ingerlanerani Inatsisartunut ilaasortat ilaat allamiittut takusaqattaarpakka. Illoqarfinni allaniittut takusaqattaarpakka. 

- Uagut taamani Inatsisartunut ilaasortaalluta ataatsimiinnitta nalaani aallaqqusaanngilagut. Naamerluinnaqqissaaq. Inatsisartuni Naalakkersuisut suliaannik paarsinissaq suliassaraarsi, Jess Svanep ilani avoqqaarai.

Sermitsiap Kommune Qeqertalimmi Kommunalbestyrelsip Qeqertarsuarmi juunip aqqarngani ataatsimiinnera malinnaaffigaa. Tassani Inatsisartunut aamma kommunimut ilaasortaq, Kristian Jeremiassen (IA), Qeqertarsuarmi ataatsimeeqataavoq. Inatsisartut ulloq taanna aamma ataatsimiipput, ataatsimiinnerullu aallartinnerani taasisarneq pillugu isumaqatigiittoqarsimanngitsoq aqutsisoq oqarpoq. Tassa imaappoq Inatsisartunut ilaasortat ulloq taanna tamarmik piareeqqallutik imminnut nalunaarutigipput. Taamaakkaluartoq ilaasortat ilaat illoqarfimmi kommunimilu allami ataatsimeeqataavoq.