Danmarkimi naalakkersuisunik nutaanik suli isumaqatigiittoqanngikkaluartoq Folketingimi ilaasortat 179-it ullumi ullup qeqqanut siullermeerlutik ataatsimiipput.
Naleqqameersoq Qarsoq Høegh-Dam Inuit Ataqatigiinneersorlu Naaja H. Nathanielsen ataatsimeeqataapput.
Danmarkimi naalakkersuisunik nutaanik suli isumaqatigiittoqanngikkaluartoq Folketingimi ilaasortat 179-it ullumi ullup qeqqanut siullermeerlutik ataatsimiipput.
Naleqqameersoq Qarsoq Høegh-Dam Inuit Ataqatigiinneersorlu Naaja H. Nathanielsen ataatsimeeqataapput.
Naaja H. Nathanielsenip sulinerup aallartinnissaa qilanaarisimallugu ataatsimiinnissaq sioqqullugu oqarpoq.
– Sulineq iluassaaq qilanaareqaaralu. Partiit allat peqatigiiffiillu assigiinngitsut arlallit ataatsimeeqatiginissaat isumaqatigiissutigisaqattaareerpaakka taamaattumik ullorsiutikka ulikkaarput, Naaja H. Nathanielsen oqarpoq.
Sivisunerpaamik ilaasortap Lars Løkke Rasmussenio ulloqeqqanut ataatsimiinneq ammarpaa. Ilaasortat arlallit pisoq puiukiunniarlugu assiliipput.
Assi: Trine Juncher Jørgensen
FOLKETINGI NUTAAQ
Folketingip ilaasortai 179-it partiini 16-ini agguataagaapput. Taakkunannga pingasut ataaviitsuupput.
Partiit agguataarnerat imaappoq:
Socialdemokratiet (S): 38
Socialistisk Folkeparti (SF): 20
Venstre (V): 18
Dansk Folkeparti (DF): 16
Liberal Alliance (LA): 15
Moderaterne (M): 14
Det Konservative Folkeparti (KF): 13
Enhedslisten (EL): 11
Radikale Venstre (RL): 10
Danmarksdemokraterne (DD): 10
Alternativet (ALT): 5
Borgernes Parti (BP): 2
Naleraq (N): 1
Inuit Ataqatigiit (IA): 1
Sambandsflokkurin (SP): 1
Javnaðarflokkurin (JF): 1
Attaviitsut: 3
Aallarfik: Folketinget.dk
Siulittaasuugallartussamik toqqaaneq
Folketingimi sivisunerpaamik ilaasortap Lars Løkke Rasmussenip (M) ataatsimiinneq aquppaa, taanna ukiuni 31-ni qaammatinilu arfinilinni ilaasortaanikuuvoq.
Ataatsimiinnermi Søren Gade Venstremeersoq siulittaasuugallartussatut toqqarneqarpoq, qinigaanerup misilinneqarnissaanut ataatsimiititaliaq 21-nik ilaasortalik pilersinneqarpoq. Ataatsimiinneq minutsini 20-nnarni pivoq.
Qarsoq Høegh-Dam Folketingip ataatsimiittarfiani atini nerrivimmiittoq takugamiuk immikkut ittumik misigisimalluni ataatsimiinnerup kingorna oqarpoq.
– Akisussaafferujussuaqartutut misigivunga. Inuppassuit qinerpaannga naatsorsuuteqarfigalungalu. Aallartilluarporlu nuannaarpungalu sulineq aallartikkakku.
– Akisussaafferujussuaqartutut misigivunga, Qarsoq Høegh-Dam Folketingimi siullermik ataatsimiinnerup kingorna oqarpoq.
Foto: Trine Juncher Jørgensen
Inatsisip Tunngaviusup atsiornera
Folketingip aappassaanik ataatsimiinnissaa marlunngornermi apriilip 14-ianni nalunaaqutaq 13.00 aallartissaaq. Folketingimut qinersinerup akuerineqarnissaanut ataatsimiititaliap innersuussutaa tassani taasissutigineqassaaq.
Taasisoqareerpat Folketingimut ilaasortanngortut nutaat tamarmik ataatsimiittarfimmi persuarsiutigineqartumik inatsisip tunngaviusup malinnissaanut atsiussapput.
Qinigaasut nutaat 67-it, ilaatigut Qarsoq Høegh-Dam aamma Naaja H. Nathanielsen, tamarmik ima oqaasertalimmut atsiussapput: »Inatsit Tunngaviusoq ataqqillugulu malinnissaa neriorsuutigaara«.
Inissiarineqareerpata Folketingip ataatsimiittarfiani ataatsimiinneq nanginneqassaaq, tassanilu Folketingimi siulittaasoq, siulittaasup tullii sisamat aamma allatsit tallimat qinerneqassapput. Kingullermik taaneqartoq siulittaasoq siulittaasullu tullii peqataasinnaajunnaaraangata ilaatigut Folketingip ataatsimiittarfiani ataatsimiinnerit aqunneranni ikiortaapput. Kiisalu ataatsimiititalianik arlalinnik pilersitsisoqassaaq, ilaatigut Nunanut Allanut tunngasunut ataatsimiittartui, ilaatigut nunanut allanut sillimaniarnermullu politikkimut tunngatillugu immikkut inissisimaffeqartut pilersinneqassallutik.
