Kommuneqarfik Sermersuumiit umiarsuarnut takornariartaatit Nuup Kangerluani innimiginneqqullugit kaammattorneqartut

Umiarsuit takornariartaatit Nuup Kangerluaniittut innuttaasunit piffissami kingullermi oqallisigineqarput. Umiarsuit kangerlummiinnissamut angivallaartut amerlasuut misigaat.

Kommuneqarfik Sermersuumi ernumassut paasineqarsinnaavoq, aammattaaq kangerlummi takornariaqarneq kikkunnut tamanut inissaqartitsisumik ingerlanneqalernissaa kissaatigineqarluni.

Kommuneqarfik Sermersooq tusagassiuutitigut nalunaarummi allappoq.

Taamaattumik borgmesterip Avaaraq Olsenip (IA) takornarialerisut innimiginneqqullugit kajumissaarpai:

- Umiarsuit piniartunut aalisartunullu kangerlummi sulisunut ungasissumiittariaqarput aamma uumasunut akornusiinaveersaartoqassaaq, pingaartumik massakkut aavarfinngungajalernerani. Takornariartitsisut innuttaasunut ullut tamaasa kangerlummiittartunut ataqqinninnissaannik kommunimiit aamma kaammattuutigineqarpoq.

Immikkoortunut agguataarineq

Kommune kangerlummi angallannermut maleruagassiornissamut maanna periarfissaqanngilaq, kangerluulli immikkoortunut agguataarnissaanut siunnersuummik suliaqartoqarnikuulluni.

Siunnersuut piniartut, aalisartut, takornariartitsisut innuttaasullu suleqatigalugit suliarineqarpoq, tassani takornariartitsinerup pinngortitamik aamma inunnut kangerlummik inuussuteqartunut ataqqinnittumik sumi qanorlu ingerlanneqarnissaanut ersarissumik killiliussaqarnissaanik qulakkeerinnittoqassalluni.

Siunnersuut Namminersorlutik Oqartussanut nassiunneqarpoq akuersissutigineqarnissaalu utaqqineqarluni.

Takornariartitsineq Kommuneqarfik Sermersuumi tikilluaqquneqarpoq. Suliffissaqartitsivoq isertitaqarfiullunilu aamma pinngortitatsinnik nunarsuarmut takutitsiffiulluni. Kangerlummili inuunerineqartumut oqimaaqatigiissumik ingerlanneqassaaq, kommuni allappoq.