Lars Møller-Sørensen toquvoq

Lars Møller-Sørensen sivisuumik napparsimareerluni qanittukkut Danmarkimi 62-inik ukioqarluni toquvoq. Toqukkut qimagunnera qallunaat politikki pillugu tusagassiorfiani Altingetimi allaaserineqarpoq.

Lars Møller-Sørensen Kalaallit Nunaanni ukiut 25-t ingerlanerini pisortatut assigiinngitsuni akisussaaffeqarnikuuvoq, suliarisimasanilu amerlasuut eqqaamaneqaatigissallugit.

Kalaallit Nunaannut 1995-imi tikippoq, Mittarfeqarfinni sulisoqarnermut pisortanngorluni kingusinnerusukkullu KNI-mi pisortatut atorfeqarnikuulluni.

Kommuneqarfik Sermersuumi 2014-imi sulilerpoq, 2017-imiillu 2021 tikillugu pisortaalluni.

Aningaasaqarnermut ineqarnermullu politikkimut tunngatillugu akerleriissutaasunik aalajangiisarpoq, tamannalu pissutigalugu atorfimminit soraarnikuulluni. Kingorna siunnersuisartutut namminersortunngorpoq.

Lars Møller-Sørensen politikkeriusimasumut Lars-Emil Johansenimut (S) kommunimi eqqunngitsunik tunngaveqarluni atorfinititsisimasutut siorna unnerluutigineqarpoq. Peqquserlunnermi pisuunngitsutut Nunatta Eqqartuussisuuneqarfiani  aalajangiiffigineqarpoq.

Lars Møller-Sørensen Danmarkimi inuusuttuulluni Venstrep inuusuttaanut siulittaasutut politikkeritut suliaqarpoq, kommunimilu Koldingimi politikeriunikuulluni.

Lars Møller-Sørensenip panini pingasut qimappai, Koldingillu eqqaani Seestimi arfininngorpat ilineqassasoq Altinget allappoq.