Angut 28-nik ukiulik pinerluttulerinermi inatsimmi ilaquttaminik inoqutiminilluunniit narrunarsaasutut tunngatillugu paragrafi naapertorlugu Eqqartuussisoqarfik Sermersuumi siorna novembarip tallimaani pineqaatissinneqarpoq.
Qaammatini pingasuni pineqaatissinneqarsimasunut inissiisarfimmiittussanngorlugu tassani eqqartuunneqarpoq.
Angut 28-nik ukiulik pinerluttulerinermi inatsimmi ilaquttaminik inoqutiminilluunniit narrunarsaasutut tunngatillugu paragrafi naapertorlugu Eqqartuussisoqarfik Sermersuumi siorna novembarip tallimaani pineqaatissinneqarpoq.
Qaammatini pingasuni pineqaatissinneqarsimasunut inissiisarfimmiittussanngorlugu tassani eqqartuunneqarpoq.
Angut 2025-mi januaarip 19.-iani unnuaqeqqariitsiartoq ernini pingasunik ukiulik qimallugu imerniartarfiliarpoq, aqaguanilu suli angerlarani. Nukappiaqqap angunni Nuussuarmi ujarniarlugu issittumut ikiaqutaannaalluni anivoq.
Angut 28-nik ukiulik eqqartuussivimmi nassuerpoq, taamaakkaluartorli sakkukinnerusumik pineqaatissiisoqarnissaa neriuutigalugu Nunatta Eqqartuussisuuneqarfianut suliareqqitassanngortitsilluni.
Tamannalu iluatsippoq. Angutip qaammatini pingasuni pineqaatissinneqarsimasunut inissiisarfimmiittussanngortinneqarnera atorunnaarsillugu inuiaqatigiinnut akunnerni 80-ini kiffartuussisussanngorlugu Nunatta Eqqartuussisuuneqarfiani pingasunngornermi ualikkut aalajangerneqarpoq.
Nunatta Eqqartuussisuuneqarfiani eqqartuussutip saqqummiunneqarnerani sooq eqqartuussisoqarfimmit allaanerusumik inerniliisoqarnera itisilerneqanngilaq.
Ataasiaannaq pisoq
Angutip eqqartuunneqartup eqqartuussinermi pisuni sunnertisimaqaaq, aamma kukkorujussuarsimanini ilisimallugu. Januaarimi pisimasoq pissusilersuutigineq ajoraa tassunga illersuisuatalu erseqqissaatingissallugu pingaartinneqarpoq.
- Pisimasoq ilungersunarpoq, erseqqissarusupparali ataasiaannarluni pimmat. Ullormi ataasiinnarmi pisoq. Tamatuma eqqaamanissaa pingaaruteqarpoq, illersuisoq Naja Joelsen oqarpoq.
PINERLUTTULERINERMUT INATSIMMI SUMIGINNAANERMUT TUNNGASOQ
Inatsimmi paragraffi ima nipeqarpoq:
§ 75. Ilaquttaminik inoqutiminilluunniit narrunarsaasutut eqqartuunneqassaaq kinaluunniit aapparminik, qitornaminik imaluunniit inummik allamik oqartussaaffigisaminik isumagisassaminilluunniit
imaluunniit ningaaminik sakiatsiaminillu imaluunniit siuaasatut ilaquttaminik paarsinerlulluni nikarnasaasumilluunniit pissusilersorfiginnilluni narrunarsaasoq.
Imm. 2. Taamatuttaaq pineqassaaq kinaluunniit pilersuisussaatitaanerminik imaluunniit akilersuisussaatitaanerminik sumiginnaalluni inunnik imm. 1-imi taaneqartunik ajorsalersitsisoq.
Nukappiaraq Nuummi angajoqqaarsiani maanna najugaqarpoq. Ataataasup 28-nik ukiullip ineqarnermut atugai pissutaallutik nukappiaqqap angerlarsimaffiup avataanut nuunneqarneranut pissutaanerat, illersuisup oqaatigaa.
- Atornerluinermik ajornartorsiuteqanngilluinnarpoq, Naja Joelsen eqqartuussivimmi oqarpoq.
Siornatigut assingusumik suliaqartoqarnikuunngitsoq
Angut 28-nik ukiulik Nuup avataani sulivoq, aalajangersimasumilli suliffittaarnissani illoqarfimmilu najugaqalernissani kissaatigalugu. Eqqartuusseqataasup suliamut aalajangiiartortinnagit eqqartuussisup naggataarutaasumik oqaaseqarusunnersoq aperimmagu nammineerluni oqaluttuaraa.
- Ernera qimassinnaanngilara, oqarpoq.
Suliaq immikkut pingaaruteqarpoq, tassami ilaquttaminik inoqutiminilluunniit narrunarsaasutut eqqartuussineq Nunatta Eqqartuussisuuneqarfiani suliarineqartoq siullerpaavoq. Unnerluussisup illersuisullu siornatigut assingusumik suliaqartoqarsimanerani assersuutinik nassaarsinnaasimanngillat.
Taamaattumik suliap matuma inernera siunissami assingusunik suliaqarnissamut sunniuteqarsinnaavoq.
Aammattaaq suliap immikkut ittuunera pissutigalugu illersuisup eqqartuussisunik aalajangiiffigineqarnissaa piumasaraa. Unnerluutigineqartut nassuersimatillugit taamaattoqarneq ajoraluarpoq. Nunattali Eqqartuussisuuneqarfiata illersuisup suliami matuma piumasaa akueraat.
