Mette F. Trumpip Kalaallit Nunaannik oqaasii pillugit: Tusaasariaqarsimasavut amerlaqaat
Minsiteriunerup Mette Frederiksenip ukiortaami oqaaseqarnermini USA-p Kalaallit Nunaannik nakkutilliinissamik piginnittuunissamillu pisariaqartitsinera pillugu Donald Trumpip oqaaseqarnera iserfigaa. Tamanna inissaminiinngilluinnarpoq, ministeriuneq oqarpoq.
Assi: Mads Claus Rasmussen/Ritzau Scanpix
Ministeriunerup Mette Frederiksenip
ukiortaami oqaaseqarnermini Amerikamiut ukiuni kingullerni Kalaallit Nunaannik
soqutiginninnerat iserfigaa.
Tamanna USA-p Kalaallit Nunaannik
nakkutiginninnissamik piginnittuulernissamillu kissaataa pillugu præsident Donald
Trumpip oqaaseqarneranik kiisalu Kunngeqarfiup immikkoortup
isumannaatsuuneranik nakkutiginninnermillu ingerlatsineranik Trumpip
sakkortuumik isornartorsiuineranut tunngavoq.
Danmarkip Issittumi isumannaallisaanermik
nukittorsaanermik ingerlatsineranik erseqqissaanermigut Mette Frederiksenip
tamanna iserfigaa, nangillunilu naak ajornartorsiortoqaraluartoq kunngeqarfiup USA ilittut qaninnertut isigigaa, oqarpoq:
- Ukiumi qaangiuttumi
tusaasariaqarsimasavut amerlaqaat.
- Qunusaarinerit. Tatiniaanerit.
Nikaginnittumik oqaaseqarnerit. Aali ukiorpassuarni qaninnerpaamik ilitsinniit,
ministeriuneq oqarpoq, imalu nangilluni:
- Nunamik allamik, inuiannik allanik
tigusiniarlutik. Taakku pisiarisinnaasatut pigilersinnaasatullu isigalugit.
Taamaattoqarsinnaanngilluinnarpoq.
Danmarki saqitsaanniarsarinngitsoq Mette
Frederiksenip erseqqissarpaa:
- Nunarsuarmi akisussaaffimmik
kivitsivugut. Uagut saqitsaanniarsarinngilagut, Mette Frederiksen oqarpoq,
imalu nangilluni:
- Mannali qularutigineqassanngilaq:
Qanorluunniit pisoqassagaluarpat suut eqqortuunerat eqqunngitsuunerallu
aalajangiusimavagut.
