Mette Frederiksen Trumpimut: Kalaallit Nunaat tuniniagaanngilaq

Kalaallit Nunaat tuniniagaanngilaq.

Ministeriuneq Mette Frederiksen (S), NATO-p Ankarami ataatsimeersuarnerani Donald Trumpip Amerikap Kalaallit Nunaannik aqutsinissaanik kissaateqarnini marlunngornermi uteqqimmagu, taama oqarpoq.

- Kalaallit Nunaat soorunami tuniniagaanngilaq. Aallaqqaammulli oqaatigisareerparput, Mette Frederiksen Ankarami oqarpoq.

Donald Trumpip Kalaallit Nunaat "pigilerusullugulu aqukkusullugu" oqartarnera "nalunnginneqarluartoq" aamma oqaatigaa.

Danmarkimili naalakkersuisut itigartilluinnarpaat:

- Taama pisoqarunnanngilaq. Kalaallit Nunaata USA-mut ilanngukkusunnginnini erseqqissumik oqaatigereernikuuaa, naatsorsuutigaaralu kunngeqarfiullu oqartussaaffii kikkut tamarmik ataqqissagaat naatsorsuutigaara, Mette Frederiksen oqarpoq.

Donald Trumpip taamatut oqarnera Kalaallit Nunaannut Danmarkimullu piffissaavoq pitsaanerpaanngitsoq.

NATO-p generalsekretæriata Mark Ruttep Trumpi Kalaallit Nunaata aqulernissaanik kissaateqarneranut taarsiullugu Issittumi isumannaallisaanerup annertusarneqarnissaata ukkatarinissaa upernaaq iluatsippaa.

Danmarkip Amerikamiut timmisartuinik alapernaarsuutinik P-8A Poseidoninik marlunnik milliardilikkaanik aningaasaliissuteqarluni marlunngornermi nalunaarutigaa. Issittumiinnerulernissaq Atlantikullu avannaaniinnerunissaq siunertarineqarpoq.

Kisiannili Issittumi nakkutilliinerulerniarluni pisiortorneq Trumpimut naammassimagunanngivippoq.

- Issittumi isumannaallisaanissaq pillugu Amerikamiut suleqatigilluarpavut. Tamanna ineriartortikkusupparput. Suleqatigiissitaqarpoq taakkuninnga aamma suliaqartunik. Kalaallit Nunaalli tuniniagaanngilaq, Mette Frederiksen oqarpoq.

Danmarkip – Donald Trumpip piumasaqarnerata kingorna – Nato-p nunap aningaasataasa 5 procentii illersornissamut atorneqartarnissaanut siunertaa naammassikanneqqagaa aamma erseqqissarpaa.

Taamaattumik Nato-mi nunat akornanni akerleriinnerit pinnagit nunanit allanit navianartorsiortitsisut isiginiarneqarnerusariaqarput:

- Nato-p avataani amerlasuunik akeraqarpoq. Nato-p iluani akeqqersimaartoqarnissaa pisariaqartinngilarput, Mette Frederiksen oqarpoq.

Nunat Nato-miittut, USA ilanngullugu, Ruslandi peqqarniisaarniarnerillu ulorianartorsiortitsinerat sammisariaqaraat oqaatigaa.

- Nunani allani akeqqanik assigiinngitsorpassuarnik peqarpugut. Nunat Nato-mi ilaasortaasut pitsaanerpaamik perusukkutsigit ataatsimoortariaqarpugut, Mette Frederiksen oqarpoq.

NATO-p generalsekretæriata, Mark Ruttep, Nato ataatsimoortittuarumallugu Trumpimut naalagarsiorpallaarsimaneraanermut akuliukkumanngilaq.

- Ruttep suliani qanoq suliarinerai eqqartussanngilakka, uanga suliakka aalluppakka, Mette Frederiksen oqarpoq.

Danmarkimi ministeriunerup Kalaallit Nunaat Issittorlu ataatsimeersuarnermi sammineqartussannginnerat aamma erseqqissarpaa.

Taamaammat Mette Frederiksenip Trumpi, Ankarami ataatsimeersuarnermi Kalaallit Nunaat pillugu oqaaseqarnera, oqaloqatigissanngilaa.

- Avannaarsua, Issittoq imaluunniit Kalaallit Nunaat immikkut oqallisigineqassanngillat.

- Natop Issittumi annertunerusumik akisussaaffeqalernikuunera nuannaarutigaara. Pingaaruteqartorujussuuvoq, Mette Frederiksen oqarpoq.

RITZAU