MIO: Nuna tamakkerlugu imigassamut aalakoornartortalimmut politikki, meeqqat utaqqisinnaanngilaat

Piaarnerpaamik nuna tamakkerlugu imigassamut aalakoornartortalimmut politikkeqalernissaq suliarineqassasoq, MIO-p Naalakkersuisut kajumissaarpai. Meeqqat pisinnaatitaaffii pillugit suliniaqatigiiffik MIO naapertorlugu meeqqat, immikkut ilisimasallit, innuttaasut kisitsisillu takutippaat imigassamik aalakoornartortalimmik atornerluineq meeqqanut angerlarsimaffinni imigassamut ajornartorsiuteqarfiusuni peroriartortunut kingunerlutsitsisartoq.

Kajumissaarineq tamanna MIO-p "Børn før alkohol"-mi oqallitsitsinerani oqariartuutit nalunaariusiarineqarnerata saqqummiunneqarnerata kingorna pivoq. MIO-p MIO-llu meeqqat siunnnersuisoqatigiivisa tamanna ukiassaq aaqqissuussaraat. Innuttaasut, ilisimasallit, oqartussat politikerillu oqallinnermi peqataapput.

MIO naapertorlugu ataatsimiinnermi meeqqat angerlarsimaffimmi imigassamik aalakoornartortalimmik ajornartorsiorfiusumi peroriartortut, ajoqusiisumik naalliutsitsisumillu oqaluttuaat uppernarsarneqaqqipput.

- Naliginnaavoq angerlarsimaffimmi eqqissiviilliortoqarneranik nakuusertoqarneranilluunniit nalunaaruteqartoqaraangat politiit orniguttarnerat, inersimasullu imigassartorpallaarsimasut, oqqallutik immaqaluunniit unataattarput. Taamaattoqartillugu politiit meeqqat annilaangaqisut meeqqap ineeraani, siniffiup ataanut toqqorfiusinnaasunullu allanut toqqorsimasut naapittarpaat. Meeqqat namminneq politiinut sianertarnerat qaqutigoortuunngilaq, politimesteri Bjørn Tegner Bay nalunaarusiami "Børn før alkohol"-imi oqarpoq.

MIO: Meeqqat pisinnaatitaaffii ataqqineqanngillat

- Meeqqat aqqusinermi ualikkut kingusissukkut, unnuaannakkullu – aamma silami nillersumi naapittarpavut. Meeqqat nuannariinnarlugu aqqusinermiinneq ajorput, angerlarsimaffimminniilli aqquserngit toqqissisimanartinneruaat, politiini pisortaq oqarpoq.

MIO isumaqarpoq meeqqat misigisimasaat immikkullu ilisimasallit nalunaarusiaata takutikkaat Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaat Kalaallit Nunaanni unioqqutinneqartoq .

Meeqqat illersuisuat Stina Sværd ima oqarpoq:

AAMMA ATUARUK

Imigassaq aalakoornartortalik pillugu politikki suli politikkikkut isumaqatigiinniutigineqanngitsoq

- Meeqqat nakuusernernut, ajoqusiinernut, atornerluinermut, sumiginnaanernut sumiginnaanermulluunniit tamanut illersorneqartarlutik isumassorneqarsinnaatitaapput — pisinnaatitaaffillu tamanna ullumikkut attanneqanngilaq, nassuiaavoq.

Tamanna tunngavigalugu MIO-p Naalakkersuisut kajumissaarpai piaartumik nuna tamakkerlugu imigassamut aalakoornartortalimmut politikkimik ilusilersueqqullugit Inatsisartunullu ilaasortat kajumissaallugit tamatuminnga tapersersueqqullugit. Naalakkersuisut imigassamut aalakoornartortalimmut politikkissaq pillugu paasissutissanik tunngaveqartunik ukiaq innersuussuteqarput.

- Kinguarteqqinneqarsinnaanngilaq. Meeqqat inuusuttullu inersimasut imigassamik aalakoornartortalimik atornerluinerisa kinguneri ilungersunartut ukiorpassuarni misigisimavaat. Meeqqanik tamatumannga illersuinissamut, inuiaqatigiittut akisussaaffik tigusisariaqarparput. Nunami politikerit siulliullutik nuna tamakkerlugu imigassamut aalakoornartortalimmut politikkimik suliaqartariaqarput suliniutaasunillu iliuuseqartariaqarlutik, Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaata Kalaallit Nunaanni malinneqarnera qulakkeerniarlugu, Stina Sværd erseqqissaavoq.

Erseqqissunik iliuuseqartoqarnissaanik piumasaqartoq

Imigassamut aalakoornartortalimmut politikki nutaaq iliuusissanik piviusunik pisussaaffilersukkanik imaqartariaqartoq MIO isumaqarpoq, ilaatigut meeqqat toqqissisimasumik meeraaneranni inuusuttuaraanerannilu inuunerannik qulakkeerinnittussanik aamma imigassanut aalakoornartortalinnut inersimasullu imigassap ajoqutaaneranik atuinerannut sapinngisamik illersuisussanik.

MIO-p aamma tikkuarpaa meeqqat inuusuttullu angerlarsimaffimminni imigassamik aalakoornartortalimmik ajornartorsiuteqarfiusumeersut, ilaatigut meeqqanut inuusuttunullu immikkut ittumik isumagisassanngortitanut, tapersersorneqarnissartik pisariaqartikkaat.

Aammattaaq MIO-p kissaatigaa imigassamik aalakoornartortalimik atornerluinermut katsorsartinnissamut piaartumik akeqanngitsumillu periarfissaqarneq, imigassap ajoqutaaneranik katsorsaasinnaanernillu paasissutissiisarneq ingerlaavartoq, angerlarsimaffimmilu imigassamik aalakoornartortalimmik atornerluisoqarneranik ernumassuteqaraanni ilaatigut atuarfinnut timersoqatigiiffinnullu siunnersuutit periutsillu pilersinneqarnissaat aamma kissaatigaat.

Meeqqat pisinnaatitaaffiinut sullissiviup naqissuserpaa meeqat aalakoornartumut illersorneqarnissaat pillugu akisussaaffik politikeriniiginnanngitsoq.

- Meeqqat inuusuttullu imigassamik ajoqusiisumut illersornissaat tamatta akisussaaffigaarput: kommuni, niuertarfinni, inuussutissarsiortut, timersoqatigiiffiit, kulturikkut sunngiffimmilu ornittakkat, angajoqqaat, ilaqutaasut, ilinniartitsisut, sanilit innuttaasullu allat.