Naalakkersuisoq: Aalisagartassiissutit utertinneqassanngillat

Naalakkersuisut kitaata avataani aalisagartassat, SiKu Trawl A/S-imut tunniussatik, uterteqqinnianngilaat. Aalisarnermut Naalakkersuisoq, Peter Borg (D), Sermitsiamut allakkatigut akissuteqarnermini allappoq.

- Neqeroortitsisimaneq atorunnaarsinneqassanngilaq, neqeroortitsinermi atortussani aalisarnermullu inatsimmi piumasaqaatit naammassineqarsimammata, Naalakkersuisoq allappoq.

AAMMA ATUARUK:

Aalisarnermik ingerlatseqatigiiffiit pingasut Naalakkersuisunut kamattut: Aalisagartassiissutit tunniussasi utertissigit

Taanna apersorneqarnissaminik Sermitsiamit kissaateqarfigineqaraluarluni allakkatigut akivoq. Allakkatigut akissummini Sermitsiap paaserusutai arlallit akinngilai. Taamaattumik Sermitsiaq Naalakkersuisumik akisussaasumik apersuinissaminik naalakkersuisoqarfimmut suli noqqaassuteqarpoq. Allaaserisalli suliarineqarnerani tamanna qisuariarfigineqanngilaq.

Sermitsiaq ingerlatseqatigiiffiit pingasut, qaleralinnik 2.468,5 tonsinik, saarulinnik 1.950 tonsit nataarnanillu 166,6 tonsinik pisassaateqalerumallutik neqerooraluarlutik toqqarneqanngitsut pillugit pingasunngornermi allaaserisaqarpoq. Ingerlatseqatigiiffiit taakkua tassaapput Halibut Greenland ApS, Inua Fisheries Greenland ApS aamma Avalleq ApS.

Isorinnittut: Piumasaqaatit aalajanngiinermi toqqammaviunngillat

Ingerlatseqatigiiffiit taakkua isumaqarput neqeroortitsinermi piumasaqaataasut sanioqqullugit Naalakkersuisut pisassiissutinik pissarsisunik toqqaasimasut. Taamaammaallu pisassat SiKu Trawl A/S-imit utertinneqariarlutik neqeroortitsisoqaqqittariaqarneranik kissaateqarput.

Halibut Greenland ApS, Ilulissani aalisakkerivimmik ingerlataqartoq, isornartorsiuinermini ilaatigut ima allappoq:

- Naalakkersuisut avataasiorluni aalisagartassanik suliffeqarfimmut allamut tunniussinerminni toqqammavilersuutigisimavaat nunap immikkoortuani inerisaaniarlutik neriorsuissimasunut.

AAMMA ATUARUK:

Avataani aalisagartassaateqalersut: Kilisaatitaarlutalu Narsami tunisassiorfeqalissaagut

- Naalakkersuisut kitaani avataasiorluni aalisagartassanik neqeroorusiortitsinerminni aalajangiisimapput qinnuteqartitsinerminni piumasaqaataasut isikkaniliusunit piumasaqaat ilaanngitsoq toqqammavigalugu! Tassa siunertaq piumasaqaataasullu sanioqqullugit Naalakkersuisut aalajangernerminni tunngavilersuut allarluinnaq toqqammavigalugu tigusimallugu, ingerlatseqatigiiffiup pisortaa, Erik Sivertsen aamma siulersuisut siulittaasuat, Kaaleeraq Mathæussen tusagassiorfinnut allapput.

Isornartorsiutilli taakkua sakkortuut, Naalakkersuisup Sermitsiamut akissuteqarfigissanagit, aalajangiussimallugu allappoq.

- Naalakkersuisoqarfiup ingerlatseqatigiiffiit marluk saaffiginnissutaat toqqaannartumik ingerlatseqatigiiffinnut allakkatigut akissavai, Naalakkersuisoq allappoq. 

Naalakkersuisup Sermitsiamut allagaa naapertorlugu, neqeroortitsereernermi pisassanik pissarsisoq, SiKu Trawl A/S pisassiissutit pissarsiani aalisarlugit aallartereerpoq.