Naalakkersuisoq aningaasarsiorfissanik nutaavinnik suliaqarnerminnik eqqaasaqanngitsoq

Naalakkersuisut Narsap Iluani, Kuannersuarni, ingerlatseqatigiiffiup Greenland Mineralsip, misissueqqaarnissamut akuersissutaata, siorna ukiup naanerani atuukkunnaartup, sivitsoqqinnginnissaannik aalajangernerat, Aatsitassanut Naalakkersuisup, Múte B. Egedep (IA), maanna annertunerusumik qisuariarfigaa.

Naalakkersuisut aalajangernertik pillugu naatsuinnarmik tallimanngornermi nalunaaqqaaput. Misissueqqaarnissap sivitsorneqaqqissannginneranik aalajangernermi tunngavilersuutaasut ilaat maanna nassuiarneqarnerupput.

- Naalakkersuisoqarfiup toqqammaviusumik naliliinera tassaavoq sivitsuigaluaraanni ilisimasanik nutaanik pilersitsiviujunnanngitsoq. 

- Naalakkersuisoqarfiup nalilersuisimaneri Naalakkersuisunut qitiupput. Ilisimasanik nutaanik pilersitsisoqarnavianngitsoq aammalu ilisimasat killeqarfiliussat taassuma iluani naammareersut allanngornaviannginnerinik naliliineq taanna tunngavinni annerpaarpaajuvoq sivitsuinissamut itigartitsinermi.

- Killeqarfiliussap akuersissuteqarfiusup iluani killeq taanna qaangerlugu (100 ppm, aaqq.) akoqarneranik qinngornernik ulorianartunik, tassa uranimik, toqqammaveqarneq ilaatigut aamma tunngaviuvoq, Aatsitassanut Naalakkersuisoq Múte B. Egede Sermitsiamut oqarpoq.

AAMMA ATUARUK:

Itigartitsinermut tunngavilersuutigineqartut politikkimik tunngaveqartut, Kuannersuarni aatsitassarsioqatigiiffik isumaqarpoq

Aatsitassanut Naalakkersuisoqarfimmi ujarassiuut naliliineri Naalakkersuisut itigartitsinerannut peqqutaaqataasut taanna aamma oqarpoq.

Naalakkersuisoq ETM-imut: Ataatsimut isiginnippugut

Ingerlatseqatigiiffiup Energy Transition Mineralsip, pisortaata Daniel Mamadoup, Sermitsiamut pingasunngornermi oqarnera naapertorlugu ingerlatseqatigiiffik sumiiffimmi akuersissuteqarfiusumi sumiiffinni immikkoortuni qulini inatsimmut naapertuuttumik, tassa uranimut killiliussaasoq qaangernagu peqarnera siorna ilimatsaassimallugu oqaatigaa. Sumiiffiilli ataasiakkaat Naalakkersuisut aalajangiineranni toqqammaviunngitsut, akuersissuteqarfilli tamaat ataatsimut isigineqartoq, Naalakkersuisoq erseqqissaavoq.

- Tamakkiisumik isiginnissagaanni ilisimasat, killiliussat taakkua pigineqartut qaangerlugit inissisimasussaassasut, aammalu taakkua toqqammavigalugit tamanna aalajangerneqarpoq.

- Inerniliussaq taannaavoq; ilisimasat nutaat ingerlatseqatigiiffiup apuukkaluarpagilluunniit tamakkiisumik sumiiffimmi peqarfiusumi naliliineq taamaattuusoq, aalajangernerlu taama toqqammaveqarpoq, Naalakkersuisoq oqarpoq.

Aningaasarsiorfiit pioreersut inerisassasut

Naalakkersuisut taama aalajangernerat Siumup aamma isoreqaa. Partiip siulittaasuata, Aleqa Hammondip (S), Sermitsiamut siusinnerusukkut oqarnera naapertorlugu, Naalakkersuisut itigartitsinerminni aningaasarsiorfissanik nutaanik innuttaasunut minnerpaamik tikkuussisariaqarput. Inuussutissarsiutilli maanna tusartakkatta saniatigut Naalakkersuisoq allanik taasaqanngilaq.

- Nunarput aningaasaateqarnerulersinniarlugu sulineq ilungersuutigaarput. Aatsitassarsiorneq uranitaqanngitsunik taanna pimoorunneqarpoq. Taakkua saniatigut takornariaqarnikkut ineriartornissaq, aalisarnerup aatsitassarsiornerullu uranisiornertaqanngitsup saniatigut, takornariaqarnerup toqqammavittut annertut ajaappiaalernissaa Naalakkersuisut sulissutigaat ilungersuutigalugulu, Múte B. Egede oqarpoq.

Taamaalilluni aningaasarsiorfinnik nutaanik, suli oqaluuserineqanngitsunik, Naalakkersuisut pilersaaruteqannginnerat erserpoq. Maannali aningaasarsiorfioreersut taakku inerisarneqarnissaat siunnerfigaat.

AAMMA ATUARUK:

Siumut Kuannersuit pillugit itigartitsisoqareersorlu: Aningaasat nutaat suminngaanniissagamik?

Siumut uranitalinnik aamma piiaarusuttoq

Aleqa Hammondip Siumut aatsitassanik aamma uranitalinnik piiaanissamut akuersaartuusoq siusinnerusukkut apersorneqarnermini aamma oqaatigaa. 

- Apeqqutaatinnagu uranitaqarnersoq uranitaqanngitsorluunniit nunatta aatsitassarsiornissaanut Siumut angertuuvoq, siulittaasoq oqarpoq.

Taassumalli erseqqissarpaa inatsimmi killiliussamik isumaqatigiinngitsoqarpat, tassa uranip annertussusigisinnaasaanut tunngasumik, tamanna isumaqatigiinniutaasariaqartoq.

Ernumanngitsoq

Inatsisartuni illuatungiliuttuni partiit annersaata, Naleqqap, siulittaasuata, Pele Brobergip (N), Naalakkersuisut aalajangernerat aamma isoralugu Sermitsiamut siusinnerusukkut isornartorsiorpaa. Taassuma isorinninnermini partiip maanna aatsitassarsiorusunnginnera erseqqissaatigaa, itigartitsinerli avataanit aningaasaleerusuttunut kalluaanissaa aarlerigalugu. Pele Brobergilli ernummataa Naalakkersuisut ernumaginngilaat.

- Avataanit aningaasaliisartut ammatittariaqarpagut. Inatsisigut ersarissut atorlugit suli aningaasaleerusuttoqassasoq Naalakkersuisut upperaat, Múte Bourup Egede oqarpoq.

AAMMA ATUARUK:

SIK: Naalakkersuisut Kuannersuit pillugit nassuiaagitsi

SIK-p siulittaasua, Jess G. Berthelsen, Naalakkersuisut aalajangernerminni tunngavilersuutit saqqummiussaat sullugalugit siusinnerusukkut aamma uparuaavoq. Naalakkersuisut aalajangernerminnut atatillugu nalunaarumminni ima naatsumik tunngavilersuipput:

"Sivitsuinissaq pillugu qinnuteqaatip itigartinneqarnissaa pillugu aalajangiisoqarpoq, tassami sumiiffimmi annertunerusumik ujaasineq peqarfinnik, uranimut inatsimmut naapertuuttumik piiarneqarsinnaasunik, nassaarnermik kinguneqarsinnaassanngitsoq naliliisoqarmat."