SIK: Naalakkersuisut Kuannersuit pillugit nassuiaagitsi

Naalakkersuisut Narsap Iluani, Kuannersuarni, aatsitassanik misissueqqissaarnissamut, Energy Transition Mineralsip akuersissutaa, 2025-p naanerani atuukkunnaartoq, sivitsorneqassanngitsoq juunip 25-ani aalajangerput. 

Naalakkersuisut itigartitsillutik tusagassiorfinnut nalunaarutaata saniatiagut itisiliinersumik tunngavilersuinermik Naalakkersuisut saqqummiussinngillat.

Tamanna SIK-p pitsaanngitsutut nalilerpaa. Naalakkersuisut nassuiaanerusariaqartut kattuffiup siulittaasua isumaqarpoq. Taassuma Naalakkersuisut paasissutissiissutaat ima sullugitigai, allaat qanoq isummernissaminut nalornilluni.

- Annertunerusumik maannakkut oqaaseqarfigisinnaanngilara itigartitsineq silatusaarnerunersoq silatusaannginnerunersorluunniit. Paaseqqissaannginnakku Naalakkersuisut suna tunngavilersuutigisimaneraat sivitsuinnginnissaminnut. 

Isumaqarpit Naalakkersuisut aalajangernertik ersarinnerusumik sumik tunngaveqarnersoq nassuiartariaqaraat?

- Aap. Taamatut isumaqarluinnaqqissaarpunga, Jess G. Berthelsen Sermitsiamut oqarpoq.

AAMMA ATUARUK:

Siumut Kuannersuit pillugit itigartitsisoqareersorlu: Aningaasat nutaat suminngaanniissagamik?

Naalakkersuisut nassuiaataat, SIK-p siulittaasuata sullugisaa aajuna:

"Sivitsuinissaq pillugu qinnuteqaatip itigartinneqarnissaa pillugu aalajangiisoqarpoq, tassami sumiiffimmi annertunerusumik ujaasineq peqarfinnik, uranimut inatsimmut naapertuuttumik piiarneqarsinnaasunik, nassaarnermik kinguneqarsinnaassanngitsoq naliliisoqarmat."

Sermitsiap Aatsitassanut Naalakkersuisoq, Múte B. Egede (IA), isornartorsiuineq pillugu akissuteqartikkumallugu attaveqarfigaa, allaaserisalli suliarineqarnerani akisoqanngilaq.

SIK: Ersiunnaarta

SIK-p ataatsimeersuarnermini aalajangiussai naapertorlugit aatsitassat sunilluunniit akoqaraluartut qallorneqartariaqarput. Aamma uranitallit.

- Uatsinnut una pingaarnerpaavoq saffiugassat qaqutigoortut, nunatta kujataaniittut, nunarsumi pisariaqartinneqartut, atorluarneqarnissaat.

AAMMA ATUARUK:

Kuannersuarni aatsitassarsiornissamik sulissutillit oqartussat aalajangiinerannut: Naapertuilluanngitsuliornerujussuuvoq

- Isumaqarpunga uranimik akulinnut ersinerujorujussuaq taanna qimattariaqaleripput. Nunarput aningaasameerpoq. Pisariaqartippagut, Jess G. Berthelsen oqarpoq.

Kalaallit Nunaanni sulisartut aningaasarsiaat aammalu nunatta karsia aningaasatigut pitsaanerusumik inissisimalissappata suliniutit taamaattut aallartittariaqartut kattuffik isumaqarpoq.

- Nunarput aningaasameerpoq, taamaattumiguna aningaasarsiorfissanik nutaanik maannakkut aallartitsinissaq pisariaqarluinnartoq. 

- Uanga upperinngilara Naalakkersuisut aammalu qinikkat piaaralutik aningaasarsiat qaffannaveersaaraat. Taamaanngilaq. Aningaasameerattaana taamatut inissisimasugut, Jess G. Berthelsen oqarpoq.

Illuatungiliuttut isumaqataanngitsut

AAMMA ATUARUK:

Aatsitassarsiorfik ajorsaqqittoq: Kuannersuarni misissuinerup sivitsorneqarnissaa itigartinneqarpoq

Sulisartut kattuffiat isorinnittuni kisimiinngilaq. Inatsisartuni partiit illuatungiliuttut, Siumut Nalerarlu, Naalakkersuisut aalajangiinerannut aamma isumaqataanngillat.  

Partiip Siumup siulittaasuata, Aleqa Hammondip, Sermitsiamut siusinnerusukkut oqarnera naapertorlugu partii uranitalinnik uranitaqanngitsunillu aatsitassarsiorusuppoq.

- Apeqqutaatinnagu uranitaqarnersoq uranitaqanngitsorluunniit nunatta aatsitassarsiornissaanut Siumut angertuuvoq, Aleqa Hammond oqarpoq.

Naleqqap siulittaasuata, Pele Brobergip partiimi aatsitassarsiornermut piffissami matumani soqutigisaqannginnera erseqqissarpaa. Naalakkersuisulli itigartitsinerat nunarsuarmi suleqatigisinnaasanut tutsuiginanngitsumik takutitsinerusutut nalilerpaat.

Taakkua isornartorsiutaat Aatsitassanut Naalakkersuisup aamma suli akinngilai. Sermitsiaq Naalakkersuisoq apersorniarlugu suli suliaqarpoq.