Naalakkersuisoq imigassamik matusineq pillugu mumittoq: Aalajangerneq tamakkiisumik taperserpara  

Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Maritha Brobergip (A), Naalakkersuisut imigassamik tuniniaanermik sassaalliinermillu akuersissuteqarnerup Kommune Kujallermi unitsikkallarneqarnera pillugu, isorinnittumik allagartalerlugu Facebookkikkut ingerlateqqitaq oqaaseqarfissami sapaatit akunnerisa naaneranni ima allataqarfigaa:

- Uanga aamma killilersuinermut naaggaartuuvunga, Maritha Broberg allappoq.

Tamanna tunngavigalugu Sermitsiap Naalakkersuisoq aperaa Maritha Brobergip Naalakkersuisut aalajangernerat isumaqatiginnginneraa. Naalakkersuisut Kommuni Kujallermi imigassamik aalakoornartortalinnik tuniniaanermut sassaalliinermullu inerteqquteqalernerat tamakkiisumik taperserlugu Sermitsiamut maanna allappoq. 

- Ersarissaatigissuara oqariartuutigalugulu; naalakkersuisut akornanni pisumut aaliangiinermullu isumaqatigiinngittoqanngimmat, aammalu naalakkersuisut aaliangernerat tamakkiisumik taperserakku, Maritha Broberg allakkatigut Sermitsiamut akissuteqarpoq.

AAMMA ATUARUK:

Naalakkersuisoq Naalakkersuisut imigassamik matusineranni: Killilersuinermut naaggaartuuvunga

Naalakkersuisup akissutaata Sermitsiaq amerlanerusunik apeqqutissaqalertikkaluarpaa. Taamaattumik Naalakkersuisumik oqarasuaatikkut apersuinissaq kissaatigeqqillugu Sermitsiaq Naalakkersuisup allattaanut noqqaassuteqaqqippoq. Tamannali tunngavilersuutitaqanngitsumik itigartinneqarpoq. Apersuinissamut itigartitsisoqassappat tamanna sumik tunngaveqarnersoq Sermitsiap Naalakkersuisoqarfimmit paasissallugu kissaatigigaluarpaa. 

- Naalakkersuisoq Maritha Broberg oqarasuaatikkut apersorneqarnissaanik qinnuteqaat akuersaarniarnagu aalajangerpoq.

- Naalakkersuisoq suliaq pillugu allakkatigut akissuteqareerpoq, tassanilu erseqqissarlugu Naalakkersuisut akornani aalajangiinermut isumaqatigiinngittoqanngitsoq, aammalu Naalakkersuisut aalajangiinerat tamakkiisumik taperserlugu, Naalakkersuisup allattaa Sermitsiamut allappoq.

Naalakkersuisoqarfik: Nammineq inuttut oqaaseqarpoq

Naalakkersuisut Kommune Kujallermi killilersuutit, akuereqqammisatik, tallimanngormat unnukkut saqqummiuppaat. Naalakkersuisoq killilersuinermut naaggaartuulluni Facebookkikkut sapaatit akunnerisa naaneranni allaqqaaraluarpoq.

Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Naalakkersuisut imigassamik tuniniaanermik sassaalliinermillu akuersissuteqarnerup kommunimi unitsikkallarneqarnera pillugu, isorinnittumik allagartalerlugu Facebookkikkut ingerlateqqitaq oqaaseqarfigaa. Tassani killilersuutinut isumaqataannginnini ersersippaa.

Taamali allatani Sermitsiap ataasinngornermi saaffiginnereernerata kingorna peersimagaa, Sermitsiap paasivaa.

Naalakkersuisup allattaata allagai naapertorlugit naalakkersuisup "nammineq oqaaserisai" oqallinnermi sanguffigineqassanngitsut, Naalakkersuisup kissaatigaa.

- Naalakkersuisup maanna annerusumik oqaaseqaateqarusunnginneranut pissutaavoq, kissaatigimmagu sammisaq Naalakkersuisut aalajangiinerannut taassumalu siunertaanut tunngatinneqassasoq, nammineq Facebookimi oqaaseqaataanut sangutinneqassanani.

Naalakkersuisut Siulittaasuata naalakkersuisuutitani oqaaseqarfigiumanngikkaa

Sermitsiap Naalakkersuisut Siulittaasuat, Jens Frederik Nielsen (D), Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup allataa pillugu ataasinngornermi attaveqarfigaa. Naalakkersuisut Siulittaasuata Naalakkersuisunut ilaasortap allataa toqqaannartumik qisuariarfiginngilaa. 

Apeqqut: Naalakkersuisut Siulittaasuata Isumaginninnermut, Suliffeqarnermut Ilaqutariinnut Nunamullu Namminermut Naalakkersuisup, Kommune Kujallermi imigassamik nioqquteqarnerup sassaallernerullu matugallarneqarneranut qisuariaataa qanoq oqaasissaqarfigaa?

- Kommune Kujalliup imigassamik tuniniaanerup sassaallernerullu matunissaanik piumasarinikuusaa Naalakkersuisut taperserlugu iliuuseqarfigaat, Naalakkersuisut Siulittaasuat allappoq.

Taassumali Maritha Brobergip allataa toqqaannartumik qisuariarfiginngilaa aamma Sermitsiamit aperineqaqqikkaluarnermi kingorna akissutini apeqqummik akinninngitsoq innersuussutigiinnarpaa.