Naalakkersuisoq kigutit narlorissarneqartarnerat pillugu: Pitsannguutissanik neriorsuisinnaanngilanga 

Kigutit narlorissarneqassappata tamanna meeqqanut ukiumut 40-it missaanniittunut Nuummi periarfissaavoq. Nuup avataani meeqqanut inersimasunullu kigutinik narlorissaasoqarsinnaanngilaq. Tamanna pitsaasuunngitsoq, Peqqissutsimut Naalakkersuisoq maanna nassuerpoq.

- Nuna tamakkerlugu iluatsiffeqanngitsumik killiffeqarnerput nassuerutissaavoq, Anna Wangenheim (D), Sermitsiamut oqarpoq.

Sermitsiap Ilulissani innuttaasoq, aamma Avannaata Kommuniani kommunalbestyrelsimut ilaasortaq, Paarnannguaq Mathiassen, Nuup avataani najugallit kigutaasa narlorissarneqartarnissaannut periarfissat pitsaanerulernissaannik ujartuisoq, juulip 22-ani oqaluttuaraa. 

AAMMA ATUARUK:

Kigutit Nuup avataani narlorissarneqartarnissaat kissaataasoq

Nuulli avataani najugallit kigutaasa narlorissarneqartalernissaat pillugu periarfissat pitsaanerulissanersut, Naalakkersuisup maanna akisinnaanngilaa.

- Tigussaasumik oqarsinnaanngilanga kigutilerisut immikkut ilisimasallit amerlineqalerput, Anna Wangenheim oqarpoq.

Kigutilerisoqarneq pillugu aaqqissuusseqinnermik maannakkut suliaqartoqartoq, taassuma ilisimatitsissutigaa.

Aaqqissuusseqqittoqarnissaa pillugu suliallit suliaminnik ukioq naatinnagu naammassinninnissaat naatsorsuutaavoq. Taakkua innersuussaqassapput. Innersuussutit politikkikkut oqallisigineqarnissaat naatsorsuutaavoq. Innersuussutillu taakkua Naalakkersuisup sulinermini utaqqimaarpai.

Kigutilerisut namminersortut ulapeqisut

Kigutit narlorissarneqartarnissaannut periarfissat pitsanngorsarumallugit Naalakkersuisup kigutilerisut namminersortut oqaloqatigisimagaluarpai. Kinguneqanngitsumik. 

- Kigutilerisut namminersortut oqaloqatiginikuuakka. Taakkua aamma suliassaqareeqaat. Ilaatigullu allaat pisortanik suleqateqarnissaminnut nukissaqanngillat. Taamaattumik kissaatip taassuma tamanut atuutsinniarnissaa ilungersunarpoq, Naalakkersuisoq oqarpoq.

Kigutinik narlorissaasarneq pisortat kigutileriffiini periarfissaajunnaassasoq 2019-imi aalajangerneqarpoq. Kigutit nakorsaannik immikkut ilinniarsimasunik pissaaleqineq taamanikkut tunngavilersuutit ilagaat. Pisortat kigutileriviini kigutinik narlorissaasarneq Nuummi 2021-mi atulersinneqaqqippoq. Taamanimiilli narlorissaasarnerup Nuup avataani periarfissaaleqqinissaa oqallisaajuartarpoq. Ukiut arfineq-marluk qaangiussimalerput. Ullorli manna tikillugu suli periarfissanngoqqinnikuunngilaq. 

Peqqissutsimut 2020-mi Naalakkersuisoq, Martha Abelsen (S), taamanikkut nalunaarpoq kigutinik narlorissaasarneq periarfissanngoqqissappat tamanna ukiumut 20 millionit koruuninik nunap karsianut akeqassasoq.

Tamannalu nunatta maanna akissaqarfigigaluaraa Anna Wangenheim oqarpoq.

- Aningaasassaqarpoq sulisussalli amigaataapput, Naalakkersuisoq oqarpoq.