Naalakkersuisunngortitsiniarnermut isumaqatiginninniarnerit ataasinngornermi nanginneqarpoq
Naalakkersuisunngortitsiniarnermik isumaqatiginninniarnermi siuttuusoq kiisalu ministeriunerugallartoq Mette Frederiksenip Danmarkimi naalakkersuisunngortitsinissaq pillugu isumaqatiginninniarnerit ataasinngornermi ingerlatiinnarpaat.
Radikale Venstre tassaapput Marienborgimi Københavnip avannaaniittumi pulaartut ullumikkut ilaat. Marienborg tassaavoq ministeriunerup danskip pisortatigoortumik najugaqarfia.
Foto: Emil Nicolai Helms/Ritzau Scanpix
Naalakkersuisut
nutaat pilersinneqarnissaat pillugu isumaqatiginninniarnerit
ataasinngornermi ualikkut ingerlateqqinneqarput.
Naalakkersuisunngortitsinissamik isumaqatiginninniarnermi siuttuusoq
Mette Frederiksen (S) Marienborgimut ataatsimiigiaqqusivoq.
Tamanna Socialdemokratiet tusagassiutitigut nalunaarummi
ilisimatitsissutigaa.
Isumaqatiginninniarnerit marlunngornermi nangeqqinneqassapput,
Mette Frederiksen ministeriuneqarfimmi ataatsimiinnissamut
qaaqqusivoq.
Partiit sorliit qaaqquneqarnersut allassimanngilaq, aamma
ataasinngornermi ataatsimiinnermi tusagassiortut iseqqusaanngillat.
Partiit Radikale Venstre aamma Alternativet tusagassiuutinut
uppernarsaraat ataatsimiinnermi peqataassallutik. TV 2 naapertorlugu
Alternativet marlunngornermi isumaqatiginninniartussaavoq, Radikale
Venstrelu qaqugu isumaqatiginninniarluni
ataatsimeeqatigineqassanersoq ilisimaneqanngilaq.
Naalakkersuisooqatigiinnissamik isumaqatiginninniarnerit poorskip
ulluini uninngatikkallarneqarput, poorskilli aappaani
isumaqatiginninniarnerit aallarteqqinneqarput.
Folketingimi pissutsit ajornakusoortut
Naalakkersuisunngortitsinissamut isumaqatiginninniarnermi siuttoq
poorskikkunni sulinngiffeqarpoq, taassumalu Socialdemokratit, SF
Radikalellu naalakkersuisunngortitsisinnaanerannik kissaatigaa.
Partiilli taakku pingasut 68-inik ilaasortaatitaqarlutik
amerlanerussuteqarsinnaanngillat, taamaattumik partiit allat arlallit
isumaqatiginninniarfigineqarput.
Qinersinermi talerperliit 77-inik ilaasortaatitaqarput,
saamerlerillu 84-inik. Moderaterne 14-ninik qinigaatitaqartut.
Taamaattumik Moderaternemi ilaasortat,
amerlanerussuteqalernissamut tassa naalakkersuisooqatigiinni
ilaasortat 90-nngornissaanut aaliagiisuussapput.
Partiip siulittaasuata Lars Løkke Rasmussenip (M)
sapaatip-akunnerata naannginnerani kajumissaarivoq "poorskimi
sulinngiffeqarneq eqqarsaqqissaarnermut atorneqassasoq“.
Pingasunngornermi Moderatit nalunaaquttap-akunnerini arlalinni
Marienborgimiipput. Tassani aamma
naalakkersuisunngortitsisoqarnissaanik
isumaqatiginninniartoqarneranut qaaqqusaapput.
Naalakkersuisunngortitsiniarneq "ajornakusoortoq"
taassuma eqqaavaa. Taamaattumillu qiterliunerusumik
naalakkersuisooqatigiit pilersinneqarnissaat Socialdemokratiet,
Venstre aamma De Konservativenut ataqqineqarnissaa kaammattuutigaa.
