Naalakkersuisup Nukissiorfiit nunani allani aningaasassarsiulerai

Avatangiisinut, Pinngortitamut, Nukissiutinut, Ilisimatusarnermullu Naalakkersuisoq, Jørgen Rosbach (D), apeqqutinik siumoortumik pissarseqqaanngikkaluarluni Sermitsiamit maanna apersorneqarsimalerpoq. Taassuma Nukissiorfiit siorna 32,7 millionit koruuninik amigartoortoq politikkikkut akisussaaffigaa. Amigartooqqinnerlu naammagisimaanngilaa.

- Amigartooruteqarneq namminermini soorunalimi ilorrisimaarnartuunngilaq. Illuatungaani sinneqartoorsimassagaluarpat nuannaarutissaasimassagaluarpoq, Naalakkersuisoq Sermitsiamut oqarpoq.

Nukissiorfiit 2023-imi 86,2 millionit koruuninik 2024-milu 60,2 millionit koruuninik aamma amigartoorput. Ukioq mannalu aamma 25-50 millionit koruunillu akornanni amigartooqqinnissartik naatsorsuutigalugu 2025-mut ukiumoortumik nalunaarumminni allapput.

AAMMA ATUARUK:

Nukissiorfiit millioninik marlunnik kisitsisitalinnik amigartooqqittoq

Akit nunami tamarmi assigiinnerat peqqutaasoq

Suliffeqarfiup aningaasarliornera Nukissiorfinni atuisut atuinerminnut akiliutaasa assigiinnerannik peqquteqartutut Naalakkersuisumit nalilerneqarpoq. Naalakkersuisut Nukissiorfinni atuisunut akit, nuna tamakkerlugu assigiissasut, ukiualuit matuma siornatigut aalajangerput. Tamannalu suliffeqarfiup aningaasaqarneranut ajutoortitsisuusoq Naalakkersuisoq naliliivoq.

- Akit appasippallaarneri immaqa appasippallaarsimapput, taamaattumik aserfallatsaaliuinermut aningaasaleeqqinnissamik kinguneqarpoq. Aningaasaqarnerup ajalusoornera tassaniittutut oqaatigineqarsinnaavoq, Jørgen Rosbach oqarpoq.

Nukissiorfiit ukiumut aningaasarliornermik saniatigut pigisamik nalillit aserfallatsaalinissaannut 1,8 milliardit koruuninik aamma amigaateqartut siornatigut ilisimatitsissutaareerpoq. Atuisut 2028-p tungaanut ukiumut 7 procentimik akiliinerusalernissaat siorna aamma aalajangerneqarpoq. 

Nunap karsia akissaqanngitsoq

Suliffeqarfiulli aningaasarliornera atuisut kisimik oqimaaqatigiisilersinnaanngikkaat maanna nassuerutaavoq. Taamaammallu nunat allat milliardilikkaanik tunniussassaqarnersut maanna paasiniarneqartussanngorpoq.

- Nunatta avataanit tapiissutit ujartornissaat, inuttaasut eqqornissaannit, suliniutigut nukigullu taakkununnga atornerorusuppagut. Uangalu iliuusererusutara tullinnguuttoq tassaavoq Danmarkimi ministerit nutaat inisseqqammersut naapinnissaat. Tassani paasissuarput naalagaaffeqatigiinnerup ataani qanoruna aningaasat iluarsartuusseqqinnermut imaluunniit allatigut atorsinnaasagut nassaarisinnaagigut. 

- Taannaannaanngitsoq. EU-mut suleqateqarnerput qallunaat nunaat aqqutigalugu piummat, tassuunakkut aningaasat eqqartukkagut nassaarerusunneruakka. Soorunami iluatsinnissaa naatsorsuutigerusuppara. Nalunngilarami suleqatigiinneq pitsaanerusoq danskinit anguneqarusuttoq, Naalakkersuisoq oqarpoq.

Aningaasat ujartorniakkatit nunatta karsiani nassaarisinnaanngilisigit?

- Nunap karsia puilasunik aningaasaateqaraluarpat ajornartussaassanngikkaluarpoq. Massakkutulli inissisimatilluta tamanna ajornakusoorpoq, taanna oqarpoq.

Isorinnittut akigai

Sermitsiap Naalakkersuisoq akisussaasoq, Nukissiorfiit amigartooqqinnerat pillugu sapaatit akunnerisa siulianni apersorumasarpaa. Naalakkersuisorli apersorneqarnissaminut periarfissaqanngitsoq allakkatigulli akisinnaasoq naalakkersuisoqarfianit paasissutissiissutigineqarpoq.

AAMMA ATUARUK:

Naalakkersuisup apersoqqunnginnera illuatungiliuttut isoraat

Tamanna Inatsisartuni illuatungiliuttut, Jens Napãtûp (N) aamma Erik Jensenip (S), Sermitsiamut tallimanngornermi sakkortuumik isoraat. Illuatungiliuttut oqarnerat naapertorlugu Naalakkersuisup tusagassiorfimmit apersorneqarnissamut periarfissaqannginnera allakkatiguinnarli akerusunnera tamat oqartussaaqataanerannik innarliineruvoq atuuffimmullu piukkunnannginnermik takutitsinerulluni. 

Isornartorsiorneqartoq isorinnittunut akissuteqarpoq.

- Illuatungiliuttut isornartorsiuinerat tusaatissatut tiguara. Pissusissamisoorpoq isorisaqarnerminni isummaminnik annissinerat, Jørgen Rosbach oqarpoq.

Taassuma illuatungiliuttut isornartorsiuinerat apersorneqarnissamut periarfissaqalerneranut peqqutaanersoq pillugu apeqqut toqqaannartumik akinngilaa.