Naalakkersuisup ulluni tallimani angalanerani 82.000 koruuninik aningaasartortoqartoq

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), Inatsisartut upernaakkut ataatsimiinnerata nalaani Islandimiippoq. Tamanna Inatsisartunut ilaasortap, Isak Johannesenip (N), paragraf 37 naapertorlugu Naalakkersuisumut apeqquteqaataata akissutaani atuarneqarsinnaavoq.

- Ulluni 8-12. juni sulininnut atatillugu angalavunga, Naalakkersuisoq allappoq.

Inatsisartut upernaakkut juunip 18-ani naggataamik ataatsimiipput.

Nivi Olsenip Islandimut angalanermini ilisimatusarfiit naalakkersuisoqarfiillu pulaagai makkuupput:

• Bifröst University

• Kulturimut, nutaaliornermut ilinniartitaaneranullu ministereqarfik

• Verkmenntaskólinn á Akureyri

• University of Akureyri

Naalakkersuisup angalaneranut tassunga Isak Johannesen kisimi apeqqusiinngilaq. Naalakkersuisuutitaqartunut ilaasortap, Nivi Rosingip (IA), Naalakkersuisup angalasimaneranut tunngasunik aamma apeqquteqarpoq. Taassuma angalaneq qanoq akeqarnersoq paaserusutaanut ilaavoq.

- Atorfimmi suliassaqarluni angalanermi aningaasartuutit tamakkerlugit uannut atorfilittanullu marlunnut 82.687,95 kr.-niupput, Naalakkersuisoq allappoq.

Atorfilittat marluk tassaapput Naalakkersuisoqarfimmi pisortaq aamma Naalakkersuisup allattaa.

Inatsisartunut ilaasortat: Suna siunertaava?

Naalakkersuisut sulisitsisuisa, tassa Inatsisartut, suli upernaakkut ataatsimiittoqarnerani angalaneq ilaasortat apeqquteqartut marluk apeqquserpaat. Taamaattumik angalaneq sumik tunngaveqarnersoq paaserusutaannut ilaavoq.

- Tikeraarnerup siunertaraa ilinniarfinnit alimasissumik ilinniartitsineq pillugu misilittakkanik paasisaqarniarneq, tassunga ilanngullugit pitsaassutsimik qulakkeerinninneq, ilinniartunik uniinnartitsinaveersaarneq aammalu ilinniartitsinermik aaqqissuussinerit allanngorartut ineriartortinneqarnerat.

AAMMA ATUARUK

Jess Svane: Inatsisartut pimoorussinerugitsi

- Paasissutissat pissarsiarineqartut Kalaallit aamma Nunaanni misilittakkat alimasissumik nukittorsarneqarnissaanut suliat ingerlaqqinneranni atorneqassapput, Naalakkersuisoq Isak Johannesenimut allappoq.

Angalaneq Inatsisartut ataatsimiinnerisa nalaaniimmat ilumut pisariaqarnersoq pillugu Nivi Rosing aamma aperaaq. 

- Inatsisartut upernaakkut ataatsimiinnerat ingerlagaluartoq, piffissami pineqartumi suliassaqarluni angalanerup naammassinissaa pisariaqarsimasoq naliliivunga. Islandimi suliffeqarfiit attuumassuteqartut piffissami sulinngiffeqangajalerneranni orninneqarsinnaanerat eqqarsaatigalugu angalanissaq pilersaarusiorneqarpoq. Taamaattumik angalanermik kinguartitsisoqassagaluarpat suliamik ingerlatsinermi malunnaatilimmik kinguaattooratarsinnaaneranik kingunerisinnaavaa, Naalakkersuisoq allappoq.

Ilisimatitsinngitsoq

Naalakkersuisoq angalaniarluni Inatsisartunut ilisimatitsisimanngitsoq, Nivi Rosing aamma allappoq. Inatsisartunullumi ilaasortat ilisimatinnissaat Naalakkersuisup periarfissaqarfigisimanagu nassuerutigaa. Angalanissallu ullua nallermat aatsaat angalaneq piviusunngorsinnaasutut nalilerneqarpoq.

- Atorfimmi suliassaqarluni angalaneq pilersaarusiorneqarsimasoq, piffissap ingerlanerani aaqqissuunneqartoq, uani pineqarpoq. Angalanissaq ullormi tassani aatsaat aallarnissamut piffissaq inaarutaasumik aalajangersarneqavippoq, tassanimi suliffeqarfinnut attuumassutilinnut isumaqatigiissutit aatsaat tamarmik inissinneqarlutik iluatsimmata. Taamaattumik ileqquusutut Inatsisartunut angalanissap nalunaarutiginissaata angumerinissaanut periarfissaqarsimanngilaq, Naalakkersuisoq allappoq.

Jess Svane (S) Inatsisartut upernaaq manna ataatsimiinnerat naggaserlugu partiini sinnerlugu oqaaseqarpoq. Inatsisartut ataatsimiinnerisa nalaanni angalasarnerit takkutinngitsoortarnerillu pillugit ilaatigut apeqqusiivoq, inatsisiliornermi sulineq pimoorunneqarnerusariaqartoq tassuma aamma oqaatigaa.