Naalakkersuisut nunap karsia aappaagu 89 millionit koruuninik amigartoortussatut missingersuusioraat

Inatsisartunut ilaasortat aningaasanut aappaagumut inatsisissaq inersuarmi siullermeerlugu suliaralugu maanna aallartippaat. Aningaasaqarnermut Naalakkersuisoq, Aqqaluaq B. Egede (IA) suliaq aallartillugu sulisitsisuminut, tassa Inatsisartunut, saqqummiussivoq. 

Inatsisartunut maanna saqqummiussai tusagassiortunut katersortitsilluni aggustip 20-ani saqqummiussaanit, taassumalu kingorna Danmarkip EU-llu Kalaallit Nunaannut aningaasaliissutaannit, kisitsisit eqqarsaatigissagaanni allaanerungaartoqanngilaq.

Nunatta karsia ingerlatsinermi, sanaartornermi taarsigassarsinermilu aappaagu 89 millionit koruuninik amigartoortussatut Naalakkersuisut missingersuusiorpaat. Tamannali Inatsisartut inatsisissamik suliaqarneranni, Naalakkersuisumillu ukiap ingerlanerani isumaqatigiinniarneranni allanngorataannaavoq.

AAMMA ATUARUK:

Aningaasanut inatsisissatut siunnersuut: Ilulissani inuussutissarsiornermik ilinniarfimmut nutaamut millionit, akileraartarnermullu aaqqissuussaaneq ajuloornissaaniit annaanneqassaaq

Nunap karsia ukiuni missingersuusiorfiusuni tullerni sisamani inatsit naapertorlugu sinneqartoortussatut missingersuuteqartussaatitaavoq. Tamannalu Naalakkersuisut naammassivaat. Tassa 2027-imit 2030-mut ukiuni taakkunani angusaq katillugu 80 millionit missaannik sinneqartoorfiusussatut Naalakkersuisut missingersuusiorpaat. 2027-imi 89 millionit koruuninik amigartoorneq, 2028-im 5 millionit koruuninik amigartoorneq, 2029-imi 130 millionit koruuninik sinneqartoorneq 2030-imilu 45 millionit koruuninik sinneqartoorneq.

- Taamaalilluni siunnersuutip ukiut sisamat ingerlaneranni minnerpaamik oqimaaqatigiittoqarnissaanut piumasaqaat naammassivaa. Kisianni ukiut marluk siulliit amigartoorfiupput, ukiullu marluk kingullit sinneqartoorfiullutik. Taamaattumik aningaasartuutit suli sukannersumik aqunneqartariaqarput, aamma Nunatta Karsiata akiligassaminik akiliisinnaanissaa qulakkeertariaqarlugu, Aqqaluaq B. Egede Inatsisartut oqaluttarfiannit oqarpoq.

Pisisinnaassuseqarnerulerneq innuttaasut tamarmik maluginngikkaat

Aningaasaqarnermut Naalakkersuisup naliliinera naapertorlugu Kalaallit Nunaanni aningaasaqarneq pitsaaneruleriartorpoq. Tassani aalisakkat akigissaarnerat sumiiffippassuarnilu inuit sulisut amerlanerat ilaatigut tunngavilersuutigai. 

Aningaasaqarnermut Siunnersuisoqatigiit ukiaq manna nalunaarusiaminni inerniliussaat tassaavoq innuttaasut pisisinnaassusaat siorna 6 procentit missaannik qaffassimasoq, ukioq mannalu aamma 5 procentit missaannik qaffaqqissasoq naatsorsuutaasoq. 

- Tamanna ilaatigut nassuiarneqarsinnaavoq aalisakkat qaleruallillu akii nunani allani nioqqutissat pisiarisartakkatta akiinut sanilliullugit annertunerusumik qaffassimanerat. Tassa nunanut allanut tuniniaanitsinnut amerlanerusunik pissarsisarpugut, aningaasallu atorlugit amerlanerusunik pisiaqarsinnaalerluta, Aqqaluaq B. Egede oqarpoq.

AAMMA ATUARUK:

N aamma S: Pilersitsiviunngilaq aaqqitassaqaqaarlu

Tamannali innuttaasut ataasiakkaat aningaasaateqarnerulernerannik isumaqanngitsoq, taassuma aamma erseqqissarpaa. Nunalli karsia pitsaanerusumik kaaviiaartitsilerpoq. 

- Tamanna isumaqanngilaq ilaqutariit tamarmik assinganik amerlanerusunik aningaasaateqalersimasut. Kisianni inuiaqatigiinni aningaasaqarnermik nukittorsaataavoq. Aalisakkat akiisa pitsaasut aamma Nunatta Karsianut isertitat akileraarutinit akitsuutinillu amerlanerulernissaat naatsorsuutigineqarsinnaalersippaat, Naalakkersuisoq oqarpoq.

Naalakkersuisoq: Suli isumallualinngilanga

Taassuma aningaasaqarneq aningaasarsiornerlu pitsaasumik siuariartortutut nalileraluarlugit suli isumallualinnginnini isertuutinngilaa. Tassani nunatta avataani pisut, soorlu sorsunnerit peqqutaasutut Naalakkersuisup nassuiarpai.

- Maannakkut pissutsit ataavartumik isertitanik tunngavissatut isumalluarnartumik tunngavissaqartitsinngillat. Nunani tamalaani pissutsit allat suli aarlerinartuupput. Tamanna puigornaveersaartariaqarparput, naak maanna aningaasaqarnerput ingerlalluaraluartoq, Aqqaluaq B. Egede oqarpoq.

Taassuma partiit allannguutissatut siunnersuuteqassagunik aningaasalersuinissartik ilanngullugu siunnersuutigissagaat kaammattuutigaa.

- Isumaqatiginninniarnerni pingaaruteqartorujussuussaaq aningaasartuutinik nutaanik siunnersuutit aningaasalersorneqarnissaannut aalajangersimasumik siunnersuuteqartoqartarnissaa, Naalakkersuisoq oqarpoq.

Aningaasanut aappaagumut inatsisissap aappassaaneernissaa oktobarip 26-ani pingajussaaneernissaalu novembarip aqqaneq-aappaanni pisussatut naatsorsuutigineqarput.