Nanortalimmi toqutsinermut atatillugu inuit sisamat unnerluutigineqartut

Nanortalimmi angutip 37-nik ukiullip toquneranut atatillugu Kalaallit Nunaanni Politiit inuit sisamat tigusaraat toqutsisimasutullu unnerluutigalugit. Arnat marluk 43-nik aamma 22-nik ukiullit kiisalu angutit marluk 18-inik ukiullit pineqarput.

Kalaallit Nunaanni Politiit tusagassiutinut taama nalunaaruteqarput.

AAMMA ATUARUK

Nanortalimmi pasinartumik toqusoqarsimaneranik politiit misissuisut

Unnerluutigineqartut sisamat tallimanngornermi unnukkut matoqqasumik Kujallermi Eqqartuussivimmut sassartinneqarput, taakkualu ilaat pingasut ulluni 27-ni tigummigallagassanngortinneqarput.

Eqqartuussisut aalajangerput arnaq 43-nik ukiulik nalunaaquttap-akunnerini 72-ini tigummigallarneqassasoq.

- Paasiniaaneq annertooq suli ingerlavoq, suliarlu pinartutut suli suliarivarput. Paasiniaaneq ingerlasoq pissutigalugu susoqarsimanera pillugu, aammalu suut tunngavigalugit unnerluussinerit pinersut oqaaseqarsinnaanngikkallarpugut, vicepolitiinspektør Malik Sandgreen oqarpoq.

Kalaallit Nunaanni Politiit toqusut timaannik misissuisartumik pinerluttulerinermilu teknikerimik Danmarkimit Nanortalimmi misissuinernut ikiuukkiartortussanik aallartitsipput.

Toqungasup nassaarineqarfiani politiit sulinerat suli ingerlavoq, najugaqarfillu suli pallinneqartussaajunnaarlugu assersorneqarsimavoq. Politiit assersuiffigisaat innuttaasunit ataqqineqaqqullugit politiit kaammattuuteqarput.

Paasissutissanik suliamut attuumassuteqarsinnaasunik peqaruit Kalaallit Nunaanni Politiit pigaartuinut saaffiginnissinnaavutit oqarasuaat 701448 sianerfigalugu.