Nerisassanik maangaannartitsineq Pisiffiup 2025-mi annikillisikkaa

Kalaallit Nunaanni ulluinnarni nioqqutissat ungasissorsuarmiit assartorneqartarput, taamaattumillu pisiniarfiit nioqqutissat piffissaq sivikitsoq atorlugu tuniniaasariaqartarput, iginneqannginnerini.

Taamaattumik Pisiffik ukiuni arlalinni nerisassanik maangaannartitsisarneq, annikillisinniarlugu suliniuteqarpoq. Suliffeqarfissuup 2024-miit 2025-mut kaaviiaartitami, 1,31 procentianit 0,92 procentianut nerisassat maangaannartinneqartartut ikilisippai.

Pisiffimmi nittarsaassinermut, attaveqaqatigiinnermut aamma CSR-imut pisortaq Tina Alibina Hansen Sermitsiamut taama oqarpoq.

Kilot tonsitulluunniit qassiunersut, taassuma kisitsisaatiginngilai.

Nioqqutissanit inniminniinerit, ullunik aqutsineq piffissamilu eqqortumi akit appartinnissaat Pisiffiup ukkatarivai.

- Ineriartorneq angusaqarnerpullu pisiniarfinni pivoq. Suleqatitta ullut tamaasa, qanoq amerlatigisunik inniminniisoqartarnersoq, nioqqutissallu qanoq ilinerani pisiniarfimmiit peerneqartarnersut, qanoq ilineranilu akikillilerneqartassanersut eqqumaffiginerulersimavaat, Tina Alibina Hansen allappoq.

Nerisassanut maangaannartinneqartartunut eqqaaviit, pisisartunit tigulluarneqarsimaneri aamma angusamut matumani pisooqataanerarpaa.

AAMMA ATUARUK

Pilersuisup nerisassat 11,2 millionit koruuninik nalillit igiinnarai

Iffiukkanik imminut pilersorusunneq

Pisiffiup nerisassat maangaannartinneqartartut kaaviiaartitami 0,6 procentiinut appartikkusuppai.

Suliniutitik maannamut ingerlatiinnassavaat, silassorissuusiamillu atuinertik pioreersoq siunissaq ungasinnerusoq eqqarsaatigalugu attatiinnassavaat.

Atuisunik apeqqarissaarnerup 2026-mi ingerlanneqarnerani, ersarissivoq nerisassat maangaannartinneqartartut Pisiffimmi initoorujuusut, Tina Alibina Hansen taama ilisimatitsivoq. 47 procentit nerisassanik maangaannartitsinnginnissaq pingaartippaat, pisiniarfinni nunaqavissunit tunisassianik amerlanerusunik nioqquteqalernissaanik kissaateqarneq tassunga tulliulluni — taakkulu marluk imminnut ataqatigiipput.

Nuummi iffiorfinniit, iffiukkat iffiugassallu allat nioqqutissiarineqartut piffissap ingerlanerani, sineriammi pisiniarfinnut assartorneqartalerneqarnissaat Pisiffimmit pilersaarutigineqarpoq. Taamaasilluni tamakkiisumik imminut pilersorneq anguneqassaaq.