Nunatta Eqqartuussisuuneqarfiata pineqaatissiissut allanngortippaa: Anaanaminik toqutsisoq ukiuni arfineq-marlunni pineqaatissinneqarsimasut inissiisarfianiittussanngortinneqarpoq

Nunatta Eqqartuussisuuneqarfiata arnaq 26-nik ukiulik Tasiilameersoq ukiuni arfineq-marlunni tallimanngormat ualikkut pineqaatissinneqarsimasunut inissiisarfimmiittussanngortippaa. Taamaalilluni Nunatta Eqqartuussisuuneqarfiata Eqqartuussisoqarfik Sermersuup arnap ukiuni arfineq-pingasuni pineqaatissinneqarnera allanngortippaa.

Nunatta Eqqartuussisuuneqarfiani arnaq toqutsisutut suli pisuutinneqarpoq, anaanani 55-inik ukiulik arlaleriarluni savimmik 2025-mi juunip 26-anni kapoorsimavaa.

Arnat taakkua marluk ataatsimut najugaqarfigisaanni, pisimasoq sakkortooq Tasiilami inissiani pivoq. Arnaq pineqaatissinneqartoq oqaluttuarpoq, anaanaasoq nammineerluni iggavimmiit savilisarluni aggersimasoq.

- Taamaasioqqullunga oqarfigisaqattaaginnavippaanga, 26-nik ukiulik oqaluttuarpoq.

AAMMA ATUARUK

Politii eqqartuussivimmi: Assingusumik takunikuunngisaannarpunga

Ilisimannittut arlallit anaanaasup toqunissaminik annertuumik kissaateqarnera eqqartuussivimmi uppernarsarpaat. Tamanna aalakoornermi ajornartorsiut takkuttarpoq, arnallu taakku marluk unnuaq taanna aalakoorput. Ilinniarnertuunngorniarfimmi misilitsinneq pisup nalaani nalliuttorsiutigaat.

Kapooreqqinnginnermini ikiortissarsioqqaartoq

Pineqaatissinneqartoq nassuiaanera naapertorlugu anaanani kapoorsimavaa. Taamaasisoq najukkami saniliminnut orniguppoq politiinullu sianeqqusilluni, uterpoq kapooreqqilerlunilu.

Arnap 26-nik ukiullip ilaannakortumik pisuunini nassuerutigaa. Anaanaminik kapoorisimanini nassuerutigaa, toqutsisimasutulli pisuunnginnerarpoq, illersuisuata sakkortuumik nakuusersimanera pissutigalugu eqqartuunneqarnissaa kissaatigaa.

Nunap immikkoortuani eqqartuussiviup arnaq martsimi eqqartuuppaa, unnerluussissullu naapertorlugu 75-sit missiliorlugit savimmik kapoorisimanera eqqaaneqarpoq. Nunatta Eqqartuussisuuneqarfia pisoq ingasannerutinngilaa. Eqqartuussisup oqaatigaa ikit pineqartut kapisinerunngitsoq. Tamanna pineqaatissiissut ukiunik arfineq-marlunnik sivikillisinneqarneranut pissutaasimagunarpoq, Kalaallit Nunaannilu toqutsisut taama pineqaatissineqartarput.

Aamma pineqaatissinneqartup siornatigut pineqaatissinneqarsimannginnera pissutaasimasinnaavoq. Arnaq 26-nik ukiulik nalinginnaasumik silassorissuseqarpoq niaqulaartuunanilu, nakorsat inerniliipput. Taamaattumik aamma nalinginnaasumik pineqaatissinneqarsimasut inissiisarfianniittussanngortinneqarsinnaavoq.