Nunatta iluani angalasut security avaqquttalersinnaaneraat Greenland Airportsip misissoraa

Dash 8-t marluk Nuummiit Ilulissiartussat sapaatiummat aallarsinnaanngillat. Air Greenlandip timmisartuisa kinguaattoornertik peqqutigalugu securityp ammanera angumerinngimmassuk taama pisoqarpoq. Taamaattumik angalasut 140-t missaaniittut Nuummi Ilulissanilu ingerlariaqqinneq ajulerput.

Nunatta iluani angalasut security avaqqullugu aallariartorsinnaasuuppata pisut assingusut pinngitsoortinneqarsinnaagaluarput. Aaqqiissutissarlu taanna Greenland Airportsip maanna misissorpaa.

- Angallannermut Aqutsisoqarfik aaqqiissutissarsiorluta oqaloqatigaarput. Tassani security avaqqullugu Gate 6-mukartalernissaat eqqartorlugu, Greenland Airportsimi pisortaaneq Jens Lauridsen oqarpoq.

Gate 6 aaqqiissutaasinnaavoq

Gate 6 tassaavoq nunatta iluami angalasut Nuummut tikikkaangamik mittarfimmut isertarfiat. Aaqqiissutissaq piviusunngussappat, nunatta iluanut angalasussat Nuummut tikikkaanni pisattanik aallertarfik saneqqullugu aallariartorsinnaalissapput. Aaqqiissutissarli piviusunngortinneqarsinnaanersoq suli qulakkeerneqanngilaq.

- Aaqqiissutissaq piviusunngussappat Angallannermut Aqutsisoqarfik arlalinnik inisseeqatigisariaqarparput. Uagut nammineerluta aalajangiiginnarsinnaanngilagut, Jens Lauridsen oqarpoq.

Aaqqiissutissarli piviusunngussagaluarpat killilimmik atorneqartassaaq.

- Assersuutigalugu timmisartoq ataaseq unnukkut, nalinginnaasumik angalanerup nalaani, aallassappat aaqqiissut taanna atorneqarsinnaavoq. Kisianni nunatta iluani angalasut ataavartumik tassuunaaqquttalernissaat siunertaanngilaq. Pisut ataasiakkaat nalinginnaasumik angallannerup avataaniittut pineqarput, Jens Lauridsen oqarpoq.

Qaqortumi Ilulissanilu iluatsitsipput

Nuummi mittarfiup ilusilersungaanera torrallataanngitsoq Greenland Airportsimi pisortaanerup nassuerutigaa. Misilittagaalersulli mittarfinni nutaani atorneqarsinnaapput. 

Qaqortumi mittarfimmi nutaami maanna ammaqqammersumi, imaluunniit Ilulissani mittarfittaassami, pilersaarut malillugu oktobarimi ammartussami assingusunik ajornartorsiuteqarnavianngillat.

- Qujanartumik aaqqiissutissanik nassaarnikuuvugut, nunatta iluani nunattalu avataanut angalasussat akuliusimasariaarullugit. Maanili mittarfiup illorsuata sananeqarnera taamaatsillugu allatut iliuuseqaruminaappoq, taanna oqarpoq.

Nuup Mittarfiani aaqqiissutissaq qaqugu piareersinnaanersoq pillugu Jens Lauridsen oqaaseqarsinnaanngilaq.

- Ulluliisinnaanngilanga. Oqaatigeriikkattut Angallannermut Aqutsisoqarfik periarfissat pillugit oqaloqatigaarput. Aaqqiissutissaq eqqortoq taakkua peqatigalugit qulakkeertariaqarparput, Jens Lauridsen oqarpoq.