Nuummi atuarfimmi ajornartorsiutit arlaqartut nalunaarusiami qulaajarneqartut

Nuummi Atuarfik Samuel Kleinschmidt (ASK) pillugu nalunaarusiami nutaami uppernarsineqarpoq illorsuup immikkoortuini arlalinni oqoqartoq.

Misissuinerit arlaqartut takutippaat ilungersunartoqartoq oquusinnaasumik iliuuseqarfigineqartariaqartumillu.

Suliffeqarfik R&T Kommuneqarfik Sermersuumit iminneqarluni nalunaarusiorpoq. Tamanna pivoq ASK-imi Ukaliusaq Skolenimilu (USK) silaannarmik ajornartorsiuteqarsinnaaneranik tikkuussisoqarmat.

Misissuinermi nalunaarusiaq marlunnik immikkoortoqarpoq, ASK-imi silaannaap ilungersunartoqarsinnaanera allaaserineqarluni. Ilimagineqartutuut oquk pineqarpoq, soorlu ataani assersuummi takuneqarsinnaasoq.

Nalunaarusiami aamma CO2-qarnerujussua taakkartorneqarpoq, tamannalu peqqinnanngitsuusoq paasineqarluni. Silaannarissarfiit arlaqartut naammanngillat atuartorpassuit klassiniitillugit peqqinnartumik silaannaqarnissaata qulakkeerniarnerani.

Nalunaarusiaq naapertorlugu CO2-p eqiterunneri uuttortarneqarput, Sullivinnik Nakkutilliisoqarfiup killigititaasa ineeqqat 22 iluini pisuni 17-ini.

Nalunaarusiami siunnersortit arlalinnik tikkuussipput, kommunip iliuuserisariaqarlugillu iliuuserisinnaasaannik inini silaannaq pitsaanerulersinniarlugu.

Pitsanngoriaataasinnaasuni ilaapput saliinerit, taarsiinerit immikkullu ittumik eqqiaanerit oqoqarnerpaat iluarsiniarlugit.

Nalunaarusiami iluarsiissutissatut siunnersuutit ilaat makkuupput:

- Gipsimik iigaq listillu masattut mingussimasullu peerneqartariaqarput salillugit immikkullu ittumik eqqiarlugit, ikkuteqqqitsinnagit.

- Inip 8-p akiani perusuersartarfinni iikkat naqqi oqummik eqqugaasut peerneqartariaqarput. Natermi listit peerneqartariaqarput, iikkat salinneqarlutik sanaqqinnginnerannilu immikkut ittumik eqqiarneqarlutik.

- Naqqup ataani eqqakkat arrorsinnaasut peerneqartariaqarput.Siunnersortit siunnersuutaanni ataasiakkaat ilaatigut torluuserneqarsimapput:

- Inini atuartitsiffiusuni pitsaanerujussuarmik silaannarissaasoqartariaqarpoq!

Maanna aamma asbest

Ilungersunartut allat ilagaat ilinniartitsisut inaanni pladit asbestitaqartut paasineqarput. Pladit taakku innarlersimapput taamaalilluni asbestimerngit silaannarmut siaruaassinnaallutik, ingammik qanittuani silaannarissarfeqarmat.

- Ajornartorsiutit immikkut ilisimasalinnit suliarineqartariaqarput, asbestimerngit inimut appakaateqqunagit, nalunaarusiami allassimavoq.

ASK-imi inini silaannarmut nutaarsiassani pitsaasutuaavoq silaannaap isugutassusaanik uuttortaanermi nalinginnaasumik killigititasut ataanneqarsimanerat. Tamana USK-imi ajornartorsiutaanerusoq paasineqarpoq.

Nalunaarusiap kingunissai pillugit kommuni aperivarput. Attaveqatigiinnermik immikkoortortaqarfik ilisimatitsivoq sapaatip akunnerata tulliani akissuteqarumaarlutik.

Sermitsiamit suli USK pillugu nalunaarusiaq takusimanngilarput, neriuppugulli ungasinngitsukkut uterfigeqqikkumaarlutigu.