Nuummi juullip aputaa aakkiartorluni masarlunngorpoq

Ullup qeqqata nalaani aput Nuup illoqarfiani aakkiartulerpoq. Unnuaq ullullu ingerlanerani siallernerata kingunerisaanik aput sumi tamani aakkiartulerpoq, sumiiffinnilu arlalinni taseqqerluni, kusserngillu milinngallutik

Kusserngit apummik sermimillu milinngasut 

Kusserngit milinnganeri pissutaallutik sumiiffiit arlallit annertuumik taseqqerput. Tamanna pissutigalugu aqquserngit kiisalu biilit unittarfii taseqqerput.

Kommuneqarfik Sermersuumi aqqusinernut pilersaarusiortut Nuummilu assartuinermi ingerlatsisut ullaarnganiit kussinernik milinngasunik ammarsaassallutik seqqarsaallutik ulapputileruttorput, aqqusinermi tasinnguussimasut kuulernissaat anguniarlugu. 

Emik Skat Vejleskow, Kommuneqarfik Sermersuumi angallannermut pilersaarusiornermi sulisoq kommunip allaffiata saani kusserngit seqqarsarlugit suliaqarpoq

– Suliassat assartuinermik suliaqartunut tunniunneqarput. Imeq kuulersinnaaleqqullugu aqquserngit sinaani kuuffiit aputinik sermimillu milinngasut ammarsarneqarput. Taamaattumik slange atorlugu seqqartaavugut, imeq kuulersinnaaniassammat, Emil Skat Vejleskov oqarpoq.

Ullaakkut nalunaaqutaq 06.00-imiit sulineq

Ullaakkut nalunaaqutaq arfinerniit Kommuneqarfik Sermersooq aamma Arctic Transport peqatigalugu aallartittarpaat.

Sulineq aallartinneqarpoq Brugsenip saani biilit unittarfiata eqqaani kiisalu Aqqusinersuarmi aamma Kuussuarmi, tassani aput aalluni tasinnguussimammat.

Brugsenip eqqaani biilit unittarfiata saani Nikolaj Mørch Nuuk Transport-imeersoq tankbiilip saani kuuffimmit kiisalu unittarfiup eqqaanit taseq milluartillugu suliaqarpoq.

Tankbiili 6.000 liter-inik imaqarsinnaavoq, kisianni sumiiffimmi nalilersuinerit naapertorlugit tassani apummit aattumit taseq 20.000 liter missaaniippoq.

Silassaq ulluni tullerni

DMI naapertorlugu ukioq manna, ukiup taamaalinerani sila immikkut ittumik kissappoq. 3 - 5 gradit missaanni kiassuseqartarluni, apinikinneratalu saniatigut, aputip aakkiartorneranut sialuk masannartuliortarneralu pissutaaqataapput.

Ulluni tulliuttuni silassaq qiviaraanni taamaaginnarallassaaq. Siallertarluni masannartuliortassasoq naatsorsuutigineqarpoq, kialaaraluarluni qerinnarsinnaallunili. Sapaatip akunnerata naanerani aatsaat nillertikkiartornissaa naatsorsuutigineqarpoq, taamaalillunilu ukiup silap pissusaanut uteqqinnissaanut periarfissaqalersinnaalluni.

Nuummiut ulluni makkunani juullip aputaanik naatsorsuuteqarpallaaratik masammik tatsinillu atugaqarallaannassapput.