Pisuutitsisoqareersorlu Kim Kielsenip Folketingimut ilaasortaq allaffigaa
Folketingimi ilaasortap Aaja Chemnitzip (IA) Naleqqami politikkerit nunamut killuussisutut pisuutimmagit Inatsisartut Siulittaasuat Kim Kielsen (S) allagaqarpoq.
Inatsisartut siulittaasuat Kim Kielsen (S) Folketingimut Ilaasortamut Aaja Chemnitzimut (IA) allakkamini politikkikkut suleqatit pillugit sakkortuumik oqaaseqarneq avissaartuutitsinertut isumaqarfigineqarsinnaasoq allappoq.
Assi: Oscar Scott Carl
Folketingimut ilaasortap Aaja Chemnitzip (IA) Naleqqami politikerit sakkortuumik pisuutikkai TV2-mi januaarip 20-ani allaaserineqarpoq.
- Kuno Fencker Naleqqallu sinnera innermik pinnguarsimapput, tamannalu inuiaqatigiit kalaallit maanna akilerpaat. Tamanna inuiaqatigiinni kalaallini amerlanerussuteqartunut ilumoorfiginninnerunngilaq nunagisamillu killuussinerulluni, Aaja Chemnitz TV2-mut oqarpoq.
Oqaatsit Inatsisartut siulittaasuannit Kim Kielsenimit (S) qisuariarfigineqarput, taassumalu Aaja Chemnitzimut januaarip 21-ani allakkamini Kalaallit Nunaanni pissutsit ilungersunartut eqqarsaatigeqqissaarneqartariaqartut oqaatigaa.
- Qularutiginngilara uagut tamatta, aamma Inatsisartuni, pissutsinit nunatta nunaqqatittalu maanna aqqusaagaannit attortisimaqalutalu sakkortuumik sunnertisimagatta. pissutsit taamaanneranni inatsisartunut ilaasortaqatitsinnut partiinit suminngaanneernersut apeqqutaatinnagu pissusilersornitsinni immikkut isumatusaarnissatsinnut pissutissaqarpoq, Kielsen, allakkani DR aamma Sermitsiaq atuarsimasaanni, allappoq.
Nunamut killuussinermut pisuutitsineq pinerluttulerinermi inatsimmik unioqqutitsinertut isigineqarsinnaasoq allappoq.
- Isumaqaraanni aalajangersakkanik unioqqutitsisoqarsimasoq, taava oqartussat eqqortut saaffigineqartariaqarput, Kielsen allappoq.
Aaja Chemnitzip Kuno Fenckerillu isumaqatigiinngissutaat siorna aallartippoq. Kuno Fencker Donald Trumpip præsidentitut ivertinneqarnissaanut atatillugu USA-mukarmat Aaja Chemnitz taamani assingusumik isornartorsiuivoq. Kuno Fenckerip angalanermini amerikamiut politikeriinik arlalinnik oqaloqateqarsimavoq.
Taamanikkut akerleriinneq Sermitsiami ilaatigut allaaserisami matumani sammineqarpoq: Kuno Fencker Aaja Chemnitzimut politiinut nalunaarutiginninnissamik siorasaarivoq
