Politiit nunaqavissunik aamma kalaallisut oqaasilinnik sulisuminnik attassiniarnerminni pikkorluppallaarsimanerarlugit, politiiusimasut marluk tallimanngornermi ullaakkut sassarlutik politiinik isornartorsiuiput.
- Meerartaaqqaareerlunga sulileqqikkama aqaguani unnukkut pigaartuuvunga. Eriaginnittoqanngilaq, tamannalu sakkortuvoq, Christina Johnsen soraarnissami tungaanut ukiuni 19-ini polititjenestemandiusoq oqaluttuarpoq.
Politiit nunaqavissunik aamma kalaallisut oqaasilinnik sulisuminnik attassiniarnerminni pikkorluppallaarsimanerarlugit, politiiusimasut marluk tallimanngornermi ullaakkut sassarlutik politiinik isornartorsiuiput.
- Meerartaaqqaareerlunga sulileqqikkama aqaguani unnukkut pigaartuuvunga. Eriaginnittoqanngilaq, tamannalu sakkortuvoq, Christina Johnsen soraarnissami tungaanut ukiuni 19-ini polititjenestemandiusoq oqaluttuarpoq.
- Kuultitsiarsuit aqqusinermut iginneqartut isumaqarpunga, taanna oqarpoq.
Politiit isornartorsiuinerat Sermitsiuap Kalaallit Nunaanni Politiivinut saqqummiuppaa. Kalaallit Nunaanni Politiini sulisoqarnermi pisortap, Martin Bernhardip, allakkatigut akissuteqarluni nassuerutiga ukiut ingerlanerini sulisunik attassiniarneq ajornartorsiutaasimasoq.
- Sulinerup pilersaarusiornerani naleqqussarsinnaassuseqarneq pingaaruteqartorujussuusoq nassuerutigaarput, ataasiakkaanik aaqqiissutissarsiornissamut, iliuuseqarnermi mianerisariakatsinnut tulluartunik nassaarnisarnissamut piareersimavugut.
Martin Bernhard, Kalaallit Nunaanni Politiini sulisoqarnermut pisortaq.
Taamaattorli aalajangersimasumik sulisut ukiuni kingullerni sulinermik atukkat ajorpallaarnerat naleqqussarsinnaannginnerlu pissutigalugu politiini suliunnaartarnerannik assiliaq ersersinneqartoq ilisarisinnaanngilaa.
- Kalaallit Nunaanni politiit suliffeqarfiuvoq iliuuseqarnermi immikkut ittumik piumasaqarfiusoq, kisianni sulisut piumasaat assigiinngitsut sapinngisamik aamma eqquutsinniartartussaavagut. Oqimaaqatigiissitsiniarneq taanna pitsanngorsarniartuarparput, Martin Bernhard oqarpoq.
Amigaateqarnerup kinguneri
Narsami politiip oqaatsitigut ajornartorsiuteqarneq politeeqarfimminnni ajornartorsiutini tamanit annerpaajusoq allaatigisami oqaluttuareereeraalu, politiiusimasut marluk, Chistina Johnsen aamma Ulloriaq Grønvold, isornartorsiuipput.
Politiiusimasut taakku marluk, ullumikkut inatsisilerituujusut naapertorlugit, kalaallisut oqalussinnaasunik politiinik amigaateqarnerup kingunerisaanik, innuttaasut kalaallisut tamatigut killisiorneqarsinnaasanngillat. Tamannalu eqqartuussiveqarnermi ajortumik kinguneqarsinnaasoq isumaqarput.
Ajornartorsiut taanna pillugu politiit Sermitsiamiit aperaagut, innuttaasut inatsisitigut qularnaatsumik sullinneqarnissaat politiinut pingaaruteqartoq, aamma politiit innuttaasullu akornanni oqaloqatigiinnermi oqaatsit aporfiussanngitsut, Kalaallit Nunaanni Politiit naqissuserpaat.
- Kalaallisut oqaasilinnik sumiiffinni tamani aamma piffissaq tamaat sulisoqarnissannik qulakkeerinninniarneq unammillernartoqartoq ilisimavarput. Kalaallisut oqalussinnaasunik polititjenestemandinik pissarsisinnaanngikkaangatta, oqaatsitigut ikiorsiinissaq pisariaqartinneqartoq, allatigut qulakkeerniarneqartarpoq, assersuutigalugu oqalutsimik atuinikkut imaluunniit pisariaqartitsineq naapertorlugu pigaartoqarfik aqqutigalugu, killisiuinerit illersorneqarsinnaasumik ingerlanneqarsinnaaniassammata, Kalaallit Nunaanni Politiit sinnerlugit, sulisoqarnermi pisortaq, Martin Bernhard oqarpoq.
- Suli suliassaqangaatsiarpugut, kisianni anguniagaq ersarippoq: innuttaasut paasineqarnissaminnut tusarnaarneqarnissaminnullu periarfissaqarnerat nunami sumiinnerannit imaluunniit kikkut sulinerat apeqqutaatillugu killilerneqassanngilaq, taanna allappoq.
Politiini sulisut atorfeqartitasi kalaallisut oqaasillit nunaqavissullu sapinngisamik sivisunerpaamik sulinissaat qulakkeerniarlugu qanoq iliorpisi?
- Sulisut nunaqavissut attanniarnerat Kalaallit Nunaanni politiit suliutaasa pingaarnerit ilagaat. Piginnaasanik ineriartortitsineq pikkorissaaqqinnerlu ilaatigut sulissutigaagut, soorlu aamma aqutsineq suliffimmilu avatangiisit ukkatarigigut, Martin Bernhard akivoq nangillunilu:
- Sulinerup pilersaarusiornerani naleqqussarsinnaassuseqarneq pingaaruteqartorujussuusoq nassuerutigaarput, ataasiakkaanik aaqqiissutissarsiornissamut, iliuuseqarnermi mianerisariakatsinnut tulluartunik nassaarnisarnissamut piareersimavugut.