SIK portørit pillugit: Kissaataat annikippallaarpoq

Nuummi portørit sulinerminni atugassarititaasut aningaasarsiallu pillugit isumaqatigiissuteqartoqarnissaa utaqqikatalerpaat, tamannalu tunngavigalugu sulinerminnik juunip 26-anni minutsini 59-ini unititsigallartussaasut, portørit peqatigiiffianni siulittaasoq, Ludvig Larsen, Sermitsiamut sisamanngornermi oqarpoq.

Tamanna portørinut isumaqatigiinniussisut siuttuata, SIK-p siulittaasuata, ilisimasaqarfiginngilaa.

AAMMA ATUARUK:

Portørit sulinerminnik unititsigallalersut

- Portørit sulinerminnik unititsigallarniarnerat ilisimasaqarfiginngilarput. Kisianni soorunami paasinarpoq ilaasortagut utaqqikatattut. Kisianni isumaqatigiinniarnerit suli maannakkut ingerlapput, Jess G. Berthelsen Sermitsiamut oqarpoq.

Portørit sulinerminni isumaqatigiissutaat apriilip aallaqqaataanni atuukkunnaartoq suli nutarterneqanngilaq. SIK Namminersorlutik Oqartussallu illuatungeriittut isumaqatigiinniarput. Ingerlalluarnerusinnaappulli:

- Isumaqatigiinniarnerit oqimaapput. Kisianni suli ingerlapput. Ingerlaqqissinnaajunnaassagutta soorunami avammut nalunaaruteqarumaarpunga. 

- Aningaasarsiat pisissutigineqarsinnaanerat eqqarsaatigalugu kingullermik isumaqatigiissuteqarnitsinnit aningaasarsiat pisissutigineqarsinnaanerat appangaatsiarnikuuvoq. Taannalu matussuserneqartariaqarpoq. Taassuma qaavatigut pisissutissamik soorunami aamma pissarsisariaqarput, Jess G. Berthelsen oqarpoq.

SIK: Portørit kissaataat annikippallaarpoq

Portørit peqatigiiffianni siulittaasup ukiuni sisamani tullerni aningaasarsiatik agguaqatigiissillugu 8 procentimik qaffassinnaappata tamanna inooqataaffigisinnaallugu Sermitsiamut sisamanngornermi aamma oqarpoq.

Tamanali isumaqatigiinniussisuata sullugaa.

- Annikippallaarpoq. Aningaasarsiat pisissutigineqarsinnaasut qanoq apparsimatiginerat eqqarsaatigalugit annikippallaarpoq, Jess G. Berthelsen oqarpoq.

Qanoq illuatungissinnut kissaateqarassi?

- Taanna massakkut oqaaseqarfigisinnaanngilara, isumaqatigiinniarnerit ingerlapput, taanna oqarpoq.

Portørit isumaqatigiissutaat maanna atuuffimminik qaangeereersoq, ukiualuit matuma siornatigut isumaqatigiissutigineqarmat, aningaasarsiat ukiuni sisamani agguaqatigiissillugu 8 procentimik qaffapput.

"Uppernarsarsinnaanngilara"

Illuatungeriit, tassa SIK aamma Namminersorlutik Oqartussat, portørit atugaat pillugit isumaqatigiinniarlutik kingullermik naapikkamik sivisunaarsimanngikkaat peqatigiiffiup siulittaasua, tusakkani naapertorlugit siusinnerusukkut oqarpoq. 

- SIK-p immikkoortortaqarfianit paasisagut naapertorlugit isumaqatigiinniartut kingullermik minutsini tallimani naapissimapput. Tassa imminnut taama ungasitsigerpalupput. Taamaattumik alloriaqqittoqartariaqalerpoq, sulisut aningaasarsiaat qaffaatissaannik utaqqikatapput, Ludvig Larsen oqarpoq.

Taamali sivisussusilimmik naapittoqarsimanersoq kattuffiup siulittaasuata uppernarsarsinnaanngilaa.

- Naamik uppernarsarsinnaanngilara pissutigalugu isumaqatigiinniarnerit ingerlapput aamma naapillattaarpugut oqaloqatigiillattaarlutalu, Jess G. Berthelsen oqarpoq.

Taanna qaqugu isumaqatigiittoqassanersoq pillugu ilimasuutiminik oqaaseqarumanngilaq.