Spiralilersuisimaneq pillugu suliaq: Naatsorsuutigineqartumit amerlanerusut taarsiiffigitinnissaminnik qinnuteqarsimapput
Arnat taarsiiffigitinnissamik qinnuteqartut ilimagisamit amerlanerummata, Naalakkersuisut spiralilersuisimaneq pillugu suliamut tunngatillugu aningaasatigut taarsiiffigineqartussanik sullissinissamut piffissaq sivitsorpaat.
- Arnat naatsorsuutigineqartunit amerlanerusut ajunngitsorsiassanik qinnuteqarsimammata qujanarpoq, aammalu qinnuteqaatit pisariaqartumik sukumiissusilimmik assigiissaartumillu pisariaqartumik suliarineqarnissaat Naalakkersuisut tunngaviatigut pingaartippaat, Naligiissitaanermut Naalakkersuisoq Naaja H. Nathanielsen tusagassiutitigut nalunaarummi oqarpoq.
Assi: Oscar Scott Carl
Arnat 1992-ip kingorna akuerseqqaaratik spiralilerneqarsimasut aningaasatigut taarsiiffigineqarnissaminnik ukiortaap tungaanut qinnuteqarsinnaapput.
Qinnuteqartut Naalakkersuisut naatsorsuutigisaanniit amerlanerupput, tamatumalu ajoraluartumik kingunerisaanik qinnuteqaatinik suliarinninneq naatsorsuutigineqaqqaartunit paasissutissiissutigineqaqqaartunillu sivisunerusumik ingerlanneqarsimalluni.
Taama Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfik tusagassiutitigut nalunaarummi allappoq.
Taamaammat februaarip aallaqqaataa nallertinnagu kikkut tamarmik akissutisisinnaanissaat angumerineqanngilaq.
Qujanartoq
- Arnat naatsorsuutigineqartunit amerlanerusut ajunngitsorsiassanik qinnuteqarsimammata qujanarpoq, aammalu qinnuteqaatit pisariaqartumik sukumiissusilimmik assigiissaartumillu pisariaqartumik suliarineqarnissaat Naalakkersuisut tunngaviatigut pingaartippaat.
- Taamaattumik neriuutigaara suliassanik suliarinninnerup sivisunerunissaa paasineqassasoq, tassami naatsorsuutigineqartunit suliassat amerlanerusut suliarineqartussaammata. Ilissinnut qinnuteqaammik nassiussisimasunut oqaannassaanga, nalunngilarput ajornaatsuinnaasimanngitsoq, aammalu sapinngisamik piaarnerpaamik naammassinninnissaq qulakkiissavarput, naligiissitaanermut naalakkersuisoq Naaja H. Nathanielsen oqarpoq.
Naaja Nathanielsenip arnat tamarmik immikkut 300.000 koruunit missaanni pissarsissasut naatsorsuutigalugu siusinnerusukkut nalunaarsimavoq.
Arnat 143-it tamarmik immikkut 300.000 koruuninik taarsiiffigitikkumallutik danskit naalagaaffiannik eqqartuussivimmut suliassanngortitsisimasut isumaqatigiissuteqarfiginissaat danskit naalagaaffiata neriuutigaa. Tamatuma saniatigut arnanut 1992 sioqqullugu naartunaveersaaserneqarsimasunut ilaatigut taarsiiffiginnissinnaasumik ilisimatusarnermut aningaasaateqarfimmik pilersitsisoqassaaq.
