Takornariaqarnermut nunarsuarmi pissutsit sunniuteqartitsisut

Kalaallit Nunaannut takornariat 8 procentinik 2025-mi amerleriarsimapput. Tamanna Visit Greenlandip takornariaqarneq pillugu kisitsisaataasa takutippaat.

Taamaattorli tamanna ukioq manna qanoq isikkoqarpa? Takornariat siornamut sanilliullugit ikileriarsimasut, takornariartitsinermik suliffeqarfiit marluk oqarput.

- Kalaallit Nunaata sammineqarnera nalorninartorsiortitsisoq malugisimavarput, aamma nunarsuarmi allanik ukiup aallartinnerani nalorninartorsiortitsisoqarpoq. Taamaattumik isumaqarpugut tunisinerit allannguuteqalaarsinnaasut. Ataasiakkaallu toqqissisimannginnertik pillugu saaffiginnittarput, amerlavallaanngillalli, Mikkel Søndergård Greenland Travelimi pisortaaneq oqarpoq.

Aamma Guide to Greenland-imi tamanna malugineqarsinnaavoq.

- Kalaallit Nunaat pillugu politikkikkut januaarip qaammataaniit februaarip qiteqqunneranut nalorninartorsiortoqangaatsiarpoq. Inniminniisut piffissami tassani amerlanngillat, aammali malugisimavarput angalaniarlutik inniminneereersimasut arlallit taamaatitsiinnartut, Guide to Greenlandimi pisortaq Mads Nordlund Sermitsiamut allappoq.

Annertuumik suli soqutiginnittoqartoq

Guide to Greenland nittartakkakkut paasissutissiillunilu tuniniaasarfiuvoq, Kalaallit Nunaanni misigisassanik tuniniaasartoq.

AAMMA ATUARUK

Nunanit tamalaanit timmisartumik Nuummut tikittut amerleriarujussuartut

Taakkua takornariartitsinerup siornamut naleqqiullugu, annikinnerulerneranut pissutaasut arlallit tikkuarpaat.

- Maanna takornariarfiunerpaaffiani Asiamiit Australiamiillu takornariat naatsorsuutigereersimasatsitut amerlanngitsut takusinnaavavut. Kangiani qiterlermi eqqissiviilliorneq sorsunnerlu pissutaasinnaapput, ilaatigut angalasut ilaasa nunap immikkoortua aqqusaarlugu timmisartornissartik nangaassutigimmassuk.

Aamma SAS-ip timmisartuussinernik unitsitsinera umiarsuillu takornariartaatsit ikileriarnerisa takornariaqarnermut sunniuteqaqataasutut eqqaavai.

Taamaakkaluartoq nittartakkami iserfigineqartanerata annertuseriarnera malugisimavaat, amerlasuut periarfissanik misissuisarput naatsorsuutigisamiillu ikinnerusut inniminniisarlutik.

- Tassuuna takusinnaavarput Kalaallit Nunaannut soqutiginninneq suli annertoorujuusoq. Taamaattumik naatsorsuutigaarput nunani tamalaani pissutsit patajaalliartorpata ungasissumullu angalarusuttut amerlanerulerpata takornariaqarneq siuariaqqilissasoq.

Atuisut toqqissisimatinnissaat pingaaruteqarpoq

Greenland Travelimili ukiup aallartinnerani, ajornartorsiuteqareerlutik suli ingerlalluarput.

- Ukiup tunitsiviunerpaaffiani ingerlalluarpugut, taamaattumik tuniniaanermi anguniakkat angujumasavut angusimagunarpavut. Taamaattumik ajorsiartuinnarnertut oqaatigineqarsinnaanngilaq, taamatullu pitsaaneruleriartuinnartutut oqaatigineqarsinnaanani, Mikkel Søndergård oqarpoq.

Greenland Travelip, angalanernik pilersaarusiorsimasunik imaluunniit immikkut ittumik aaqqissuussanik neqerooruteqartup, takusinnaavaa Kalaallit Nunaat suli takornariarneqarusuttartoq.

– Isumaqarpunga angalanissamut pilersaarusianik atuisunut, ulluni arlalinni angalasartunut aningaasarpassuarnillu atuisunut toqqissisimatitsinissaq pingaaruteqartoq. Taamaattumik uagutsinnut pingaaruteqarpoq atuisut ikittuinnaat ernumasut saaffiginnittartut – ingammik nunani allani pissutsit ilungersunartorsiorfiuneranni – Kalaallit Nunaat toqqissisimanartumik angalaffiusinnaasoq takutinnissaa.