Tasiilami toqutsisoqarneranut suliaq Nunatta Eqqartuussisuuneqarfiani aallartinneqaqqippoq

Tasiilami suliaq, Nunatta Eqqartuussisuuneqarfiani tallimanngornermi ullaakkut aallartinneqarpoq. Tassani arnaq 26-nik ukiulik anaanaminut juunip 26-anni 2025-mi 75-it missiliorlugit savimmik kapoorisimasutut – ataasiarlu uummataatigut kapisisimasutut pineqaatissinneqarsimavoq.

Nunap immikkoortuani eqqartuussivimmi martsip 18-ianni ukiuni arfineq-pingasuni pineqaatissinneqarsimasut inissiisarfianniittussanngortinneqarpoq. Pissutsit peqqarniitsut pissutigalugit Kalaallit Nunaanni toqutsinermit nalinginnaasumit ukiumik ataatsimik sivisunerusumik pineqaatissinneqarpoq.

Arnap nassuerutigaa savimmik kapisisimalluni, anaanaali toqukkusussimanngillaluarlugu oqaatigaa, taamaattumillu suliaq Nunatta Eqqartuussisuuneqarfianut suliareqqitassanngortippaa.

Arnaq 26-nik ukiulik anaanaminik toqutsisutut eqqartuunneqartoq

Nunatta Eqqartuussisuuneqarfiani marsimi pineqaatissiissut tallimanngormat ullaap tungaani atuarpaa, arnaq toqutsisimasutut pisuutinneqartoq pinngitsuunerarpoq.

Eqqartuussivimmi eqqartuunneqarnermisulli illuatungeriit piumasaqaateqarput.

Arnap illersuisua Benedikte Dahl Nielsen isumaqarpoq pillaatisiassaa sakkortuumik nakuusersimasutut pillaatisiassanngorlugu allanngortinneqartariaqartoq, sivikinnerusumillu parnaarussaaqqullugu.

Unnerluussisussaatitaasup piumasaraa eqqartuussiviup aalajangersagaa Nunatta Eqqartuussisuuneqarfiata aalajangiusimaannassagaa.

Arnap 26-nik ukiullip ukiuni arfineq-pingasuni pineqaatissinneqarsimasunut inissiisarfimmiittussanngortinneqarnerata, saniatigut anaanaasup toqukkut qimagunnerani qimagaasut — aamma qatanngutaanut pingasunut — 100.000 koruuninik taarsiisussanngortinneqarpoq.

Unnerluussisup arnap pineqartup nassuiaataa atuarpaa. Ulloq aallartilluarsimasoq, pikialaarnerullu kingorna arnat taakku marluk akornanni ajorluinnartumik pisoqarsimasoq matumani oqaluttuarineqarpoq.

Kapoorinerit marluk

Unnerluussisup Lars Petersenip sooq anaanani kapisimaneraa, soorunami paaserusuppaa. Arnap 26-nik ukiullip apeqqutit akissuteqarfigisariaqanngilai, taamaakkaluartorli akissuteqarusuppoq

- Taamaasioqqullunga oqarfigisaqattaaginnavippaanga, 26-nik ukiulik oqaluttuarpoq.

Unnerluussisup uppernarsarpaa marloriarluni kapoorisimasoq. 26-nik ukiullip arlaleriarluni anaanani siullermik kapivaa, najukkamilu sanilini politiinut sianeqqullugu saaffigaa.

- Oqaatigisaqattaaginnavippaa kapitikkusulluni. Nilliaffigalunga oqarpoq ataatamisut toqutaarusulluni.

26-vanik ukiullip tamatuma kingorna kapoorinini nangippaa, kapoorinerminilu eqqaamasaarussimalluni oqaluttuarpoq. Taanna nammineerluni piffimmi tassani, aalakoorpoq.

Ilisimannittut allat eqqartuussivimmi uppernarsarpaat anaanaq aalakoortilluni toqunissaminik eqqarsaateqartartoq.

Nunatta Eqqartuussiviani eqqartuussinermi ilisimannittut marluinnaat tamatumuuna tusarniaavigineqassapput, taamaattumillu eqqartuussutip tallimanngornermi oqaatigineqarnissaa, ilimanarluinnarpoq.