Tusagassiorfik: Mads Pedersen naalakkersuisutut tunuarpoq 

Meeqqanut inuusuttunut, ilaqutariinnut nunamullu namminermut Naalakkkersuisoq Mads Pedersen (IA), atorfini inuttut pissuteqarluni atorfini qimappaa. 

- Sapaatip akunnerata siuliani Danmarkimiillunga aalajangerpunga. Ilaquttama pisariaqartikkaannga najuutinnginnama, Mads Pedersen KNR-imut oqarpoq.

- Sulineq inituallaarsimavoq, allaat angerlarsimaffinni ilaquttakka ilagalugit eqqarsartaatsikkut najuutinngitsutut ittarlunga.

AAMMA ATUARUK

Inuiaqatigiinni immikkut ittumik killilersuinerup tungaanut ingerlaarpugut?

Inersimasut akisussaaffimmik tigusinissaannik kaammattornikuuai

Naalakkersuisutut atuunnermini Mads Pedersen ilaatigut inuiaqatigiinnut isumaginninnikkut ajornartorsiutit pillugit arlalitsigut nipituumik oqariartuuteqartarpoq.

Junimi tusagassiortunik katersortitsinermini inersimasunut tamanut kaammattuuteqarpoq akisussaaffimmik tigusisariaqartut taamaaliornikkullu pissutsit ilorraap tungaanut saatinneqartariaqartut.

- Inuiaqatigiiuvugut akornatsinnilu amerlasuut kingunerluutinik nassataqarput, akornatsinnilu amerlasuut imigassamut aalakoornartumut ikiaroorniutinullu saattarput, tamatumalu saniatigut amerliartuinnartut aamma aningaasanoorajunnermut saattarput. 

- Kommunit namminersorlutillu oqartussat ikiortariaqartunut kisimiillutik kivitsisinnaanngillat. Taamaattumillu pingaaruteqarluinnarpoq pisinnaasut tamarmik ikiuuttariaqarput, ilaatigut Mads Pedersen kaammattuuteqarpoq.

Inatsisartunut sassarnikuunanilu qinigaanngilaq

AAMMA ATUARUK

Sumiginnagaaneq atornerluisullu ulluinnarsiutiginikuullugit naalakkersuisunngortoq

Mads Pedersen sassarnikuunngilaq, taamaattumillu Inatsisartuni ilaasortaanngilaq, immikkulli toqqagaalluni meeqqanut, inuusuttunut ilaqutariinnullu Naalakkersuisunngornikuuvoq.

Naalakkersuisunut ilaasortanngunngikkallarami Mads Pedersen KNR-imi HR-imi pisortaagallartutut inissisimanikuuvoq. Sermitsiamit ukioq manna siusinnerusukkut apersorneqarnermini oqaluttuarnikuuvoq nammineq tupaallaatigisimallugu Naalakkersuisutut inississinnaamerminik neqeroorfigineqarami:

- Sukkasoorujussuarmik pisoq pivoq. Naalakkersuisussat avammut nalunaarutigineqarnissaat ullut marluk sioqqullugit aperineqarpunga naalakkersuisunngorusunnersunga. Nangaarianngilangaluunniit ingerlaannarlu angerpunga. Taamatulli aalajangersimanera pillugu kingusinnerusukkut aatsaat nangaassuteqalerpunga, junimi Mads Pedersen apersorneqarnermini oqarpoq.

Mads Pedersenip tunuarnera piffissami sivikitsumi naalakkersuisuni ilaasortat tunuartut aappassaraat. Isumaginninnermut, suliffeqarnermut, nunamut namminermut avatangiisinullu naalakkersuisuusimasoq Bentiaraq Ottosen (A)  novembarimi tunuarpoq.