Umiarsuaq napparsimmaviutigisoq USA-mi talittarfimmit avalappoq

USA-mi umiarsuaq napparsimmaviutigisoq USNS “Mercy" marlunngornermi nunatta nalunaaqutaa malillugu ualikkut illoqarfiup Mobilep umiarsualivianit Mexicop Kangerliumarnganiittumit avalappoq.

TV2 taama allappoq. Nittartakkanilu umiarsuit sumiissusersiutaannik paasissutissiissutini soorlu Vesselfinder-imi aamma Marine Traffic-imi tamanna aamma takuneqarsinnaavoq.

Umiarsuit sumiissusersiutaasa paasissutissiissutigisarfianni allassimavoq umiarsuaq nunatta nalunaaqutaa malillugu 11.30 avalassimasoq.

Umiarsuaq napparsimmaviliaasoq ilisimaneqarnerulerpoq USA-p præsidentiata Donald Trumpip sapaatiummat unnukkut inuit attaveqaqatigiittarfianni Truth Socialimi allaaserimmaguli.

Præsidenti allappoq Amerikamiut umiarsuaat napparsimmaviutigisoq inuppassuarnik napparsimasunik isumaginnittussaq nunatsinnukartinneqassasoq.

Trump allatamini umiarsuaq USNS “Mercy” Amerikap erfalasuanik erfalasoqartoq, AI atorlugu suliani, assitaliussimavaa.

TV 2 naapertorlugu umiarsuaq siornali amutsivimmiissimasoq kiisami avalattoq.

AAMMA ATUARUK

Immikkut ilisimasallit: Umiarsuaq napparsimmaviusoq Kalaallit Nunaanni umiarsualivinnut angivallaarpoq

Umiarsuaq marlunngorneq tikillugu Mobilemi Alabamamiittumi amutsivimmi aserfallatsaaliorneqarpoq.

Umiarsuaq Alabama Shipyardimut juulimi 2025-mi tikippoq, tassanilu umiarsuarnik sanaartornermik tusagassiuutit gCaptain naapertorlugu ukiumi ataatsimi aserfallatsaalineqartussaavoq.

USA-p umiarsuaa napparsimmaviusoq alla, USNS „Comfort“, Alabama Shipyard-imi aamma aserfallatsaalineqarpoq.

Ukiup aallartinnerani tikiuppoq pilersaarutillu malillugit apriilip naanissaata tungaanut aserfallatsaaliorneqartussanngorluni.

Tamanna USA-p illersornissamut ministereqarfiata nittartagaani takuneqarsinnaavoq.

Naalakkersuisut siulittaasuata Jens-Frederik Nielsenip sapaatiummat erseqqissarpaa nunatta Amerikamiut umiarsuaat napparsimmaviusoq tigurusunngikkaa.

- Qujaannarpugut. Præsident Trumpip Amerikamiut umiarsuaannik napparsimavimmik Kalaallit Nunaannukartitsinissamik isumassarsiaa tusarparput. Maanili pisortat peqqinnissaqarfeqarput akeqanngitsumik innuttaasunut katsorsaasartumik, Facebookimi allappoq.

Umiarsuit USNS “Mercy” aamma “Comfort” nunarsuarmi sumiiffinni assigiinngitsuni inunnik ikiuisussatut atorneqartarput.

Assersuutigalugu umiarsuaq USNS “Mercy” 2024-mi Mikronesiamiippoq, umiarsuarlu USNS “Comfort” 2021-mi New Yorkimiilluni covid-19-imik napparsimasunik ikiuiniarluni.

/ritzau/