USA-p aallartitaqarfiata silataani nipaatsumik akerliussutsimik takutitsineq
Ludvig Hammekenip præsidentip oqaasii kamaatigigamigit USA-p aallartitaqarfiata silataani unnuaq naallugu nikorfavoq.
Ludvig Hammeken nillasuttumi unnuaq naallugu tassani nikorfalluni oqaluttuarpoq, Uummannami peroriartorsimagami issittoq sungiusimavaa.
Assi: Privat
Københavnimi Amerikamiut aallartitaqarfiata silataani sisamanngornerup unnuaani nipaatsumik akerliussutsimik takutitsisoqarpoq. Ludvig Hammeken unnuaq tamaat Erfalasorput paaralugu akerliussutsimik takutitsivoq.
- Isumaga naapertorlugu allaanerusumik iliortariaqarsorivunga. Trumpip kissaatiginngisamik tatisinera qaninniarnerilu qatsulluinnarpakka. Taamaammat ippassaq unnukkut suliffinnit angerlarama nutaarsiassallu kingulliit atuareerlugit uninngaannarsinnaajunnaarpunga.
- Isumassarsivunga arlaatigullu allannguisoqartariaqartoq eqqarsalerlunga.
Ludvig Hammeken Uummannami peroriartortoq maannalu Danmarkimi najugaqartoq allat pinnagit imminulli pilluni taama iliorluni oqaluttuarpoq.
- Kamaammeqqaqaanga, nunat qanimut suleqatigiilluartut marluk akornanni taama sakkortutigisumik oqallittoqarmat qamuuna annilaangassutigeqaara. Annertuumik aalassatsippaanga, oqarpoq.
USA-p præsidentiata Donald Trumpip taassumalu suleqataasa USA-p isumannaatsuunissani eqqarsaatigalugu Kalaallit Nunaat pisariaqartikkaa arlaleriarlutik oqareersullu Ludvig Hammeken nipaatsumik akerliussutsimik takutitsivoq.
Piginnittuuneq eqqarsartaatsikkut pisariaqartinneqarmat Kalaallit Nunaanni sakkutooqarnikkut inuttalersuineq naammanngitsoq Trumpi qanittukkut oqarpoq.
