- USA sinnerluta aalajangiisussaanngilaq

- USA sinnerluta aalajangiisussaanngilaq. Tamanna uagut nammineq naammassisinnaavarput.

USA-p præsidentiata Donald Trumpip oqaaseqaatai kingulliit Naalakkersuisut siulittaasuata Jens-Frederik Nielsenip (D) Facebookimi saqqummiussilluni qisuariarfigai. 

Præsident Donald Trumpip Kalaallit Nunaat pillugu oqaaseqaqqippoq, tamatumuuna aallakaatitassiami Real America’s Voice-mi. Præsidentiuffimi 2029-mi naannginnerani Kalaallit Nunaat aqulereersimassallugu tassani oqaatigaa.

Jens-Frederik Nielsen, kalaallit inuussutissarsiutigalugu arsaattartut siullersaat Nemo Thomsen arsaattoq sapaatip-akunnerata naanerani isiginnaarpaa, aamma Kalaallit Nunaat Tivolimi peqataaffigalugu.

- Misigisat taakku assigiinngitsut pingaarutilimmik eqqaasitsipput. Sumiluunniit naapikkutta aammalu silarsuarmi sumiikkaluaruttaluunniit ataatsimoortugut. Arlarput ingerlalluarpat nuannaartarpugut. Immitsinnut kivittarpugut. Ataatsimoornerpullu pingaartillugu nassartuaannarparput 

Jens-Frederik Nielsenip Trumpip Kalaallit Nunaannik tiguaanissamik eqqartueqqinnerani eqqaamasassaq pingaarutilik tikkuarpaa: 

- Nukik uatsinneereersoq malikkaangatsigu nukittunerulertarpugut. Ataatsimoornitsinneersoq. Kulturitsinneersoq. Oqaluttuarisaanitsinneersoq. Minnerunngitsumillu siunissatsinnik nammineq ilusilersuiffigisinnaasatsinnik upperinninnitsinneersoq. 

- USA sinnerluta aalajangiisussaanngilaq. Tamanna uagut nammineq naammassisinnaavarput 

Nathanielsen: Amerikamiunut tatiginninneq annikilleriartarpoq

AAMMA ATUARUK

Kalaallit Nunaata USA-mut pingaaruteqassusaa Trumpip eqqartoqqikkaa

Folketingimut ilaasortaq Naaja H. Nathanielsen (IA) Trumpip oqaaseqaataanut aamma oqaaseqarpoq. Præsidentip oqariartuutai ilungersunarmata ernumalersitsillutillu eqqissiviilliortitsisinnaasut taassuma oqaatigaa: 

- Oqaaseqaatillu taamaattut saqqummiunneqarnerit tamaasa amerikamiunut tatiginninneq suli annikilleriarnerusarpoq, Naaja H. Nathanielsen Facebookimi quppernermini allappoq. 

Taamatut oqariartuuteqaqattaarnissaa aamma mianersoqqussutigaa: 

- Tamanna nikalluutigissanngilarput! Qaammatini 20-ni tatineqarneq sakkortooq tamanna atoreerparput. Ullormiit siullermit tusarnaarnissamut suleqatigiinnissamullu piumassuseq takutereerparput, kiisalu killissavut erseqqissumik nalunaarutigereerlugit. Tamanna ataatsimoorluta angusimaneranut politikerivut innuttaasullu tamaasa qujaffigerusuppakka. 

- Oqaloqatigiinnissamut, peqataatitsinissamut suleqatigiinnissamullu piumassuserput aalajangiusimassavarput, kiisalu inuit pisinnaatitaaffii pillugit nunanilu tamalaani inatsisinik ataqqinninnerput aalajangiusimassallugu. Uagut killiit illersornissamut suleqatigiinneranni suleqataavugut, kunngeqarfiullu allanut attaveqartitsisuisa sulissutigaat tamanna amerikamiunit paasineqarnissaa.,Naja H. Nathanielsen qisuariaammini allappoq.