Angalasut amerlanersaasa mittarfimmi højttalerikkut imaluunniit e-mailikkut nalunaarutigineqartartoq tusartarsimassavaat.
“Timmisartumut ilaasussat tamakkerlugit akunnittarfinnut ajoraluartumik inissarsissussinnaanngitsigik, taamaattumik namminneq unnuiffissarsisinnaasut taamaaliornissaannik tamaasa kajumissaarpavut.”
Angalasut amerlanersaasa mittarfimmi højttalerikkut imaluunniit e-mailikkut nalunaarutigineqartartoq tusartarsimassavaat.
“Timmisartumut ilaasussat tamakkerlugit akunnittarfinnut ajoraluartumik inissarsissussinnaanngitsigik, taamaattumik namminneq unnuiffissarsisinnaasut taamaaliornissaannik tamaasa kajumissaarpavut.”
Nuummi tallimanngormat kingullermik aamma taama pisoqarpoq. Tuukkaq Nuummut minngitsoorluni Københavnimut utertariaqalermat. Taamaattumik timmisartumut ilaasussat hunnorujut arlallit unnuani marlunni unnuiffissaannik isumaginnittoqartariaqalerpoq, timmisartup taartaasussap Wamos-imeersup attartorneqartup sapaammi ullaakkut aallartussap ilaaffiginissaata tungaanut. Ilaasulli sinneri timmisartuussinissamik taamaatitsiinnarnermit eqqugaasut, aatsaat marlunngornermi aallarput.
- Angalasut arlallit qujanartumik namminneq aaqqiissutissarsimmata, sulisutta tallimanngornerup arfininngornerullu unnuaani akunnittarfinni inissat naammattut pissarsiarisinnaavaat, ilaasullu arlallit Hotel Hans Egedep ataatsimeersuartarfiani arfininngornermit ataasinngornermut siniffimmi patitittakkami sininnissartik qujarutiinnartariaqarlugu, Air Greenlandip pisortaanera Jacob Nitter Sørensen oqaluttuarpoq.
- Tamanna naammaginanngilluinnarpoq aamma taama pisoqaraangat ajuusaartorujussuusarpugut, pisortaaneq nassuerpoq.
- Siullermik ilaasussat sinnerlugit ajuusaarpugut. Sapaatip akunnerani ataatsimi akunnittarfimmi najugaqareerluni, siniffimmi patitittakkami unnuinissaq nuannernavianngilaq. Namminermi aamma uanga nuannarinavianngilara.
- Tamannali aamma suliffeqarfitsinnut unammillernartuuvoq. Timmisartuussinernik taamaatitsiinnarnerit, sulisunut tamatigut tatineqaataasarput – angalasullu pisinnaatitaaffii naapertorlugit tamatigut neqeroorfigisinnaannginnatsigik, tamanna sulinermi avatangiisinik pissutsinik ajortunik pilersitsisarluni. Taamaalilluta tamatta sunnerneqartarpugut.
Angalasunit ikiorserneqarluartarneq Jacob Nitter Sørensenip ingammik angalasut nunaqavissut namminneq unnuiffissarsiorsinnaasarnerat iluaqutaasorujussuusoq erseqqissarpaa.
Nuummiunut nersualaarineq
- Nuummiut – saaffigiuminaqaasi.
Tusagassiortoq aamma inuup inuiaqatigiillu pissusiinik ilisimatusarsimasoq Martine Lind Krebs Nuummi Kalaallit inussiarnernerat misigereerlugu sapaatip akunnerata naanerani kingullermi taama oqarpoq.
Martine Lind Krebs sapaatip akunnerani kingullermi nunani avannarlerni tusagassiortunik 14-inik Nordisk Journalistcenterimi pikkorissaanermut atatillugu Nuummut tikeraartunik pikkorissartitsivoq.
Tallimanngormat kingullermi Nuummi pujornera pissutigalugu Tuukkaq Københavnimut utertariaqalermat, pikkorissartut timmisartumut ilaasussaagaluit eqqugaasut ilagaat.
Air Greenlandip pikkorissartut tallimanngornerup arfininngornerullu unnuaani Hans Egede Express-imi Hotel Søma-milu unnuiffissaqartippai, arfininngornerulli sapaatillu unnuaani pikkorissartut arfineq-pingasut siniffissaqanngillat.
Martine Lind Krebsip ajornartorsiutini Facebookikkut oqaluttuaraa, nalunaaquttallu-akunnialui qaangiutinngitsut tusagassiortut nunanit allaneersut arfineq-pingasut taakkua unnuiffissaannik pissarsisoqarpoq.
- Nuummiut takornartanut angerlarsimaffimminnut tikilluaqqusinerat killitsinnartuuvoq. Tamanna immikkut ittuuvoq qularnanngitsumillu taamaallaat Kalaallit Nunaanni misigineqarsinnaalluni, tamatuma kingorna pikkorissartut taama oqaluttuarput, Martine Lind Krebs oqarpoq nangillunilu oqaatigalugu kinguaattoorneq unnuiffissanillu unammillernartut pikkorissartut akornanni narrujuummissutigineqanngitsut.
- Pisoq pitsaanerpaamik atorluarniarsaraarput. Peqataasut ilaasa ulluni amerlanerusuni utaqqinertik arfernik alapernaarsuiartornermut atorpaat, aamma nuannisaqatigiippugut nereqatigiittarlutalu, pikkorissartitsisoq taama oqaluttuarpoq.
/jesper
Angalasut hunnorujut arlallit ingerlariaqqissinnaajunnaartut ininik pissarsissunniarnissaat Air Greenlandimut ilungersunartorsiortitsisarpoq.
Assi: Oscar Scott Carl
- Tamanna tatineqarnitsinnik minnerulersitsisarpoq, taamaalillutami angalasut Kalaallit Nunaannik ilisimasaqanngitsut ikiuisinnaasunillu ilaqutaqanngitsut, ajornartorsiutaannik aaqqiiniarnissamut piffissaqarnerulerlutalu ikiuisinnaanerulertaratta, pisortaq oqarpoq.
- Akunnittarfinni ininik amigaateqarneq iluatsilluarnermut takussutissaavoq, uaguttaaq tamanna peqataaffigivarput, tassami tamanna Kalaallit Nunaata takornarianut pilerisaarinerata iluatsissimaneranut takussutissaammat.
- Taamaattumik akunnittarfiit amerlanerulernissaat aamma kissaatigaarput, kisianni akunnittarfiit amerlinerisigut ajornartorsiutinik tamanik aaqqiissutaasinnaanera qularilluinnarpara. Akunnittarfiimmi inissat tamarmik tunineqareeraangata ingerlalluarnerusarput, taamaattumillu ilaannikkut naammattunik ininik pissarsisinnaannginnissarput akueriinnartariaqarparput.
Air Greenlandip pingaarnersiueriaasia
Timmisartuussinissanik taamaatitsiinnartoqartillugu, akunnittarfimmullu inissanik pissarsiniartoqaleraangat, Air Greenlandip angalasut inissarsissunneqartussat pingaarnersiortarpai.
- Angalasut immikkut unammilligassallit, soorlu ilaqutariit meerartallit imaluunniit inuit napparsimasut, isumaginissaat pingaarnerpaatittarparput, Jacob Nitter Sørensen nassuiaavoq.
- Inniminniinerit naapertorlugit kikkut pineqarnersut ajoraluartumik takuneqarsinnaajuaannarneq ajormata, pingaarnersiuineq ajornaatsuujuaannartanngilaq.
Tamatuma kingorna Air Greenlandip angalasut naleqqussarsinnaasunik bilitsillit pingaarnerutissavai.
- Taakku tassaaapput bilitsit akisunerpaat – tassami billetit akisunerujartortillugit kiffartuussineq pitsaanerujartortarmat.
- Imaanngilarli bilitsinik akikinnerpaanik pisisut imminiiginnarneqartartut, angalasummi tamaasa nuannersumik misigisaqartikkusuttaratsigik. Ajoraluartumilli maannakkut pissutsini atuuttuni tamanna ajornarsimalluni. Oqaatigeqqissavarali – angalasut namminneerlutik unnuiffisarsisinnaagaangata, uatsinnut oqilisaataasaqimmat.
Nuummiinnaanngitsoq
Air Greenland Nuummiinnaanngitsoq akunnittarfinni inissanik amigaateqarpoq, aammali Ilulissani Qaqortumilu ilaasut aamma ajornartorsiuteqalerlutik.
- Illoqarfiit taakku marluk takornarianit ornigarneqarluartarput, taamaattumik aamma taakkunani akunnittarfiit ulikkaaqqajaasarlutik.
Jacob Nitter Sørensenili isumalluarpoq.
- Neriuppunga ajornerpaaq qaangiutereersoq. Tassami 2025 ukiuugami uatsinnut ajorluinnartoq, taamaatitsiinnarnernummi ataatsimut isigalugu 135 millionit koruunit missaat atorpavut, unnuinerit annertuumik aningaasartuutaallutik. 2026-mi tamanna pitsaanerujussuuvoq, tamannalu ukiup affaanut naatsorsuutini saqqummiunneqangajalersuni aamma takuneqarsinnaassaaq, pisortaq oqarpoq.
- Ukioq manna siuariartornerput arlalinnik pissuteqarpoq. Sila ukioq manna atoruminarneruvoq, Nuummi mittarfiup ingerlanneqarnera patajaannerulerpoq timmisartullu ingerlaarnerannik aqutsineq atuutilersinneqartinnagu mittarfimmik killilersuinerit atorneqarunnaarlutik, Jacob Nitter Sørensen nassuiaavoq.
Angalasut hunnorujut arlallit ingerlariaqqissinnaajunnaartut ininik pissarsissunniarnissaat Air Greenlandimut ilungersunartorsiortitsisarpoq.
Assi: Oscar Scott Carl
