Air Greenlandip nassiussat kinguaattoornerat ajuusaarutigaa
Sisimiuni suliffeqarfiit arlallit nassiussat allakkallu kinguaattoorfiusut ajornartorsiutigaat. Nerisassat naasullu tikittut ilaatigut pisoqalereersimasarput. Pissutsit aaqqiviginiarsaraagut, Air Greenlandimiit neriorsuipput.
Sisimiuni pisiniarfiutillit nioqqutissat piffissaq eqqorlugu apuuttarnissaat piumasaraat.
Assi: Tôrtia Reimer-Johansen
Sisimiunut Sisimiuniillu timmisartukkut assartuineq ajorluinnarpoq, inuussutissarsiornermik ingerlatsivimmiit Arctic Circle Businessimiit isumaqarput. Peqatigiiffiup ilaasortarpassuisa timmisartumik assartukkat sukkasuumik apuunneqartarnissaat isumalluutigaat.
Taamaattoqarnerli ajortoq, illoqarfimmi inuussutissarsiortut arlallit oqarput – Air Greenlandillu pitsaanerusumik sullissisariaqarnertik nassuerutigaat.
Sisimiut Fresh Farm Arctic Circle Businessip assersuutigaa. Suliffeqarfik akunnittarfinnut kaffisorniartarfinnullu naatitanik pitsaasunik naatsorsuutiginnittunik pilersuisuuvoq.
- Kalaallit Nunaanni imminut pilersornerulernissaq sulissutigisuullugu nioqqutissat apuunneqarneq ajornerat erloqinartorujussuuvoq. Nutaajullutik tikissapput - taamaanngippat atorsinnaanngillaq, suliffeqarfimmik piginnittoq Palli Fleischer Lyberth oqarpoq.
Sisimiuni naasuerniaq Paarna aamma assersuutissaalluarpoq. Naasut tuniniagassai kingusinaartumik apuunneqakulasartut, ilaannikkullu aqqutaani aserorneqartartut piginnittoq Kamilla Jensen oqaluttuarpoq. Mittarfissuaq Nuummut nuunneqarmalli ajornerulersimasoq, taanna oqarpoq.
– Naasut pingaarnerutinneqarnissaat arlaleriarlugu kissaatigisimavarput, Air Greenlandillu tamanna neriorsuutigisaraluarpaa.
- Kinguaattoornerpassuit pissutaallutik naasunik eqqussuinerup attatiinnarnissaa imminut akilersinnaaneranik apeqqusiivoq. Amerlavallaat ingiinnarneqartariaqartarpata aningaasatigut nammanneqarsinnaannginnamik, Kamilla Jensen oqarpoq.
Unammilligassaqaqisoq
Sisimiuninngaanniit naammagittaalliuutigineqartut immikkut akissuteqarfigineqarput, Air Greenland ilisimatitsivoq. Pissutsillu nuna tamakkerlugu atuuttut pillugit Air Greenland Sermitsiamut akissuteqarfigalugit, tassa ajornartorsiut Sisimiuniinnaanngitsoq atuuttoq nassuerutigineqarluni.
– Qaammatini kingullerni allakkanik nassiussanillu assartuinermi unammilligassarpassuit inunnut inuussutissarsiortunullu sunniuteqartut pipput. Erloqissutigineqarnera paasisinnaavarput, pissutsillu qanoq innerat erseqqissumik saqqummiullugillu iliuuserisavut pillugit paasititseerusuppugut.
Kinguaattoornermut pissutaasut arlaqartut Air Greenlandimiit paasissutissiipput. Nassiussat amerliartornerat, killilersuinerit unammillernarnerat, Nuup mittarfiani kinguaattoornerit aamma nassiussalerinermut atortorissaarutip nutaap atuutilernera.
- Taamaattumik assigiinngitsunik iliuuseqarnikkut pissutsit pitsanngorsarnissaat sulissutigaarput, suliffeqarfik allappoq.
Sullissisut nassiussanillu timmisartuussinerit ilaneqarput, nassiussat allakkallu sukkanerusumik suliarineqarsinnaaniassammata terminalini ingerlatsinerit pitsanngorsarneqarlutillu assartuinerit patajaallisarneqarput.
– Iliuuserineqartut taakku siunissami qaninnerusumi malunnaatilimmik pitsanngorsaataajumaartut naatsorsuutigaarput, pilersuinermilu tatiginnilersitsisoqaqqinissaa aaqqiissutissamillu Kalaallit Nunaanni inuussutissarsiortunut innuttaasunullu iluaqutaasumik pilersitsinissaq anguniagaraarput, Air Greenland allappoq.
- Kinguaattoornerit kingunerisaannik kalluarneqartunut ajuusaarpugut, naammagittarlutillu paasinninnerat qutsavigalugu.
