- Ammeriviit puisillu amiinut tunitsiviit nunaqarfinni inuussutissarsiornermut tapertaassapput

Ukiut siuliini ammeriviit pisortat ingerlataat illoqarfinni nunaqarfinnilu arlallit ingerlanneqarnikuusimagaluarput, taakkuli maannakkut amerlavallaarunnaarsimapput. Taamaakkaluartoq inoqarfiit ilaanni ammeriveqarneq aallartinneqarlunilu inerisaaffigineqaqqittariaqartoq, tamannalu najukkami inuussutissasiornermut annertuumik iluaqutaasinnaasoq, Kommune Qeqertalimmi kommunalbestyrelsimut ilaasortaq, Inger Jeremiassen, Demokraatit, ammerivinnik puisillu amiinut tunitsivinnik ammaasoqarnissaanut siunnersuuteqartoq isumaqarpoq.

Isumassarsiarlu pitsaasuusoq aalisartut piniartullu peqatigiiffii aamma nunaqarfimmi aqutsisut isumaqarput.

Nunaqarfimmi aqutsisut kissaateqartut 

Kommune Qeqertalimmi inoqarfiit ilaanni inuussutissarsiornikkut ineriartortitsinissaq siunertaralugu ammerivinnik aamma puisit amiinut tunitsivinnik ammaasoqarnissaa pillugu misissuinerit aallartinneqassasut Inger Jeremiassen siunnersuuteqarpoq, taannalu kommunalbestyrelsimi novemberi naalersoq oqaluuserineqarmat tamakkiisumik taperserneqarpoq.

- Ukiut siuliini ammeriviit inoqarfinni amerlanerpaani piunikuupput, ammerinerlu ingerlalluarnikooqaaq. Taamaattumik maanna inoqarfiit tamarmik pilinngikkaluarlugit, kisianni misissuilluartoqariarluni sumi ammerivinnik ammaasoqarnissaanik sulianik aallartittoqassasoq siunnersuutigaara. Taannalu akuerineqarpoq ataatsimiititalianullu susassaqartunut ingerlaqqissaaq, taanna oqarpoq.

Ukiarmi Kommune Qeqertalimmi aningaasanut missingersuutit pillugit isumasioqatigiissitsisoqarmat nunaqarfinni ammerivinnik puisillu amiinut tunitsivinnik pilersitsisoqarnissaa nunaqarfimmi aqutsisut arlallit oqariatuutigaat.

- Ammerinermik suli pisinnaasoqarnera kommunitsinni atorluartariaqarparput. Ammerineq piorsarsimassutsikkut tammatsaalisassaavoq piginnaasallu ingerlateqqinneqartariaqarput, taanna oqarpoq.

Inoqarfinni ammerisinnaasunik ujartuisoqassasoq, taakkulu ammeriviup ingerlanneqarnissaanut tunngaviussasut, siunnersuuteqartoq isumaqarpoq.

Taperserneqartoq 

Kommune Qeqertalimmi illoqarfiit nunaqarfiillu arlallit puisit amiinut tunitsiveqanngillat, ammerivinnillu ammaasoqarneranut atatillugu puisit amiinut tunitsiviit ammarneqarnissaat periarfissaalluartoq, Inger Jeremiassen, isumaqarpoq.

- Amernik tunisisinnaaneq piniartortatsinnut isertitatigut iluaqutaassaaq. Ammillu ammerivini suliarineqarnikut tuniniarnerini aningaasat isertitat aamma nunaqarfimmi innuttaasunut iluaqutaaginnaratik akileraarutinut isertitanut aamma iluaqutaassapput, taanna erseqqissaavoq.

Kangaatsiap eqqaani nunaqarfinni puisit amiinut tunitsiveqanngimmat puisit amerpassui piniartut aningaasaqarnerannut iluaqutaanatik eqqaannarneqartarput. Inger Jeremiassenilli siunnersuutaa piiviusunngortinneqassappat, tamanna Ikerasaarsummi piniartukkormiunut annertuumik iluaqutaassasoq, taanna isumaqarpoq.

- Piffissami matumani saarulliisappoq, puiserpassuaqarmallu puisit amii tunisaalluarsinnaagaluarput, Inger Jeremiassen oqarpoq.

Kommunip ingerlataanik ukiut siuliini Kangaatsiap nunaqarfiini ammeriveqartarsimagaluartoq, Ikerasaarsummi nunaqarfimmi aqutsisuni ilaasortaq, Agnethe Inugsugtok, Siumut, oqarpoq.

- Ikerasaarsummi ammerivimmik puisillu amiinut tunitsivimmik ammaasoqassappat nunaqarfimmi inuussutissarsiornermut annertoorujussuarmik iluaqutaassaaq, tamannalu siunissamut isumallualersitsivoq.

- Uanga ammerisarpunga kisianni uagut ammerissaarutta tamakkuninnga suliaqartartut amerlajunnaassapput. Taamaattumik inuussutissarsiornikkut iluaqutaaginnarani aammali ammerisarnerup piorsarsimassutsikkut tammatsaalineqarneranik tamanna kinguneqassaaq, Agnethe Inugsugtok oqarpoq.

Nunaqarfimmi ammerivimmik puisillu amiinut tunitsivimmik ammaaneq siunissamut pitsaasumik aningaasaliinerussasoq, taamaattumillu siunnersuut tamakkiisumik taperitsik Agnethe Inugsugtok erseqqissaavoq.