Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen aamma Greenland Graphite A/S-imi pisortaaneq Stefan Bernstein Piiaaffik Amitsumi ukiuni 30-ni grafitimik piiaanissamut akuersissut ataasinngormat atsioqatigiissutigaat.
Akuersissut Greenland Graphite A/S-imut, tuluit suliffeqarfiutaata GreenRoc Strategic Materials Plc-ip Kalaallit Nunaanni immikkoortortaqarfia, grafitimik mingutsitsinngitsumik batteriiliornermut ilaatigut atorneqartussanik piiaanissamut periarfissinneqarpoq.
Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen aamma Greenland Graphite A/S-imi pisortaaneq Stefan Bernstein Piiaaffik Amitsumi ukiuni 30-ni grafitimik piiaanissamut akuersissut ataasinngormat atsioqatigiissutigaat.
Akuersissut Greenland Graphite A/S-imut, tuluit suliffeqarfiutaata GreenRoc Strategic Materials Plc-ip Kalaallit Nunaanni immikkoortortaqarfia, grafitimik mingutsitsinngitsumik batteriiliornermut ilaatigut atorneqartussanik piiaanissamut periarfissinneqarpoq.
Sullissineq sukkasoq Naalakkersuisut piiaanissamik akuersissutinik ukioq manna pingajussaat tunniussisut, Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen atsioqatigiinnermi oqarpoq.
Greenland Resources Malmbjergetimi molybdænimik piiaanissamut akuersissummik juunimi tunineqarpoq, Greenland Anorthosite Miningilu Qeqertarsuatsiaat eqqaanni anorthositimik piiaanissamut maajimi akuerineqarluni.
- Tamanna neriulluarnartorujussuarmik rekortiliineruvoq aammalu qinnuteqaatip nassiunneqarneraniit piiaanissamut akuersissummik tunniussinermut suliap ingerlanera taamaallaat ukiumik ataatsimik qaammatinillu pingasunik sivisussuseqarsimanera immikkut maluginiarneqassaaq. Tamanna nunani allarpassuarni pisartunit malunnaatilimmik sivikinneruvoq aammalu aatsitassanut inatsisip iluarsisap siunertat malillugit atorneqarneranut ersarissumik uppernarsaatissaalluni. Siunnerfigineqarsimavoq avatangiisinut malitassat, isumannaallisaaneq aamma inuiaqatigiinni akisussaassuseqarneq annikillisinnagit suliassanik ingerlatsisarnerup eqaannerulersinneqarnissaa. Ullumi piiaanissamut akuersissut Kalaallit Nunaata akisussaassusilimmik aningaasaliinissanut orniginarnerulersinnissaanut siunnerfilimmik politikkikkut suliaqarnerup inerneraa, peqatigisaanillu inuit avatangiisillu eqqarsaatigineqarnissaat pimoorullutigu, Naaja H. Nathanielsen tusagassiuutitigut nalunaarummi oqarpoq.
Suliffeqarfik alla piiaanissamut akuersissummik ataasinngormat tunineqarpoq. Tassaavoq Greenland Graphite, tuluit suliffeqarfiutaata GreenRoc Strategic Materials Plc-ip Kalaallit Nunaanni immikkoortortaqarfia, Kujataani Amitsumi ukiuni 30-ni grafitimik piiaanissamut akuersissuteqalersoq.
Assi: Emil Stach
Suliffeqarfimmut angusaq pingaarutilik Aatsitassarsiorfiup matuneraniit ukiut 100-t qaangiutereersullu Kalaallit Nunaanni grafitimik tunisassiornerup piviusunngortinneqarnissaanut ingerlatseqatigiiffimmut ataqqinaataangaartoq angusaasorlu pingaarutilik, Greenland Graphite A/S-imi pisortaaneq Stefan Bernstein atsioqatigiinnermi oqarpoq.
- Peqatigisaanik Amitsumiit piiaaneq Kalaallit Nunaannut, pingaartumillu Kalaallit Nunaata kujataani sanilinut, iluaqutaassasoq eqqumaffigisorujussuarput, Stefan Bernstein oqarpoq, aatsitassarsiornissamut akuersissutip pingaaruteqartorujussuunera Sermitsiamut oqaatigalugu. Minnerunngitsumik aningaasaliisartunut, naalakkersuinikkut suliniummut piumassuseqarnermut takussutissaammat.
– Aatsitassarsiornissamut akuersissut aningaasaliisartunut nalornisitsiujunnaarpoq, Kalaallit Nunaannimi inuiaqatigiit suliniutinut qanoq isiginnittaaseqarnersut maanna paasivaat. Piiaanissamut akuersissummik tunniussineq Kalaallit Nunaata aatsitassarsiorfiunissamik oqariartuuteqartarneranut uppernarsaataavoq tigussaasoq.
Piiaaffeqalernissamut suli sivisusinnaasoq Suliffeqarfik grafitimik tunisassiulernissaanut piffissaq sivisussasoq, Stefan Bernstein oqarpoq. Suliffeqarfiup puussiarsuit grafitimik imallit 30-t 35-llu akornanniittut laboratoriamut nunami allamiittumut ingerlaannaq nassiutissavai.
– Misissorneqarnerannit inernerit aningaasarsiorsinnaanermik misissuinermut annertuumut, ukiup tulliani aallartittussamut, ilanngunneqassapput. Tamatuma saniatigut upernaaru qillerineq aallartissallugu naatsorsuutigaarput, tassani piiaanerup qanoq ingerlanneqarsinnaaneranik paasissutissanik amerlanerusunik pissarsiniassalluta. Taamaattumik suli ukiuni marlussunni suleqqaarluta piaaffeqalersinnaavugut, Stefan Bernstein oqarpoq, taassumalu aamma avatangiisinut inuiaqatigiinnullu sunniutigisinnaasai pillugit nalunaarusiat kiisalu piiaanissamut matusinermullu pilersaarutit akuerineqaqqaartariaqartut eqqaavai.
Avatangiisinut inuiaqatigiinnullu sunniutai Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoq Peter Borg atsioqatigiinnermi aamma najuuppoq. Aatsitassarsiornikkut suliniutit pinngortitamik avatangiisinillu ataqqinnittumik ineriartortinneqarnissaat pingaaruteqartoq, avatangiisinullu sunniutigisinnaasaasa nalilersorneqarnerat inuiaqatigiinnilu tunngasut ammasumik, ilisimasaqarluartumik najukkamilu innuttaasut peqataatillugit suliarineqartarnissaat pingaaruteqartoq taanna oqarpoq.
Greenland Graphite A/S-ip alloriarnissaa tulleq tassaavoq avatangiisinut inuiaqatigiinnullu sunniutigisinnaasaanut (VVM aamma VSB) nalunaarusiornissaq, kingornalu tusarniaassutigineqarnissaa. Taakku Naalakkersuisunit akuerineqareerpata, ingerlatseqatigiiffiup aatsitassarsiorfimmut matusinissamullu pilersaarutit suliarissavai.
Greenland Graphite A/S aatsitassarsiorfimmut matusinissamullu pilersaarutinik nassiussinissamut 2028-mi decembarip 31-ata tungaanut piffissalerneqarpoq. Aatsitassarsiorneq, allatut akuersissuteqartoqanngippat, kingusinnerpaamik ulloq 31. december 2030 aallartinneqassaaq.
Aatsitassarsiorneq aallartitsinnagu inuiaqatigiinnut sunniutissat pillugit isumaqatigiissusiortoqartariaqarpoq, tamannalu ingerlatseqatigiiffiup, Kommune Kujalliup Naalakkersuisullu akornanni isumaqatigiissutigineqassaaq.
