Greenland Travel Qaqortoq allaffimmik nutaamik ammaavoq
Qaqortoq apriilimi mittarfittaarpat Greenland Travelip takornariaqarneq kujataanilu nittarsaassineq ukkatarinerulerusuppai.
Pisortaq Mikkel Søndergård aamma angalatitseqatigiiffimmi siunnersorti Tina Lauritsen greenland travelip nutaamik allaffeqarfiani qaqortumi blue ice-mi værftet-imi.
Foto: Greenland Travels
Greenland Travel Qaqortumi allaffimmik nutaamik ammaavoq. Tamanna pingasunngornermi decembarip pingajuanni ilassinninnermik malunnartinneqarpoq.
Greenland Travel tusagassiuutitigut taama nalunaaruteqarpoq.
Allaffik Disko Linep umiarsualivimmi allaffeqarfianiippoq, Tina Lauritsenillu ukiorpassuarni Greenland Travelip Københavnimi immikkoortortaqarfiani sulisimasup illoqarfimminut uterluni maanna allaffik isumagaa.
- Ukiorpassuarni nunami allami najugaqareerlunga nunatsinnut
angerlarusulerpunga, ilaquttakkalu qaninnerulerumallugit. Tamatuma
saniatigut Qaqortumi mittarfissap nutaap apriilimi ammarneqarpat
illoqarfiup ineriartortinnissaanut periarfissanik nutaanik
periarfissiissaaq. Ukiuni tulliuttuni maani ineriartornermut
peqataanissaq pissanganarlunilu nalerisimaarnartorujussuuvoq,
angalanermut siunnersorti Tina Lauritsen oqarpoq.
Greenland Travel Air Greenlandimut ilaavoq, Kalaallit Nunaannilu inuussutissarsiortunut takornarianullu angalatitsiviit annersaralugu. Arctic Excursions aqqutigalugu nuna tamakkerlugu angalanissanik neqerooruteqartarput.
Kujataani takornariartitsisartut arlallit pilersinneqarsimalereerput.
Takornariaqarnerup inerisarnera
Greenland Travelip sullitaminut pingaarnernut qanillinissamik nunallu immikkoortuani inuussutissarsiornermik ineriartortitsinissamut tapersersuinissamik kissaateqarneranut allaffiup ammarnera naapertuuttoq, pisortaq Mikkel Søndergård oqarpoq:
- Greenland Travelimiit Qaqortumi immikkoortortaqarfeqalernissamut periarfissaq sivitsortumik misissorparput, tassanimi suliffeqarfiit namminersortut pisortallu suliffeqarfiutaasa ilaat sullitarigatsigit. Silaannakkut angallannerup nutaap kiisalu angallassinermi unnuisarfinnilu ingerlatsisut amerlanerulernerat pissutigalugu neqeroorutit aamma ajornarnerulerput. Sulinermut atatillugu Kalaallit Nunaannut illuatungaanullu angalasunut siunnersuisinnaallutalu neqerooruteqarsinnaavugut.
Greenland Travel takornariaqarnermik ineriartortitsinissamut Arctic Excursions atorlugu aamma peqataassaaq.
- Qaqortoq Kujataalu tikitassaapput immikkuullarissut, taakkunanilu takornariartitsisartut tikeraartartullu iluaqutissaannut periarfissat assigiinngitsorpassuit ineriartortillugillu nittarsaannissaat qilanaareqaara, Mikkel Søndergård oqarpoq.
Qaqortumi allaffik Greenland Travelip Kalaallit Nunaanni allaffeqarfiisa sisamaattut inississaaq. Nuummi, Ilulissani Sisimiunilu allaffeqarfeqareerpoq. Greenland Travel Kalaallit Nunaannut nunanilu allani angalanernik suliaqartuuvoq, Københavnimilu allaffik ilanngullugu 52-inik sulisoqarluni.
